Paula Pulgar Alves gana’l XIX Premiu María Josefa Canellada de lliteratura infantil y xuvenil

El xuráu destaca la integración del léxicu tradicional nun trabayu qu’enceta la empatía y el respetu al traviés del mundu animal y qu’amuesa “un bien bon manexu del idioma”.

La escritora y filóloga Paula Pulgar Alves ganó’l XIX Premiu María Josefa Canellada de lliteratura infantil y xuvenil n’asturianu, promovíu pola Conseyería de Cultura, Política Llingüística y Deporte, cola obra Secretos, qu’enceta valores como la empatía y el respetu al traviés d’una historia centrada nel mundu animal.

El xuráu valoró especialmente la forma na que Pulgar integra’l léxicu tradicional nun asturianu actual y el so “bien bon manexu del idioma”. Tamién destacó un planteamientu y una temática especialmente afechos pal públicu más nuevu.

El Premiu María Josefa Canellada reconoz la creación lliteraria destinada al públicu infantil y xuvenil en llingua asturiana y ta dotáu con 6.000 euros, un troféu y la publicación de la obra ganadora.

El xuráu d’esta edición tuvo presidíu pol director xeneral d’Acción Cultural y Normalización Llingüística, Antón García, y formáu por Gerardo Fabián Fernández, alcalde de Cabranes; Alonso Zamora Canellada; Xurde Fernández Fernández, ganador de l’anterior edición; Alba Carballo López y Alba Sánchez Batalla. Como secretaria actuó Mariló Rodríguez Vázquez, filóloga de la dirección xeneral.

Paula Pulgar Alves ye llicenciada en Filoloxía Hispánica y especialista en Filoloxía Asturiana y desenvolvió bona parte de la so trayectoria profesional ente la enseñanza y la normalización llingüística. Anguaño, exerz como docente nun institutu de Cantabria. La so obra lliteraria inclúi títulos como Primeres aventures de Pulgu y Yolín (2007), El mundu de Susana (2008), Cuentos de metru y de centímetru (2008) y Calidoscopiu (2011), amás de relatos publicaos en revistes y volumes colectivos. Anguaño publicó tamién, como coautora, Petronila Lupperkrüt y los curtios.