Bimenes entrega los premios del so concursu de cuentos esti sábadu

El sábadu 29 de xineru, a partir de les 18:00 hores na Casa Cultura de Santuyano, el Conceyu Bimenes va entamar l’actu d’entrega premios del XXIV Concursu de Cuentos pola Oficialidá del Asturianu, edición correspondiente al añu qu’acabamos de dexar atrás. Nel trescursu del actu, como ye vezu, fadráse llectura pública del cuentu ganador na voz del so autor. Darréu, l’actor Carlos Alba, nel papel de “Cellero”, representará’l monólogu “Sporting 1978”, una obra cómica col meyor Sporting de la hestoria como tresfondu.

Recordamos que’l ganador d’esta edición del certame foi Pablo Rodríguez Medina (L’Entregu, 1978). El primer premiu, dotáu con 600 euros, foi pa la so obra “En brazos de naide”. El segundu premiu, dotáu con 450 euros, foi pal cuentu “Enguedeyos y mentires”, de Solinca Turbón Cuesta (La Felguera, 1981), y Gonzalo González Barreñada (Sotrondio, 1973) algamó’l tercer premiu al que se-y apurren 300 euros, con “La muerte d’acebache”. Nesta edición el xuráu tuvo compuestu polos escritores Xulio Vixil, Paco Álvarez y José Ángel Gayol.