La Comisión de Fiestes de Collera Convoca’l IV Concursu de Rellatos Curtios
La Comisión de Fiestes de Collera llanza esti concursu de rellatos curtios col oxetivu d’atopar talentos nuevos pente la población mayor de 7 años que tenga…
La Comisión de Fiestes de Collera llanza esti concursu de rellatos curtios col oxetivu d’atopar talentos nuevos pente la población mayor de 7 años que tenga interés na escritura. El IV Concursu de Rellatos Curtios tien el sotítulu «Oriente d’Asturies, los sos ríos y sableres», siendo esa la temática central a la que van acoyese los y les participantes: narraciones que reflexen o reflexonen sobre lo qu’asocede nesos espacios tan prestosos que son xoyes naturales de la zona.
Participación
Les obres, escrites en castellanu o n’asturianu, van presentase en formatu PDF, tamañu de fueya DIN A4 y con lletra Arial, tamañu 12 pt. y ensin espacios. La estensión deberá ser d’ente 2 y 5 folios, inclusive (sacantes quienes participen al traviés d’un centru educativu, almitiéndose nesi casu manuscritos y estensión menor – a consultar según el cursu).
El documentu que se presente va contener el títulu del rellatu, ensin nengún datu que permita la identificación de l’autoría (nome o firma reconocibles). Los rellatos van unviase per corréu electrónicu a la dirección comision.collera@gmail.com col asuntu: «Concurso de Relatos Cortos Oriente de Asturias, sus ríos y playas»
El plazu para unviar los testos va tar abiertu dende’l día 1 de xineru de 2026 hasta’l 28 de febreru de 2026, dambos incluyíos. La participación ta llimitada a una obra por persona, que tien que ser inédita, orixinal y non premiada n’otros concursos. Pa participar ye necesario completar la ficha d’inscripción colos datos personales, ficha que pue solicitase nel corréu electrónicu comision.collera@gmail.com
Valoración, xuráu y premios
El xuráu va tener en cuenta los siguientes criterios:
● La conexón del testu col tema propuestu.
● La orixinalidá y creatividá.
● L’estilu y la calidá lliteraria.
● La corrección llingüística.
Va haber un solu testu ganador en caúna de les siguientes categoríes:
● Categoría 1. Alumnáu de 3u y 4u de primaria.
● Categoría 2. Alumnáu de 5u y 6u de primaria.
● Categoría 3. Alumnáu de 1u y 2u de E.S.O.
● Categoría 4. Alumnáu de 3u, 4u de E.S.O y 1u de Bachiller.
● Categoría 5. A partir de los 18 años (nesta categoría entra tamién l’alumnáu de 2u de Bachiller).
El rellatu que resulte ganador na categoría 1 va recibir un premiu de 50€.
Categoría 2: 55€. Categoría 3: 60€. Categoría 5: 65€. Y categoría 5: 95€.
Sicasí, alviértese que’l xuráu podrá dexar ermu dalgún de los premios en casu de nun algamase la calidá suficiente nos trabayos presentaos a la categoría correspondiente.
La comisión fadrá públicos los resultaos del concursu al traviés de les redes sociales de la comisión (Facebook y Instagram) en cuantes el xuráu falle los distintos premios y la entrega de premios va tener llugar el día 28 de marzu de 2026 nun actu presencial nes escueles vieyes de Collera.
