El poeta Mario Obrero (Madrid, 2004), una de les voces moces más renomaes del panorama lliterariu peninsular, vuelve a visitar Asturies esta selmana. L’autor, amante declaráu del asturianu, caltién una rellación mui especial cola nuesa tierra, una conexón que nun dulda en reafirmar mesmo de pallabra que d’obra. L’exemplu más evidente d’esto ye’l so llibru Con e de curcuspín, una carta abierta d’amor la diversidá llingüística pa la que l’autor escoyó incluyir l’asturianu darréu nel propiu títulu. Esta obra va ser, xunto al poemariu Tiempos mágicos, ún de los pegollos centrales del alcuentru lliterariuç que va tener llugar la tarde del xueves 23 de xunetu a les 19.00 hores na Llibrería-café Kafka & Co d’Uviéu. Pa la ocasión, Obrero va cuntar con un mayestru de ceremonia d’altor como ye Roberto González-Quevedo.
Kaflka & Co: mecigayu cultural pa los tiempos d’anguaño
Kafka & Co ye una llibrería ubicada n’Uviéu, na zona del Campus d’El Milán, que combina los llibros nuevos y de segunda mano col envís d’ufrir una selección de títulos más amplia que les categoríes de novedaes, clásicos o recomendaos pola crítica. Amás, apuesten por una marca de papelería de diseñu propiu que se combina l’alta cultura coles referencies más Pop!, entemeciendo les personalidaes del mundu del arte con refranes, estribillos o frases populares nun mecigayu cultural únicu. La llibrería va xunida tamién a una propuesta hostelera que cunta con un espaciu onde s’organicen presentaciones, clubs de llectura, talleres d’escritura, talleres infantiles, cuntacuentos, recitales de poesía y saraos lliterarios varios.
