TPA estrena esta nueche’l documental «Pruebes d’autor. Les siete vides de Nel Amaro»
Pruebes d’autor. Les siete vides de Nel Amaro, un documental encargáu pola Conseyería de Cultura, Política Llingüística y Turismu del Gobiernu del Principáu d’Asturies con motivu de…
Pruebes d’autor. Les siete vides de Nel Amaro, un documental encargáu pola Conseyería de Cultura, Política Llingüística y Turismu del Gobiernu del Principáu d’Asturies con motivu de la Selmana de les Lletres Asturianes, y que tuvo’l so estrenu en sala ayeri llunes nel Auditoriu Teodoro Cuesta de Mieres, va llegar a la TPA esta nueche a les 23:15.
El documental percuerre la vida del escritor y artista multidisciplinar Nel Amaro, al que’l Gobiernu d’Asturies-y dedica esti añu 2021 la Selmana de les Lletres Asturianes. Amigos, familia, escritores y otres persones que conocieron a Nel, xunto a espertos na so época, faen un viaxe peles distintes facetes de la obra y la personalidá del artista de Mieres.
Apaecen, Marta Baquero, vilba de Nel Amaro; los escritores Miguel Rojo, Adolfo Camilo Díaz, y Lourdes Álvarez, l’artista Ánxel Nava; los hestoriadores Arantxa Margolles y Rubén Vega y la xestora cultural Olvido Herrero, que fuera compañera de trabayu d’Amaro.
El documental pasa pela poesía, el teatru y les distintes formes perfomance que desendolcó l’escritor, asina como los episodios personales y políticos que marcaron la vida de Nel Amaro. El documental, d’unos cuarenta minutos de duración, diríxelu Inaciu Galán y cunta col asesoramientu biográficu y guión del escritor Xandru Fernández.
Nel equipu técnicu tán Lluis Fanjul, Marcos SL, Lean Álvarez Pereira, Alejandra González García, Jennifer Berrocal y Nuria López, equipu de la productora encargada de la realización, Cuatro Gotes Producciones.
