Trabe pon nes llibreríes «La xeometría secreta del azar», la novela nueva de José Ángel Gayol

La xeometría secreta del azar ye la segunda novela que publica José Ángel Gayol, una de les voces más interesantes de la lliteratura n’Asturies. Ediciones Trabe ta acabante ponela nes llibreríes.

Na novela Naldo Asur ye escritor asturianu que gana un premiu d’importancia con una obra que col tiempu se descubre que ye un plaxu. Tentando de matar el pasáu y entamar de nuevo, marcha pa Estocolmu a trabayar na embaxada española nesa ciudá. Ellí va ser quien a crear una vida nueva que, si lu alloña del pasáu más real vivíu n’Asturies, acércalu pasín a pasu y ensin ser a saber por qué a la simulación y la invención vital. Novela sobre la mentira y l’azar, l’autor indaga sobre lo real y lo irreal: ónde ta la verdá y qué ye la non verdá, qué ye la realidá y cómo vivir na islla que formen el silenciu y la mentira. Narración densa y metalliteraria lleese con gustu porque una mentira bien contada pue ser una guapa verdá. La mentira y l’azar (los dos pilares de la vida) son un sotambiu y un vacíu que puen matar, pero que tamién afalen a crear: como dicía Fernando Pessoa, el creador ye un finxidor «que llega a finxir que ye dolor / el dolor que siente dafechu».

José Ángel Gayol (Mieres del Camín, 1977), persona d’amplia formación y inquietúes variaes, ye escritor y críticu lliterariu. Poeta de voz propia (Con el velo de una sonrisa –castellanu–, 2006; Los poemes del oriental, 2013; El llibru de les coses misterioses, 2013; Los suaños y los díes, 2014; y Una selmana y otros díes, 2015), llogró sonar como ensayista amenu y arteru en Vértigu. L’atracción del abismu na sociedá contemporánea (2016), col qu’algamó’l Premiu «Máximo Fuertes Acevedo» d’Ensayu 2015; Exercicios d’asturianu (2016), recopilación de testos a mediu camín ente l’artículu lliterariu y d’opinión, y l’espléndidu y novedosu El silenciu invisible (2020), Premiu «Máximo Fuertes Acevedo» d’Ensayu 2019. Avezáu escritor con alma d’ensayista, tien escritu’l diariu En primera persona (2019), nel que s’amuesa como agudu observador y rexistrador de la realidá al empar qu’indagador de la verdá. Como narrador diose a conocer cola guapa novela Argonautes (2007) y en 2011 publicó la so primer (y única dica güei) incursión nos testos teatrales: Ensin noticies del fin del mundu. Anguaño colabora col diariu La Nueva España como reseñista de llibros n’asturianu.