«Amenorgando’l tiempu», d’Andrés Astur Treceño García

Dende va meses
tarrezo patria, bandera
y pisu nel centru
-75 m², dos cuartos, too esterior-,
nun creo que m’atopes pela escuridá
que tanto esfrutaba y agora refugo.

Dende va selmanes
que paecen segundos,
nun m’afuego en persones
nin recuerdos,
nun apuesto a ciegues na vida.
Nunca más.

Dende va tiempu,
tengo la zuna d’aldovinar
el futuru
coles tos manes
y a palpu,
que ye como meyor sé vivite.