Participación asturiana nel Festival de Poesía del Mediterráneu n’Atenes
La poesía n’asturianu cruciará fronteres el viniente martes 8 de setiembre pa resonar nel centru d’Atenes, coincidiendo de forma casual col Día d’Asturies. L’escritor y periodista…
- L’escritor y activista llingüísticu va representar la creación poética en llingua asturiana’l próximu 8 de setiembre nel Institutu Cervantes de la capital griega.
- La cita axuntará a seis destacaos creadores d’Asturies, Galicia, Cataluña, Andalucía y Grecia pa tender pontes culturales al traviés de la diversidá llingüística del Mediterráneu.
La poesía n’asturianu cruciará fronteres el viniente martes 8 de setiembre pa resonar nel centru d’Atenes, coincidiendo de forma casual col Día d’Asturies. L’escritor y periodista Inaciu Galán formará parte del plantel d’autores convidaos a la nueva edición del Festival de Poesía del Mediterráneu, un alcuentru internacional entamáu pol Institutu Cervantes d’Atenes qu’asitia al asturianu nun escaparate cultural de primer orde y proyecta la Lliteratura en llingua asturiana nel ámbitu internacional.
L’eventu va celebrase a les 19:30 hores na terraza de la sede del Institutu Cervantes (cai Skoufá, 31, nel barriu de Kolonaki), con entrada llibre hasta completar aforu. La velada va axuntar a seis voces representatives de la creación contemporánea de dambes orielles de la mar compartida, ufiertando un mapa sonoru de la rica diversidá llingüística y cultural mediterránea.
Xunto al autor asturianu Inaciu Galán, la representación del Estáu español va cuntar cola poeta y novelista gallega Ledicia Costas, la escritora catalana Mireia Calafell y el poeta y críticu lliterariu andaluz Juan Carlos Abril. La nómina de creadores complétase cola participación de los poetes griegos Ifigenia Doumi, que ta traduciendo la obra de Galán al griegu, y Stamatis Polenakis.
La presencia d’Inaciu Galán n’Atenes supón un finxu importante pal espardimientu y visibilización de la llingua asturiana nel esterior, integrándola en pie d’igualdá nun foru d’intercambiu con otres llingües y tradiciones lliteraries de la cuenca mediterránea. L’actu cuenta col sofitu de la Embaxada d’España n’Atenes y l’Axencia Española de Cooperación Internacional pol Desenvolupamientu (AECID).
Como creador nel ámbitu poéticu, Inaciu Galán foi gallardoniáu con reconocencies como’l Premiu «Fernán Coronas», el Premiu de Poesía de Primavera de Piloña o’l Carmen Ruíz-Tilve Arias. Frutu d’esta trayectoria son los poemarios Tierra podre, Patria en pallabres en menores y Nes ruines de la nueche y les hores.
Coles mesmes, combina la creación poética coa so llabor como editor en Cuatro Gotes Ediciones y col trabayu de traducción lliteraria. La so propia obra lírica tradúxose al inglés, castellanu, aragonés, catalán, náhuatl o griegu, ente otros idiomed. Al tiempu, treslladó al asturianu testos d’autores internacionales dende idiomes como’l gallegu, castellanu, catalán, portugués, francés o inglés. Esta faceta de diálogu poéticu ya interllingüísticu motivó’l so proyeutu na Residencia Lliteraria 1863, n’A Coruña, centráu na selección y traducción al asturianu d’una antoloxía de voces de la poesía gallega contemporánea.
En 2023 fundó la Residencia Lliteraria Xixón na so antigua vivienda, per onde pasaron más de 25 escritores de tol mundu, ente los que tuvieron David Uclés o Marisa Martínez Pérsico.
