María José Hevia Velasco: «la vocación de marín mercante taba llatente y un día salió en forma d’escritura»

María José Hevia Velasco (Villaviciosa, 1970) ye percusionista, marina mercante, investigadora y escritora. De bien neña empecipió a tocar el tambor, formó dúu col so hermanu José Ángel a la gaita y dambos percorrieron el mundu cola so música. Llicenciada na Escuela de Náutica de Xixón, pentemedies tamién navegó en petroleros hasta algamar el grau de Pilotu de la Marina Mercante primero de dexar la mar pa dedicase profesionalmente a la música y atender otres vocaciones. Hevia ye investigadora del traxe tradicional de Cabranes, llabor que-y mereció delles distinciones. Foi finalista del premiu lliterariu de temática náutica Nostromo y cuenta con una riestra de premios en reconocimientu al so llabor pa col patrimoniu asturianu, mesmo nel planu musical que como etnógrafa, ente los que destaquen el primer premiu nos Rencontres Internationales de Luthiers et Maîtres Sonneurs de Saint Chartier, Francia; La Zampogna è donna en Scapoli, Italia; o el Premio Grano de oro y el Premio Memorial Joaquín Lloris de Cultura Asturiana en Cabranes, ente otros. En 2025 foi reconocida col premiu Urogallo Especial del Centru Asturianu de Madrid.

La ronda de presentaciones de la novela Nun horru al debalu inclúi, pel momentu, les siguientes cites:

Sábadu 29 d’agostu – 14:00 h na Feria del Llibru de Ribeseya (Plaza Nueva)

Sábadu 3 d’ochobre – 18:00 h en Villaviciosa (solhorru de la Casa los Hevia)

Miércoles 14 d’ochobre – 19:00 h n’Uviéu (Llibrería Cervantes)

Entrevistamos a María José Hevia Velasco al rodiu de la publicación de la so primer novela, Nun horru al debalu, editada por Cuatro Gotes Ediciones.

ENTRUGA- Acabes de publicar la to primer obra lliteraria. ¿Cómo foi’l procesu?

REMPUESTA- Ye la primer obra que publico y la primera qu’escribo n’asturianu pero nun ye la primera qu’escribo. En pandemia busqué un trabayu que me permitiera formar parte d’un gremiu de los consideraos indispensables pa poder viaxar anque fuera cerca casa. Repartir cartes pel conceyu Piloña resultó de lo más inspirador. El contactu cola xente de los pueblos llevóme a escribir n’asturianu, como nun podía ser d’otra manera.

E- ¿D’ónde sal la idea y cómo decides desarrollala en forma de novela?

R- Tolos díes llegaba a casa contando les coses que me pasaben per Piloña, lo que me prestaba falar colos vieyos qu’atopaba, la rabia que me daba ver les cases en ruines. Un día llegué a una quintana y vi un horru mui guapu. A los pocos díes llegué y taba esbarrumbáu. Aquel día falé col horru que yá nun taba, púnxeme a dar vueltes alredor y aquello diome pa facer una historia na que descargué esi pesar. Yá tenía delles anécdotes de les que m’apetecía escribir pero convertí la vieya panera de mio casa nuna balsa salvavides al debalu, pue que pa ver si mos salvávamos del desastre nel que tábamos metíos. Entós fueron asomando personaxes que nin yo sabía que diben apaecer. Nel rellatu de los náufragos atopé’l filu conductor pa tola novela y disfruté muncho escribiendo esa parte na que tornaba a navegar.

E- ¿Hai dalgún aspectu de la to esperiencia como artista musical qu’haya influyío na escritura d’esta novela?

R- Cuando repartía les notificaciones llevaba una carpeta na que tocaba hasta ritmos de vaqueires como nun panderu cuadráu. Y la percusión ta presente en forma d’onomatopeyes como nel capítulu L’Ausente: «El bolígrafu tácata… la piedra ras ris ras… tácata… rasrisras…»

E- Non tan conocíu como la to faceta musical ye’l to compromisu como investigadora etnográfica. ¿Qué hai nesti llibru del to llabor como collaboradora coles muyeres del conceyu de Cabranes na recuperación del traxe tradicional como patrimoniu inmaterial?

R- Yá pasáu un añu del primer confinamientu, celebramos la fiesta del pueblu ensin facer na más que la misa, por aquello de que la última restricción llevantábase al día siguiente. Nel capítulu Nuna ilesia al debalu algunes muyeres vamos vestíes col traxe de Cabranes. Durante’l confinamientu, a taller paráu, traficamos con abalorios, con filos y teles y daba explicaciones por videu, llueu pudimos volver a xuntamos pa siguir cosiendo, asina que yera inevitable que saliera’ e’l traxe nel llibru.

E- Yes una persona polifacética, mui conocida pola to carrera musical, anque poca xente sabe qu’amás fuisti cartera una temporada (esta etapa ye central na obra) pero resulta que tamién yes pilotu de la marina mercante. Cuéntanos un poco cómo te dio por embarcate y cómo foi la to esperiencia navegando mundu alantre.

R- Siempres supe que nun podría tar trabayando tres d’un escritoriu. El tíu d’una amiga mía, que yera marín mercante, siempre-y unviaba postales dende puertos llonxanos. Recuerdo que, de ñeños, lleváronmos al Musel pa dir a visitalu. Aquello de los barcos paecíame a mi de lo más emocionante. Y yo qu’estudiaba nun colexu monxes resultaba una alumna peculiar porque participaba en carreres de ciclista, tocaba’l tambor y decía-yos que quería ser capitán de submarín. Tenía muncha vocación y gustábame’l trabayu nos barcos. Llueu dime cuenta que trabayando en petroleros casi nun pisabes puertu, trabayabes ininterrumpidamente durante meses y la convivencia nun yera fácil, pero la experiencia marcóme y foi enriquecedora.

