Trabe asoleya «superpoderes», poemariu ganador del Premiu Asturies Xoven de poesía 2019

Ediciones Trabe ta acabante editar la última obra del escritor Miguel Rodríguez Monteavaro, el poemairu «superpoderes», que se fixo col Premiu Asturies Xoven de Poesía en 2019.

«La nuestra casa tien unes antípodes que nos posicionen de manera global. Nós yá tábemos equí muncho antes de nacer y, por supuestu, yá tábemos equí muncho antes de que naide nos imaxinara, pues la nuestra forma de pensar lleva sieglos petando nos pechos d’aquelles persones que queríen evolucionar y que nun se conformaben con tomar roles pasivos.

Rodríguez Monteavaro (Bual, 1990), como la xente colo que comparte vida, tien superpoderes, pero non d’esos que salen nos comics, sinón de los que van en minúscula, aquellos que mueven la sociedá hacia dalgo nuevo d’a poco y a poco. Qué más dará que l’Alministración corrupta nos quiera tumbar si nosotros somos firmes na nuestra ideoloxía? Qué más darán los problemes d’a diariu si la nuestra autoestima ye fuerte? Qué más dará la fuga de los años si estos tán bien aprovechaos?

Cada ciertu tiempu’l filu que nos xune al otru llau del mundu tembla y fainos enmudecer énte les turriaes que nos da la realidá. Esi ye’l momentu nel que normalmente facemos una pausa y nel que paramos a pensar en quién nos convertimos. Sicasí, nun suel facer falta ser un superhéroe pa salir airosu ente fama y fame: namás fai falta ser consciente de que cada pasu que vamos dando defínenos.

«superpoderes» ye un llibru que desafía les estructures tradicionales y que fai un llamamientu colectivu a sobrevivir sacando’l máximu partíu a la época que nos toca habitar. Identificáivos, entós, cola ruralidá posmoderna del autor y disfrutái de la llectura», Pedro Vedro.

Miguel Rodríguez Monteavaro (Bual, 1990) tien publicao los llibros Trenta razóis pra nun medrar (Trabe, 2010), Todos os tristes de mayo (Trabe, 2014) y Poemas pr’amantes y paquidermos (Trabe, 2015), toos trés escritos en gallego-asturianu.
Amás, tien ganao los siguientes premios lliterarios: XIX Premio Xeira de Naraciois Curtias (2009) pol relatu Amazonas, XIX Premiu de Poesía «Fernán Coronas» (2012) pol poemariu Tolos tristes de mayu (publicáu por Trabe en 2015), VI Premiu de Narraciones Curtias de Cangas del Narcea (2014) pol relatu Roma de moda y l’Asturias Xoven de Poesía (2019) pola presente obra.
Rodríguez Monteavaro compaxina’l so llabor como escritor col de músicu y trabaya como investigador y docente na Universidá d’Uviéu.