L’asturianu entra na Colección IBBY-UNESCO con «Prau»
Pintar-Pintar ye la única editorial española presente nesta selección dedicada a la diversidá llingüística na lliteratura infantoxuvenil, con dos títulos ente los 169 llibros escoyíos en…
Pintar-Pintar ye la única editorial española presente nesta selección dedicada a la diversidá llingüística na lliteratura infantoxuvenil, con dos títulos ente los 169 llibros escoyíos en más de 152 llingües, ente los que figura Prau
L’organismu internacional del llibru xuvenil IBBY (Conseyu Internacional del Llibru pa xente Mozo, nes sos sigles n’inglés International Board on Books for Young people) ta acabantes d’asoleyar una selección na que figura l’asturianu ente les más de 152 llingües incluyies.
La colección presentóse oficialmente’l 6 d’agostu de 2026 nel 40.º Congresu Mundial d’IBBY n’Ottawa (Canadá). La selección inaugural axunta 169 títulos en más de 152 llingües, a partir de les cerca de 500 obres unviaes dende distintes zones del mundu. Esti catálogu inclúi una obra n’asturianu: Prau de Daniel García Granda y Ester Sánchez, editada por Pintar-Pintar.
Llibros pa caltener vives les llingües
IBBY y UNESCO presenten la Coleición como una iniciativa conxunta destinada a asitiar a la infancia y a los llectores mozos nel centru de los esfuerzos por protexer y promover la diversidá llingüística. Nel prefaciu del catálogu, les llingües apaecen definíes como espresiones vives de conocimientu, identidá ya imaxinación.
La idea de fondu va más allá de conservar les llingües como patrimoniu: la Coleición defende que tienen de usase activamente, compartise y reinventase de contino. IBBY recuerda, amás, que’l derechu d’un neñu a lleer inclúi’l derechu a facelo na so propia llingua y a reconocese nes histories que llee.
La iniciativa rellaciónase cola Década Internacional de les Llingües Indíxenes 2022-2032 y col trabayu de UNESCO a favor del multillingüismu, tamién nos entornos dixitales. El catálogu sorraya de manera espresa los nuevos retos que plantega la intelixencia artificial pa les llingües con menor presencia dixital.
Distribución global de los 169 títulos:
24 · África
16 · Asia
38 · América Central, del Sur y Caribe
12 · Árticu
29 · Europa Central y Oriental, Rusia, Asia Central y
Transcaucasia
26 · América del Norte
24 · Pacíficu
Criterios publicaos por IBBY-UNESCO
- Destinatarios: llibros pa infancia y mocedá: álbumes, noveles, biografíes, novela gráfica y non ficción.
- Calidá: altu nivel nel testu y/o na ilustración.
- Periodu: publicación orixinal ente xineru de 2018 y avientu de 2025.
- Llingua: obra publicada orixinalmente nuna llingua indíxena y/o en peligru, o edición billingüe orixinal qu’incluya polo menos una d’elles.
- Marcu internacional: rellación con ún o dellos resultaos del Plan d’Aición Mundial de la Década Internacional de les Llingües Indíxenes.
L’asturianu entra na colección con Prau
La obra Prau qu’edita Pintar-Pintar, escrita por Daniel García Granda y ilustrada por Ester Sánchez, inclúise agora nel catálogu internacional d’IBBY y UNESCO dedicáu a la diversidá llingüística, la lliteratura infantil y xuvenil y la tresmisión de les llingües a les nueves xeneraciones.
El catálogu oficial presenta Prau esplicando que prau ye la pallabra asturiana pa ‘prado’ y que’l llibru esplora lo qu’esi espaciu significa pa un asturianu: daqué que va muncho más allá del paisaxe y que se venceya cola propia idea de pertenencia y de llugar nel mundu.
La obra concibióse como un homenaxe a les neñes y neños que viven o medren nel rural asturianu y tamién a les xeneraciones anteriores que tresmiten esi paisaxe, esi vocabulariu y esa manera de rellacionase col territoriu.
«Pa un asturianu, un prau ye’l so llugar nel mundu».
Daniel García Granda
Ún de los aspectos fundamentales de Prau ye que nun se trata d’una obra creada n’otra llingua y traducida dempués al asturianu. El llibru nació, foi escritu, ilustráu, diseñáu y publicáu orixinalmente n’asturianu. La llingua nun funciona como un añadíu: forma parte del ritmu, de los xuegos verbales, de les imáxenes y de la rellación ente pallabra y páxina.
El testu de Daniel García Granda avérase a la poesía ensin quedar zarráu nuna estructura estrófica ríxida. Xuega cola sonoridá, les asociaciones y les metáfores. Les ilustraciones y el diseñu d’Ester Sánchez prollonguen esi xuegu: dacuando testu ya imaxe avancen na mesma dirección y otres veces abren llectures paraleles.
El resultáu ye un llibru nel que la edición forma parte de la llectura. Pallabres, imáxenes y composición gráfica constrúin una socesión de ‘praos’ distintos, reconocibles y, al empar, imaxinarios.
El datu: la escepción editorial asturiana
El catálogu oficial permite establecer tres datos oxetivos que-y dan a esta selección una dimensión especial:
1 – Prau ye l’únicu llibru n’asturianu de la primera colección. Nel índiz de llingües de la publicación oficial apaez ‘Asturian’ y remite a la ficha de Prau.
2 – L’asturianu ye la única llingua propia d’España representada nesta primera Coleición. L’índiz nun incorpora catalán, gallegu, euskera nin otres llingües propies del Estáu.
3 – Pintar-Pintar ye la única editorial española con títulos nel catálogu. Les úniques fiches que tienen como llugar de publicación España correspuenden a Prau y Dos casas, una isla, dambos editaos n’Asturies.
