La Residencia Lliteraria Xixón recibe a la escritora catalana Anabel Gardell
Gardell va celebrar un cuentacuentos na Llibrería El Bosque de la Maga Colibrí de Xixón La Residencia Lliteraria Xixón recibe esti mes d’agostu a la escritora …
Gardell va celebrar un cuentacuentos na Llibrería El Bosque de la Maga Colibrí de Xixón
La Residencia Lliteraria Xixón recibe esti mes d’agostu a la escritora de lliteratura infantil catalana Anabel Gardell, que va facer una estancia na mesma pa trabayar nos sos proyectos lliterarios. La so presencia va tener tamién una actividá con públicu.
Esti xueves 27 a les 19 hores va presentar los sos llibros infantiles nun cuentacuentos abiertu al públicu de toles edaes que se va celebrar na Llibrería El Bosque de la Maga Colibrí, asitiada nel 9 de l’Avenida Rufo Rendueles, n’El Muro. Nel Actu va participar Inaciu Galán, director de la Residencia, que va dar llectura a un cuentu de Gardell Traducíu al asturianu.
L’autora
Nacida en Capmany (1987) y residente en Figueres, Anabel Gardell ye Llicenciada en Publicidá y Relaciones Públiques pola Universitat Autònoma de Barcelona. Graduada n’Inxeniería d’Organización Industrial pola Universidá Europea Miguel de Cervantes.
Autora de El fantasma del llumí (2023), ilustráu por Anna Grimal y espublizáu con Edita.cat d’El Cep i la Nansa. Retomó la so afición polos pinceles nel álbum ilustráu La llar d’infants (Cap de Ras Edicions, 2024).
Como miembru del grupu d’escritores Creàlit, la sección lliteraria de la entidá centenaria La CATE Figueres, participa en dellos proyectos colectivos. Ún d’ellos son les antoloxíes de Figueres de Por, onde collaboró colos rellatos Ho controla tot (2024) y L’Albera no es toca (2025). En setiembre del 2026 va espublizase Figueres de Por IV onde contribuyó col rellatu Terror a Terrades.
Per otra parte, exerció de mentora lliteraria de Neus Martí, autora d’El cor de les meves tetes (Gorbs edicions, 2026). Amás, collabora n’El Cau de l’Àvia de Ràdio Vilafant, un programa nocherniegu en directu empobináu pol músicu Papa Juls.
Cunta con dellos proyectos lliterarios en marcha: dos cuentos infantiles y la so primer novela, nos cualos va somorguiase mientres la so estancia na Residencia Lliteraria Xixón.
Residencia Lliteraria Xixón
L’escritor y xestor cultural Inaciu Galán vivió nesti espaciu a lo llargo de cuasi una década y en 2023 punxo a disposición l’apartamentu pa la creación lliteraria dende Xixón, buscando tender pontes con otres lliteratures, otres llingües, otres cultures…
La Residencia Lliteraria Xixón abrió les sos puertes a finales de 2023 y dende entós vien recibiendo a escritores y traductores con proyectos de creación, ente los que destaquen David Uclés, Marisa Martínez Pérsico o Ramón Caride.
