El númberu 125 de Lletres Asturianes preséntase nes Xornaes Internacionales d’Estudiu de l’Academia de la Llingua Asturiana

Les Xornaes Internacionales d’Estudiu de l’Academia de la Llingua Asturiana vuelven al salón d’actos de la primer planta del edificiu d’alministración de la Facultá de Filosofía y Lletres, na Universidá d’Uviéu. Van ser trés díes (9, 10 y 11) d’actividaes académiques, ponencies y comunicaciones rellacionaes cola investigación llingüística n’estayes bien estremaes.

Güei martes día 9 −darréu del entamu institucional programáu pa les 12.30 y nel que van participar el Rector de la Universidá d’Uviéu, el Decanu de la Facultá de Filosofía y Lletres y el Presidente de l’Academia de la Llingua Asturiana−, l’académica, codireutora de les Xornaes y caderalga emérita de la Universidá d’Uviéu Ana María Cano González va presentar el númberu 125, el más recién, de la revista Lletres Asturianes.