Inaciu Galán presenta la so nueva plaquette, Xixón Sound, nun vermú lliterariu multillingüe

Esti sábadu, 14 de payares, el llocal xixonés Toma 3 va acoyer a les 13:00 hores un orixinal vermú lliterariu dedicáu a la presentación de la plaquette Xixón Sound, obra d’Inaciu Galán, del que va regalase un exemplar firmáu a toles persones asistentes.

Editada por Nacho González dientro de la so mítica colección «Heracles y nosotros», la espublización atropa unos pocos poemes que, anque inéditos na so forma escrita, formen parte de la trayectoria vital y poética d’Galán y fueron compartíos a lo llargo de los años en diversos recitales y timbes poétiques.

L’actu quier convertise nun actu dinámicu, amenu y alloñáu de les presentaciones convencionales, el recitáu va tener un calter colectivu y multillingüe, con versiones del autor y poemes orixinales de les poetes convidaes.

Pa ello, l’autor va tar acompañáu por un plantel d’autores de primer nivel como Marta Mori, Sofía Castañón, Diego Solís, Lula Montes, Mercedes Ruizsánchez y el mesmu Nacho González. Como poetes convidaes especiales, l’eventu va cuntar cola presencia de Miriam Couceiro que vien dende Galiza y de Tonia Kyriakoulakou, dende Grecia.  

La conducción y coordinación del actu va correr al cargu de la conocida hestoriadora y presentadora Arantxa Margolles.

Como incentivu especial pa les persones aficionaes a la lliteratura, toles asistentes van recibir de regalu un exemplar de la plaquette, robláu y numberáu pol autor.

L’eventu cuenta cola collaboración de la Residencia Literaria Xixón.