Elisabet Felgueroso gana’l III Premiu «Muyer» de Narraciones Trabe
El xuráu, aconceyáu’l 15 d’ochobre, taba formáu por Natalia González Menéndez, Laura Marcos Domínguez, Arantza Margolles Beran y Esther Prieto, actuando como presidente Rafael Rodríguez Valdés…
El xuráu, aconceyáu’l 15 d’ochobre, taba formáu por Natalia González Menéndez, Laura Marcos Domínguez, Arantza Margolles Beran y Esther Prieto, actuando como presidente Rafael Rodríguez Valdés y faciendo de secretariu Samuel Castro González, valoraos los siete orixinales presentaos, decidió por mayoría conceder esti III Premiu «Muyer» de Narraciones Trabe a la obra Esta firida qu’ambura, de la que ye autora Elisabet Felgueroso.
Esta firida qu’ambura ye una novela que dende les primeres páxines, nes que la protagonista confiesa un asesinatu, busca la guapura al traviés del usu de llinguaxe y, con una voluntá estética clara y al tiempu enraigonada no popular, caltién la pulsión de la narración hasta la páxina última. Esta novela tien como elementos centrales la crueldá, la envidia, la mentira y la traición pero, sobre manera, la culpa, que percuerre y vertebra esta obra.
Elisabet Felgueroso López (Ciañu, 1980) ye llicenciada en Filoloxía Española pola Universidá d’Uviéu y trabaya como profesora de Llingua castellana y lliteratura en Cantabria. Ganadora de dellos premios lliterarios de rellatos, ye autora del llibru de cuentos Páxines del llibru muertu y del ensayu Cuando Perséfone mordió la granada.