«Sobrante d’un foriatu recortable» de Milio Ureta (Escena 3ª)

TERCER ESCENA  DE SOBRANTE D’UN FORIATU RECORTABLE

Bienllegaos y bienllegaes otra vuelta más a esta collaboración de la revista dixital Formientu. Pa entamar bien el mes d’agostu dexámosvos equí la tercer escena del testu dramáticu de Milio Ureta, que compartimos íntegra gracies a la xenerosidá del autor y de la editorial Impronta. 

En pallabres del propiu autor: «HIBRIS. GRUPU. IDENTIDÁ. TURISMU. INCLUSIÓN ESCLUSIÓN. PUEBLU ESCOYÍU. Esi mecigayu incorrectu va…»

Ensin más, dexámosvos cola tercer escena d’esti Sobrante d’un foriatu recortable primero de les venti cero nueve; esperamos que vos preste.

CLAS IDEOLOXIZADA
DE TEORÍA DRAMÁTICA

El nuevu Institut del Teatre ye un edificiu con pretensiones que nun tien cuasi nada que ver col vieyu institutu d’artes escéniques del barriu góticu. El que golía a llimu Y yera escuru Y tenía memoria de sudu peles muries y les paredes. El nuevu Institut del Teatre ye modernu y tien un puntu pijo con poco aire de Grotowski o de Barba. Y fasta’l momentu tien unos puntos suspensivos perllargos de non llugar y burgueses. El nuevu Institut del Teatre nun presta nin ye amorosu, nin ye repunante nin gafu nin fuín. Ye más bien una metáfora de tola aburrición artística que ta por venir. Los fíos del pujolismu faen una segunda o tercer carrera, non utilitarista, nel nuevu Institut del Teatre. Bona parte d’ellos complazse nun contestatarismu d’aula y biblioteca, y prepárase pa nutrir de sistema y ideoloxía amable les series televisives de la TV3 y les producciones masaxistes del TNC. El sentíu críticu del nuevu institutu ye [pel momentu] inocuu y asépticu. Poro, como institutu d’artes escéniques y de pensamientu, el nuevu centru d’estudiu ye un pocu una contradicción. Cuando too ta cubierto y pago, la propia revolución ye inviable y toca entós inventar una. Acasu un Procés. O una revolución planetaria. O meyor [por qué non] una revolución de barriu, choni y obrera y charnega y sincrética. Na clas de teoría dramática, EL PROFESOR INCORRECTU intenta que nes molleres del alumnáu domésticu prenda dalgún sentíu xabaz y rial de vida, cuestionador y rebelde. Pero [pel momentu] la única dialéctica que s’albidra nel nuevu Institut del Teatre ye la del “Jo sí ho sóc I tu no ho ets”. Lo que val dicir Una aburrición.

EL PROFESOR INCORRECTU

Piénsenlo. Piénsenlo un pocu porque esto nun ye un asuntu menor Esto ye la caña’l güesu. Pal dramaturgu l’oxetu’l relatu nun pue ser nenguna tochura. Que sí Que la mio obra pue tar maraviosamente escrita Val. Pero yo ¿Qué coh.ona toi cuntando? Qué mensaxe toi llanzando-y al públicu. QUÉ COH.ONA YE LO QUE-Y QUIERO CUNTAR. La importancia’l relatu profundu nun testu dramáticu ye sustantiva del too. Sustantiva dafechu. Ye sustantiva en cualesquier xéneru lliterariu Pero na escena yelo too.
Cúnto-yos un pensamientu que me ronda estos díes. Nesti momentu Tamos viendo cómo les sociedaes d’occidente lo apuesten too a una economía del Turismu y cómo Poquín a poco estes sociedaes acaben por convertise a sigo mesmes En reflexu imbécil d’un relatu turísticu de seducción Infantil y Simplista. Nuna infantilonada. Nesti momentu Tán faciéndomos ser cada vez más Reflexos de caúna de les narratives simplayes y babayes a les qu’eses sociedaes nuestres xueguen p’atrayer visitantes Esto ye Turistes. D’aende Si nós Vecinos d’un determináu pueblu Xugamos al xuegu de ser tamién turistes encantaos col xuegu atontolináu del nuestru propiu relatu ¿Nun podrá ser qu’acabemos convertíos tamién nós en pures simplayaes dientro del nuestru propiu territoriu? ¿Sí o non? Garremos por exemplu El relatu piadosu en tornu al nuestru idolatradísimu Antoni Gaudí. L’obreru canonizable de Dios El santu L’humilde El virtuosu y L’exemplar modelu d’artista de la burguesía 1900. Impecable y xenial Neso vamos tar toos d’acuerdu. Pero llega’l xuegu… El Parc Güell. La Sagrada Família. La Pedrera. El trencadís. El bus turísticu y Gaudí. Gaudí y El Barça. Ai… Esi ye’l relatu turísticu. Una estrella de diez puntes urticantes que van ser siempre les mesmes. Una estrella que camudará en cuentu pa nenos a la que mos descuidemos Y que sedrá deprendida y comercializada como Un Puru Cuentu. Tamos tol día lleendo y dando a lleer Puros Cuentos señores míos y míes. Hum. Pásamos en ciertu mou Igual que-y pasaría col so relatu a un mozu o a una moza que trabayare nuna Nuna guardería munchu tiempu. ¿Qué pue pasa-y a daquién que trabaye munchu tiempu nuna guardería? Nuna escola bressol. A unu que trabaye bien y de manera vocacional con nenes y nenos de Trés Cuatro Cinco años durante digamos Quince Venti años… ¿Qué pue pasa-y al discursu cotidianu d’esi pedagogu? Pregunto. ¿Nun pue pasa-y [pregunto eh] Nun pue pasa-y que termine apropiándose de tou él esa forma de cuntar? ¿Y qu’a los efectos En so discursu Esi narrador se convierta de fechu nun deprendedor de sigo mesmu Neto a so vez qu’unu más d’esos nenos y nenes que deprenden cuentos per boca d’él? QUICIR Esi contactu diariu col so propiu discursu infantil Sía narrativu o dramáticu ¿Nun pue terminar Simplificando Esquematizando Infantilizando A esi tresmisor A esi narrador A esi dramaturgu fasta’l puntu de facer d’él un nenu grande? Nun sé. Nun sé Igual-yos parez una tochura. Yo déxolo ehí. Compárto-yoslo por si-yos val. Pero Cuidáu. Cuidáu colo que producen y colo que consumen.