E- Tuvisti a puntu de ganar el premiu Nostromo de lliteratura náutica en Barcelona. ¿Hai dalgo d’aquella hestoria na novela que presentes agora?

R- Con El mar de las almas perdidas, una novela de inspiración náutica con toques oníricos, quedé primera finalista nel prestixosu concursu que convoca la Editorial Juventud y el Museu Marítimu de Barcelona. Yera la segunda novela qu’escribía y gustaríame publicala anque yá va tantos años d’aquello. Hai que tener en cuenta que dexé de navegar mui pronto. Cambié los barcos polos conciertos. Embarquéme nuna xira, la del mio hermanu con Tierra de Nadie que me llevó por otros derroteros y con mui bonos momentos que me ficieron olvidar la mar una temporada. Pero la vocación de marín mercante taba latente y un día salió en forma d’escritura. Podía volver a navegar cuando yo quisiera. Y como l’escritor tien el poder, podía facer colos personaxes lo que me daba la gana y, a vegaes, hasta vengame. Asina ye que cuando entamé la historia de Nun horru al debalu la mar tornó de sópitu anque yo caleyaba per Piloña, que ye un conceyu d’interior, porque na época de l’andanciu el mundu que conociéramos taba faciendo agua y el presente taba baraxáu col pasáu.

E- ¿Hai dalgo de la to etapa na mar qu’haya entrao d’una forma o otra a formar parte d’esta novela?

R- Sobre too persones coles que navegué, que de siempres los vi como bonos personaxes lliterarios… un capitán, un xefe máquines… y obviamente la comparación d’horru con un barcu en términos naúticos. Foi mui prestoso aplicar la construcción naval a una panera. Ye un pequeñu homenaxe a los horros, polo menos ún que nun esbarrumbare y que ficiera de salvavides… durante dellos capítulos. Anque habrá que ver lo que, finalmente, pasa cola panera.

E- Ente los personaxes de la hestoria tán incluyíes les sobrines de la protagonista (¿y les de l’autora?), que funcionen como receptores de la narración que ye’l gruesu de la novela. ¿Por qué esta decisión d’estructurar la novela asina?

R- Ye llóxico qu’elles seyan les receptores de les hestories d’una xeneración anterior. Na novela, cuando-yos cuento eses aventures, yo soi mui vieya y cuento batallines como tolos vieyos. Nun me conformaba namás con narrar pa un llector anónimu, por eso el llector notará cierta familiaridá con dellos personaxes anque nun los conozca. Y cuénto-yoslo de dos maneres diferentes. Nuna parte narro les hestories poniendo voz a los náufragos, talamente como yo lo viviera, dando la sensación de que va poco que pasó; cuando nun tán los náufragos la historia, yá más llinial, pasa a un pasáu más remotu.

E- Ye evidente qu’hai muncho de verdá entemecida cola ficción y de xuru que tienes hestories abondo que nun incluyisti. Nótase tamién el precuru y el respetu col que trates toles cuestiones trataes na novela. ¿Hai dalguna anécdota real que duldares si incluyir o non? ¿Por qué motivu?

R- La hestoria ta narrada dende lo absurdo que ye tar al debalu nun horru en metanes la mar y a partir d’ehí yá me permito’l lluxu d’esaxerar… o non. Ye verdá qu’un xefe máquines me cerró varies puertes con Loctite, nun ye verdá que navegara nun horru al debalu, pero a vegaes sentía qu’el mundu taba fundiéndose viendo los horros y les cases que tantu trabayu y esfuerzu costó llevantar, esbarrumbaos o tiraos, que ye peor. Procuré mantener l’anonimatu inventando, a vegaes, los topónimos por respetu a les persones que protagonicen les aventures piquiñines. Hai anécdotes reales que podrían tar pero que sirvieron d’inspiración pa otros rellatos que nun tán publicaos.

E- Les aventures piquiñines que van encadarmando esta obra son, amás de material lliterariu, fonte de conocimientu y rexistru. Nesi sentíu la novela tien vocación tamién de cápsula de la memoria pa quienes vengan nel futuru, rexistrando fechos, costumes y vezos d’una dómina que ta llegando a la fin. ¿Qué puedes contanos d’esti aspectu documental de la novela?

R- Los de la mio xeneración, la del 70, que tuvimos güelos nos pueblos, tuvimos la suerte de conocer a una xente que, vista agora, podríamos considerar ancestrales, xente d’una época mui remota y sobre too xente auténtico que trabayaben la tierra qu’heredaben o yos costaba arrendar, arreglaben les cases y daben importancia a la llealtá, a la pallabra, en suma, al respetu. Repartiendo cartes per Piloña tuve la oportunidá de conectar con xente que, ye duro dicilo, pero ta n’extinción, asina como les sos cases nes que yá nun va vivir xente como ellos, y los horros a los que nun se-yos atopa un fin que mereza una inversión por parte de la xente nuevo.

E- ¿Tas trabayando en dalgo nuevo? ¿Hai dalgún otru proyectu lliterariu en procesu del que puedas falanos?

R- Toi tratando d’escribir una novela negra. Y púnxeme como retu nun escribir de barcos, anunque dalgún aparecerá.

María José Hevia Velasco recomienda… (Ensin esplicaciones)

Llibru: Les inquietudes de Shanti Andía, Pío Baroja.

Película: Capitanes Intrépidos, de Víctor Fleming, 1937.

Discu: HEVIA de títulu HEVIA, 1991.

Comida: cebolles rellenes.

Llugar nel mundu: Llatitú  43º, 31’ N  ; Llonxitú  5º 23’  W (Nun queda lloñe).