La XXXIX edición de la Selmana Negra de Xixón va celebrase del 3 al 12 de xunetu nel paséu de la sablera del Arbeyal, un nuevu espaciu que va acoyer alredor de 180 actividaes y va cuntar cola participación de más de 180 autores nel programa. distribuyíes en tres carpes que van ufrir actividaes pa tolos gustos mientres más de cinco hores diaries. Arriendes de les carpes oficiales onde se desenvuelva’l gruesu de la programación oficial, el festival va cuntar cola tradicional feria del llibru, mercadín, noria y otres atracciones de feria que, xunto a los puestos de venta de comida y bebida, completen una ufierta qu’atropa cultura y fiesta como sólo la Selmana Negra sabe facer.
El programa: lliteratura, cine, fotografía, música y ambiente folixeru
El director Miguel Barrero desplicó na presentación d’esti xueves 2 de xunetu que’l cambiu d’ubicación implica «facer de la necesidá, virtú» y «dar un saltu» nel so plantegamientu, col retu d’adaptase al nuevu espaciu.
Barrero puntualizó que’l programa, publicáu esti xueves na web del festival siguió incorporando novedaes hasta los últimos díes y que la inauguración d’esti vienres 3 va cuntar cola presencia del fundador de la Selmana Negra, Paco Ignacio Taibo II, que va tar presentando obra propio, amás d’otres sorpreses que nun quixo desvelar.
La sección llibrera va incluyir editoriales de la tierra como son Trabe, Hoja de Lata, Pez de Plata o Cuatro Gotes, amás de llibreríes como La Revoltosa, La Buena Letra o Matadero Uno, ente delles otres. No que cinca a la programación lliteraria oficial del festival, caltiénse un equilibriu ente los autores habituales del festival y les incorporaciones nueves.
El programa completu puede consultase equí.
L’Arbeyal: espaciu nuevu y ambiente de sablera
La Selmana Negra ye un fitu cultural de la ciudá de Xixón que yá lleva 39 años confirmándose como tal. Los cambios d’ubicación que foi sufriendo implicaron ciertes modificaciones nel festival, eso ye nidio, pero l’espíritu caltiénse. Esti últimu treslladu al paséu de la sablera de L’Arbeyal supón un retu pa toles partes implicaes: organización, participantes y instituciones polítiques a nivel llocal y autonómicu. El programa caltién el puxu d’otros años y l’espaciu abulta atractivu abondo, pero habrá que ver cómo se desenvuelve esta edición y qué rempuesta da’l públicu, qu’a la fin ye quien tien la última pallabra.
