La Fundación Juan Muñiz Zapico abrió la convocatoria de la XXIII edición del Concursu de Microrrellatos Mineros «Manuel Nevado Madrid», una iniciativa que busca caltener viva la memoria de la cultura minera al traviés de la creación lliteraria.
El certame ta dirixíu a escritores de cualquier nacionalidá que presenten un únicu microrrellatu orixinal y inéditu, escritu en castellán o asturianu, que’l so conteníu tea rellacionáu col mundu de la minería en cualesquier de les sos dimensiones: los sos protagonistes, la historia, el trabayu, el paisaxe o les vivencies vinculaes a esti sector.
Les obres nun van poder superar los 2.800 calteres con espacios y van poder unviase tanto per corréu postal como per corréu electrónicu hasta’l 31 d’ochobre del 2026. El xuráu va tar presidíu pol catedráticu Benigno Delmiro Coto -secretariu ensin voz nin votu- y va valorar los trabayos de forma anónima, conociendo namás el títulu y el pseudónimu de los sos autores.
El concursu contempla un primer premiu de 600 euros, amás d’un grabáu de Manuel Calvo y un llote de llibros. Coles mesmes, van concedese trés accésits, dotaos con 300 euros y un llote de llibros, destinaos al meyor relatu de temática histórica, al meyor trabayu presentáu por mozos menores de 20 años y al meyor microrrellatu escritu n’asturianu. El xuráu tamién va poder otorgar menciones especiales si considera que dellos relatos merecen una reconocencia adicional.
El fallu del xuráu va dase a conocer el 4 d’avientu del 2026, coincidendo cola festividá de Santa Bárbara, patrona de la minería. Los rellatos premiaos y aquellos distinguíos con una mención especial van poder ser publicaos pola Fundación Juan Muñiz Zapico.