CUIDÁU cola simplayada.

EL PROFESOR INCORRECTU lláma-y l’atención a UN FORIATU RECORTABLE.

¡Asturianu! Cago na lleche. Esconsone Rediós. ¿Otra nueche d’alarmes? Atienda qu’esto val p’Asturies tamién eh. Val-y tamién pal Pelayu Rei val-y pa la Cruz de la Victoria… Pa la virxe de Cuadonga. Val-y pa les fabes pa la sidra pal cachopu… Pal Sporting y pal mitu decimonónicu de la Reconquista d’España [y pivotando ésti últimu a favor del movimientu nacional españolista]. Cuatro tochures simplificaes pa un rellatu acríticu Tou él al serviciu de dellos grupos escelebraos de braniantes-oveya con fame de cuentos. Un par más de xeneraciones asina… y esapaecen ustés como país Yá-y lo digo. Esi títulu de Principáu Español va comelos. Y si non Al tiempu. (A toos) Señores míos El rellatu de les sociedaes turístiques ye’l pozu ciegu del cuentacuentos de conveniencia de les civilizaciones menores. Un pozu en que siempre acaben por cayer les sociedaes más probetayes d’espíritu. Eso ye asina. Y si non Al tiempu.

Y agora a otra cosa.

Dempués d’un silenciu, EL PROFESOR INCORRECTU continúa la clas cambiando’l tema.

Dicíemos ayeri qu’en LOS PERSES d’Esquilu el poeta griegu ta falándomos d’un Imperiu que sucumbe énte l’exércitu de la Hélade por mor de la h.ibris nacionaliega y imperialista de los asiáticos. Comandaos por Xerxes Que non por Darío. Que-yos quede claro El nacionalismu bienestante del músculu hipertrofiáu Siempre siempre siempre tres de la primer sebe peca de h.ibris. H.IBRIS Que diximos que yera la forma de nomar de los griegos a la SOBERBIA. Una manifestación extrema del arguyu [que’l propiu Cristianismu meterá tiempu dempués ente los sos pecaos capitales]. H.ibris h.ibris h.ibris. Pecáu griegu. Pecáu del poderosu. Pecáu catalán. Pecáu español. “Somos meyores que tolos que nun son nós”. Y ello fasta’l puntu de que los que nun son nosotros cenciellamente Nun son. ¿Qué facemos con eso amigos míos? Hum. Qué facemos col otru. Col que nun ye Nós. Que-yos paez ¿Dicímos-y al nuestru compañeru d’Asturies que somos meyores qu’él? Á Asturianu Qué-y paez. ¿Y a ustés? ¿Dicímos-y Que saque si quier el títulu de dramaturgu Pero que llueu nun venga equí a quitamos a nós el trabayu? Asturianu ¿Quier quedar con nós? ¿Sí? Yo siéntome afalagáu Si ye eso lo que quier. Pero piénselo bien Pregúnte-yos Entrúgue-yos a los sos compañeros primero si lu van querer consigo. Pal TNC Pal Lliure Pa la TV3. Hum. Cuidáu cuidáu. Puen nun querelu Y nun pasaría nada. Nun ye un delitu. Ye llícito. A la fin Si m’apura podríen tamién nun querelu na so casa Allá n’Asturies. Y tamién sedría llícito. ¿Cierto? Cierto.

