Ramón Lluís Bande fíxose col 32 Premiu ‘Máximo Fuertes Acevedo’ d’Ensayu
El cineasta y escritor xixonés Ramón Lluís Bande fíxose col 32 Premiu ‘Máximo Fuertes Acevedo’ d’Ensayu, gallardón que convoca la Conseyería de Cultura, Política Llingüística y…
El cineasta y escritor xixonés Ramón Lluís Bande fíxose col 32 Premiu ‘Máximo Fuertes Acevedo’ d’Ensayu, gallardón que convoca la Conseyería de Cultura, Política Llingüística y Deporte. L’autor llogró la reconocencia cola obra La mirada ordenada, un trabayu que presentó sol nomatu «El cineasta» y nel que desmiga nueve producciones cinematográfiques feches n’Asturies pa cavilgar sobre’l papel del séptimu arte como motor de recuperación de la memoria y reconstrucción de la identidá.
El xuráu decidió pola unanimidá de los sos miembros conceder el premiu a esta propuesta, que definieron como «valiente, creativa, orixinal y mui necesaria». Nel so fallu, destacaron la capacidá del testu pa trenzar la pasión y la mirada personal del cinéfilu cola esperiencia y la conocencia téunica d’un creador audiovisual profesional.
Nacíu en Xixón en 1972, Bande ye una de les figures referentes del denomináu Nuevu Cine Asturianu. La so trayectoria muévese dende va años ente la lliteratura, la televisión y el cine, con un llabor creativu dedicáu de manera especial a la hestoria y a la memoria democrática d’Asturies.
El tribunal d’esta edición tuvo presidíu por Antón García, director xeneral d’Acción Cultural y Normalización Llingüística, y contó cola participación de Darío de Dios Sanz, Claudia Elena Menéndez, María Fernández Abril, Jorge Arturo Sierra Álvarez ya Iris Díaz Trancho, ganadora del certame nel añu anterior. Con esti nuevu fallu, el Premiu ‘Máximo Fuertes Acevedo’ afita una vegada más la so posición de referencia na creación ensayística asturiana tres más de trés décades de percorríu.