Nueche d’Ánimes ¡Qué mieu!, la propuesta lliteraria p’afondar na tradición asturiana
Cuatro Gotes Ediciones ta acabantes de publicar Nueche d’Ánimes ¡Qué mieu!, l’álbum infantil ilustráu dedicáu al Tiempu d’Ánimes que firmen los autores Víctor Raúl Pintado Rey…
Cuatro Gotes Ediciones ta acabantes de publicar Nueche d’Ánimes ¡Qué mieu!, l’álbum infantil ilustráu dedicáu al Tiempu d’Ánimes que firmen los autores Víctor Raúl Pintado Rey «Vitu» y Alberto Álvarez Peña.
Cunten que cuando cai la nueche del 31 d’ochobre, les ánimes tornen a caleyar ente nós… Xela y Lluques van descubrir que n’Asturies estes nueches escuenden munchos secretos: vieyes tradiciones, calabazos, ñabos, espantayos, ufriendes, amagüestos… y la espantible Güestia Caleyera. ¿Qué secretos s’escuenden nes Nueches d’Ánimes? ¿D’ónde vienen les ánimes? ¿Quién ye esa Güestia? Acompaña a Xela y Lluques nesta aventura y descubri con ellos el Tiempu d’Ánimes. Pero ten cuidáu esta nueche cuando apagues la lluz… ¡Verás cómo presta pasar mieu!
La obra
Nueche d’Ánimes ¡Qué mieu! ye un álbum ilustráu dividíu en 2 partes: la primera ye narra les aventures de Xela y Lluques al rodiu de la Nueche d’Ánimes y la segunda inclúi una serie d’anexos con información d’interés sobre los aspectos etnográficos del Tiempu d’Ánimes (incluyendo otres tradiciones y hasta recetes de cocina), una serie de propuestes didáctiques pa trabayar cola reciella y un pallabreru d»ánimes. Un llibru familiar pa deprender, esfrutar, compartir… ¡Y pasar un pocoñín de mieu!
Los autores
Víctor Raúl Pintado Rey, conocíu como Vitu, ye mayestru, pedagogu y doctor en Pedagoxía pola Universidá d’Uviéu. Amás de los temes d’autoayuda ya intelixencia emocional, ye un gran defensor del padremuñu inmaterial.
Alberto Álvarez Peña ye escritor, dibuxante, ilustrador y etnógrafu asturianu. Dende hai décades dedica una parte importante del so trabayu a investigar, recoyer y divulgar la mitoloxía, les lleendes y la tradición oral d’Asturies.
La editorial
Cuatro Gotes ye una empresa con un equipu xoven pero con amplia esperiencia, emprendedor, entusiasta y profesional, que trabaya la comunicación dende un puntu de vista global y multidisciplinar, utilizando les ferramientes del márketing tradicional y online pa la xestión d’eventos y redes sociales. Una de les estayes de la empresa ye la parte editorial, que se trabaya como una ferramienta d’acción y de compromisu cultural. Asina, l’abanicu de títulos de la editorial va dende la semioloxía al microteatru infantil, pasando pela traducción, la narrativa breve, la poesía, la novela, l’ensayu o l’antoloxía.