Berta Piñán faise cola Il Beca Rosario Acuña pa muyeres escritores de la Residencia Lliteraria Xixón
Coincidiendo col Día Internacional de les Escritores fíxose públicu’l fallu de la II Beca Rosario Acuña pa muyeres escritores. El comité de la Residencia Lliteraria Xixón escoyó…
Coincidiendo col Día Internacional de les Escritores fíxose públicu’l fallu de la II Beca Rosario Acuña pa muyeres escritores.
El comité de la Residencia Lliteraria Xixón escoyó como beneficiaria de la II Beca Rosario Acuña pa muyeres escritores que-y permite pasar una estancia becada na mesma pa desendolcar un proyectu lliterariu.
Berta Piñán, reconocida en 2025 col Premiu Nacional de Lliteratura Asturiana al conxuntu de la so obra, ye llicenciada en Llingua y Lliteratura españoles pola Universidá d’Uvieu y exerció como profesora d’esta materia n’enseñances medies. El so compromisu cola recuperación y dignificación de la cultura y la llingua asturianes, llévenla a escribir dende’l principiu tola so obra orixinalmente nesta llingua.
El so labor como escritora sobresal pol cultivu de la poesía: Al abellu les besties (1985), Vida privada (1991), Temporada de pesca (1998), Un mes (2002). A partir d’esti momentu, espubliza la so obra poética n’ediciones billingües: Noches de incendio ( 2005), La mancadura/El daño ( 2010) Trozos/Cachos (2018) y Argayu/Derrumbe (2024). Tien tamién espublizaos llibros de rellatos entre los que tán La tierra entero (1996) y La maleta al agua ( 2006). Les sos aportacionesnel campu infantil tán traducíes na so mayor parte a otres llingües : Lula,lulina (1989), El branu de Mirtya (2006) , Les cosas que-y presten a Fran (2007), L’extranxeru (2007), Arroz, agua y maíz (2008) La mio hermana yeuna mofeta (2011), y Vida nell campu (2017). Ganadora de los principales premios lliterarios d’Asturies, participa activamente en festivales y alcuentros estatales ya internacionales.
Como poeta y narradora ta presente en numberoses antoloxíes y recopilaciones en traducíes a diferentes llingües: castellán, francés, portugués, inglés, gallegu, rusu, catalán, euskera, alemán, húngaru, serbiu y croata, ente otros. En 2017 gana’l premiu Xosefa Xovellanos de novela con Como la muda al sol d’una llagartesa, traducida en 2025 al castellán.
Reconocida como una de las voces fundamentales de la moderna lliteratura asturiana, na lexislatura 2019/2023 ostentó’l cargu de Conseyera de Cultura, Política Llingüística y Turismu del Gobiernu del Principáu d’Asturies .
La Residencia Lliteraria Xixón convocó esta beca en collaboración cola Conceyalía de Cultura y Educación de Xixón, empobinada a muyeres escritores en cualesquier xéneru lliterariu y llingua del mundu que precisen d’un espaciu y tiempu pa la realización d’un proyectu lliterariu abiertu.
La beca ufierta una estancia creativa na ciudá de Xixón, n’Asturies, esti añu nel mes d’avientu. Inclúi agospiamientu na Residencia Lliteraria Xixón y dotación pa gastos de tresporte, asina como la organización de dellos actos mientres la estancia de la escritora na Residencia.
Inaciu Galán, director de la Residencia Lliteraria Xixón, espresó’l so contentu cola escoyeta de l’autora: «Berta Piñán ye una voz imprescindible pa entender la lliteratura asturiana de los caberos cuarenta años, una figura más que reconocida nel ámbitu estatal ya internacional y tenela na Residencia Lliteraria Xixón ye un arguyu, porque tamos convencíos de que d’esta estancia creativa van salir obres de gran interés pa les nueses lletres».
«La beca recibió esti añu una montonera propuestes dende distintos llugares del mundu y con una gran calidá lliteraria y agradecemos abondo l’interés que xenera l’espaciu y esta convocatoria», esplicó Galán.