Ricardo Candás gana’l III Premiu de Novela curtia Andrés Solar Santurio

El xuráu del tercer “PREMIU DE NOVELA CURTIA ANDRÉS SOLAR SANTURIO”, aconceyó’l martes 21 de payares de 2023 nel Centru de Cultura Antiguu Institutu a les 13:00 hores, presidíu por Dña. Ana Montserrat López Moro, Conceyala Delegada de Cultura, Mocedá y
Museos del Conceyu de Xixón; D. Xandru Martino Ruz, filólogu, escritor y académicu de la llingua asturiana; D. Luis Casteleiro Oliveros, filólogu de la Dirección Xeneral d’Acción Cultural y Normalización Llingüística y escritor; Dña. Montserrat Machicado Compañy, filóloga especialista en llingua asturiana y responsable de la “Estaya de la Llingua del Conceyu d’Avilés” y Dña Mª Xosé Rodríguez López, responsable de la Oficina de Normalización Llingüística de la FMCE y UP que fizo amás de Secretaria.

De resultes del aconceyamientu y tres analizar con procuru les trece obres presentaes, el xuráu decidió por unanimidá conceder el premiu a la novela “Aire mugoriento” presentada col nomatu Juger, que n’abriendo la plica resultó ser Ricardo Candás. El xuráu quinxo poner de manifiestu la calidá de les obres presentaes y la importante participación, lo que dio llugar a un intensu y estensu debate. El xuráu quier destacar tamién la fondura y bona realización de la historia que narra la novela , con unos personaxes mui bien construyíos y definíos psicolóxicamente, y na que se reflexen esperiencies personales con unes descripciones impactantes y crudes y una resolución formal bien bona, con un usu del llinguaxe mui procurosu, lo que fai, en conxuntu, una obra mui interesante.