Parera va participar en delles actividaes, incluyendo un cuentacuentos na Llibrería El Bosque de la Maga Colibrí
La Residencia Lliteraria Xixón recibe esti mes de xunetu a la escritora y guionista catalana Núria Parera, que va facer una estancia na mesma pa trabayar nos sos proyectos lliterarios. La so presencia va tener tamién dos actividaes col públicu asturianu.
Esti miércoles 15 a les 19 hores va presentar el so llibru infantil «A, B, C y la Sra. Smith» nun cuentacuentos abiertu al públicu de toles edaes que se va celebrar na Llibrería El Bosque de la Maga Colibrí, asitiada nel 9 de l’Avenida Rufo Rendueles, n’El Muro.
El vienres 24 y dientro del programa del XXVIII Congrès de l’Association pour les langes et cultures européennes menacées (ALCE) va tener un diálogu sobre l’audiovisual en llingua catalana y la situación del ámbitu del guión nesta llingua, acompañada por Inaciu Galán, director de la Residencia Lliteraria Xixón y miembru de l’Academia de la Llingua Asturiana.
L’autora
Núria Parera nació nel iviernu de 1972, nel senu d’una familia numberosa, y creció ente les cais de Barcelona y la mariña del Maresme. Llicencióse en Periodismu na Universitat Autònoma de Barcelona y desenvolvió la so trayectoroa profesional nel ámbitu de la prensa mientres los sos primeros años.
Anque esfrutó d’esa etapa y deprendió muchísimo, la llamada de la ficción resultó inevitable. Tres formase en dramaturxa y guión, dedicó los últimos venti años a escribir hestories pa series de televisión. Escribió guiones de series d’ésitu pa TVE, TV3 y Netflix. La so pasión pola narrativa tresciende formatos, tomando’l guión, el rellatu, el teatru y la novela.
Cuenta con una bayurosa trayectoria na lliteratura infantil y xuvenil, asoleyando yá más de diez títulos. Ente les sos obres más destacaes alcuéntrase’l llibru La Maleta, que foi incluyíu na Ibby Honor List de 2020 y gallardonáu col Premi de la Crítica Serra d’Or 2019. De la mesma manera, l’álbum ilustráu Tami, el maquinista recibió una mención na prestixosa Feria de Boloña y foi finalista de la Fundación Cuatro Gatos de Miami. La so última novela infantil, A, B, C y la Señora Smith, foi finalista del Premi Llibreter de Catalunya y del Premi Atrapallibres.
Anguaño, Núria sigue enfotada na creación d’hestories nueves y avanza en dellos proyectos que espera ver crecer en Xixón.
Residencia Lliteraria Xixón
L’escritor y xestor cultural Inaciu Galán vivió nesti espaciu a lo llargo de cuasi una década y en 2023 punxo a disposición l’apartamentu pa la creación lliteraria dende Xixón, buscando tender pontes con otres lliteratures, otres llingües, otres cultures…
La Residencia Lliteraria Xixón abrió les sos puertes a finales de 2023 y dende entós vien recibiendo a escritores y traductores con proyectos de creación, ente los que destaquen David Uclés, Marisa Martínez Pérsico o Ramón Caride.
