Chema Fonsagra faise col Premiu Pepe Campo de monólogu n’asturianu 2023

El xuráu del Premiu «Pepe Campo» de monólogu n’asturianu, na so edición XVIII, aconceyó esti vienres 19 de mayu nel llar de los Humanitarios de Morea pa determinar el resultáu de la convocatoria del 2023.

El xuráu d’esti concursu convocáu pola Sociedá Humanitarios de Samartín tuvo conformáu esti añu pol miembru de l’Academia de la Llingua Asturiana, Pablo Xuan Manzano, l’escritor Ánxel Álvarez Llano, Octavio Trapiella, como representante de los Humanitarios y el ganador de la edición cabera, Inaciu Galán, decidiendo por unanimidá da-y el premiu al testu «Cuernos», que resultó ser de José María Montes Presa, conocíu mononloguista embaxo l’alcuñu de Chema Fonsagra.

José María Montes Presa, ‘Chema Fonsagra’ (Bendición, Siero, 1952) ye monologuista, miembru d’AICA y autor del llibru de monólogos ‘Como ye la vida’ y les noveles ‘La clave taba en Mali’ y ‘El neñu secuestráu’.