Preséntase en Xixón el volume ‘Estudios (II)’ de Xuan Xosé Sánchez Vicente

El llunes 27 de payares va presentase nel Antiguu Institutu de Xixón el llibru ‘Estudios (II)’, escritu por Xuan Xosé Sánchez Vicente y publicáu por Ediciones Trabe. Los y les asistentes van poder llevar pa casa un exemplar del llibru.

Estudios (II) ye’l segundu volume nel que l’autor recueye tola so producción al rodiu la lliteratura, la llingua y la identidá asturianes, espardíos per llibros colectivos y revistes especializaes. Formáu por 15 artículos distintos, esti llibru amuesa una vez más el conocimientu que Xuan Xosé Sánchez Vicente tien d’estos temes y la manera didáctica y entretenida d’esponelos.

Xuan Xosé Sánchez Vicente (Xixón, 1949) ye un nome imprescindible na cultura asturiana d’anguaño. Conocedor como poca xente de la llingua de nós, tien publicaos el Diccionariu asturianu-castellanu (2020) y el Diccionariu castellanu-asturianu (2021), que nun son otro que’l resultáu del desdoble del Diccionariu asturianu-castellanu, castellanu-asturianu (1996), que marcó l’aniciu d’un tiempu distintu, y meyor, pa la llingua asturiana y que foi referencia obligada pa toa persona qu’a ella quixera averase. Políticu asturianista, poeta, narrador, creador de testos teatrales y articulista certeru y acedu, la so pasión pola lliteratura asturiana dio frutu nos llibros Les producciones clasicistes d’Antón de Marirreguera. Un ensayu de métodos creativos, estética lliteraria y ideoloxía del discursu críticu sobre la nuestra lliteratura (2004), Antoloxía de la poesía del sieglu XIX (2007) y Dos muyeres escritores y otros ensayos (2007). Pero l’interés pola nuestra lliteratura nun ye d’anguaño, yá en 1979 fixera una reedición de l’antoloxía de Caveda, titulada Esvilla de poesíes na nuesa llingua y en 1991 asoleyara Crónica del Surdimientu (1975-1990), detallada historia crítica de la, daquella, reciente creación asturiana.