Com ho veiem Això?

En tou casu. Yo enantes prefiérolos a ustedes independentistes que nacionalistes. Yá-yos lo digo. Y prefiérolos tamién anarquistes enantes que nacionalistes. L’únicu nacionalismu que yo compro y abrazo ye’l reactivu. Si me tas afogando na mio identidá na mio cultura na mio tradición Métote un petardu en culu y a correr si fae falta. Esa reacción cómprola Esa Sí. Pero yá Fuera d’ehí D’esa defensa Cuidáu. Yo’l nacionalismu defensivu abrázolu de toes toes Pero refúgolu dafechu cuando valida’l puru ataque. El nacionalismu del músculu mui mui poques veces ye solidariu Y Cuesta dicilo Pero no más profundo de la so naturaleza prende na mesma tierra que prenden los fascismos. ¿Qué-yos paecen Mui llonxanos del fascismu los ecos presentes del nacionalismu español? Los Aznar Aguirre & Co… Nun quiero dicir con esto que nacionalismu y fascismu seyan términos equiparables. Pero Sí qu’apunto y digo Que’l fascismu bebe neses mesmes fontes primeres de lo nacionaliegu… ¿Y entóncenes cómo se xuega ehí pa diferencialo? ¿Cómo se sal d’eso? Pues yo nun lo sé si esi caleyu tien muncha salida. A min abúltame que si bebo na mesma fonte qu’un fascista Lo únicu que pueo facer pa nun comulgar con elli Ye De vuelta pa mio casa Garrar a lo menos un camín diferente al d’elli Una sienda distinta a la que los dos siguimos pa venir. De lo contrario va tocamos dicí-y al nuestru collaciu asturianu qu’Él ye menos que nosotros. Va. Asturianu ¿Qué-y parez? ¿Qué pensaba que yera igual que’l restu la clas? Forcalleda Díga-ylo. Que nun ye igual que nós. Que nun ye del too ún del grupu. Un de los escoyíos… ¿Van pescanciándolo? Dempués de beber d’esa fuente primera Tócame A lo menos mexar distinto lo que bebiere xunta’l fascismu. Mexar nun matu distintu Y Nun conformame otru día col cañu descubiertu polos dos. Y beber yo d’otros caños. Y dexar que seya l’otru El de la hipertrofia del nós El que Si quier Namás beba del primeru. Ési ye un bon comienzu.

Silenciu.

¿Nunca nun tienen pensao nes relixones monoteístes como espiritualidaes nacionaliegues? ¿Qué ye eso de ser el pueblu cristianu o’l xudíu o’l sarracenu… el Pueblu de Dios? ¿Nun-yos suena raro ? ¿Áu se viere? ¿Nun tamos equí falando en términos nacionaliegos d’un pueblu de privilexu? El ‘pueblu de Dios’ y el ‘Dios del únicu pueblu por Él escoyíu’. Escoyíos pola Divinidá. ¿NÓS? ¿De verdá? Vaya suerte eh. Pero ¿Somos nós el pueblu favoritu de Dios O somos namái’l nuestru propiu pueblu favoritu col aval d’un dios propiu? ¿Cómo lo ven eso? Piensen nello. O bono Namái Piensen. (Rise pa sigo) Confórmome con que piensen.

EL PROFESOR INCORRECTU procede a pesllar la sesión.

Y yá. Fasta equí llegamos. Per agora.

Pal xueves han de trayer lleío La Poética d’Aristóteles. Que naide nun venga col cuentu de que nun la alcontró. Háila fixo na biblioteca l’institutu a lo menos en trés versiones… Catalana y castellana seguru Y pámeque tamién en griegu. Seique a dalgunu o dalguna de Clásiques pue interesa-y. Pero si non hubiere bastantes exemplares bien puen dir mangala nun centru comercial o nuna casa llibros con calter de franquicia de la Plaza Cataluña. Toi pensando na empresa francesa de les cuatro lletrones… O nel imperiu del triángulu verde y el xeitu inglés que mos identifica como españolísimos.
A ver a ver a ver Qu’allevante la mano quien entovía nun tenga mangao un llibru nun gran centru comercial… (Ablucáu en viendo toles manes n’alto) Mare meva… Qué semáu de fisgayos. Non. Asina non. Asina nun hai quien los faga entes dramáticos de trescendencia. Dramaturgos/gues… Directores… Á mios nenos y nenes. Métense ustés nun mundiu ingratu. Yá puen dir espabilando Si quieren aprobar (Rise).

Apa Formosos… Fins al dijous!

Escuru.