La Feria del Llibru de Ribeseya toma la Plaza Nueva los díes 29 y 30 d’agostu
La Feria del Llibru de Ribeseya, que se celebra la última fin de selmana del mes d’agostu, ye una cita cultural dedicada a fomentar la llectura…
La Feria del Llibru de Ribeseya, que se celebra la última fin de selmana del mes d’agostu, ye una cita cultural dedicada a fomentar la llectura y averar el mundu del llibru a vecines y visitantes. Como ye costume nesti tipu d’eventos, llibreríes y editoriales instalen les sos casetes, ufiertando una selección de novedaes editoriales, lliteratura infantil y xuvenil, narrativa y publicaciones d’interés llocal.
La feria complétase con presentaciones de llibros, alcuentros con autores, firmes d’exemplares y actividaes pa tolos públicos, convirtiéndose nun puntu d’alcuentru ente llectores, escritores y profesionales del sector editorial.
L’horariu d’apertura de los stands va ser de 11:30 a 15:00 y de 17:00 a 21:00 hores el sábadu y hasta les 20:00 h el domingu. Les actividaes van tener llugar na Plaza Nueva de Ribeseya.
Programación
El programa completu va incluyíu nel cartel y dende Formientu queremos aprovechar pa felicitar a la organización pola so atención pa col asturianu. Nesta edición la presencia de la nuesa llingua ye bien granible, como puede comprobase, yá qu’ocupa la metá del programa y inclúi les siguientes presentaciones:
Sábadu 29:
- 12:00 h ¿Bable o asturiano? El surdimientu del glotónimu bable y la so implantación frente a asturiano (Cuatro Gotes, 2026). La obra del profesor Xuan Carlos Busto Cortina ye un ensayu que respuende definitivamente a la entruga sobre por qué a la nuesa llingua se la llama como se la llama; entruga que, anque paeza mentira, sigue siendo motivu de debate y engarradiella.
- 13:00 h – Retina (Cuatro Gotes, 2026). La última entrega de poesía esperimental d’Aníbal González Rodríguez ufre una esperiencia espandida que trescala’l papel y convida a les llectores a poner les gafes del autor pa ver el mundu al traviés de los sos güeyos.
- 14:00 h – Nun horru al debalu (Cuatro Gotes, 2026). La primer novela qu’espubliza María José Hevia Velasco y que da cuenta de lo polifacética que ye l’autora, combinando toles sos pasiones nuna hestoria qu’axunta surrealismu y autoficción.
- 18:00 h – Bruxa y Gatu (Pintar-Pintar, 2026). El segundu álbum de Pablo Fraile Dorado y Antonio Acebal protagonizáu por Gorgona. La nueva hestoria recupera’l ritmu oral, la escoba que fala, los espectros burllones y el xuegu ente mieu y humor, pero cambia’l centru de la busca: Gorgona yá nun busca un oxetu, sinón un ser al que quier.
Domingu 30:
- 13:00 h – Les Farturrutes II (Delallama, 2026) de David Castañón ye la nueva entrega en papel de la renomada esbilla de rutes y fartures que presenta’l coordinador del proyectu Les fartures (web, radio). Pasiar, descubrir llugares nuevos y depués… ¡fartar! ¿Qué más puede pidise?
- 14:00 h – Subpayaria (Trabe, 2026), la obra cola que Xandru Martino algamó’l Premiu «Pachín de Melás» de Testos Teatrales 2024. Una comedia d’enriedu que presenta una crítica social al grandonismu asturianu, amás d’a otros grandonismos non menos tóxicos.
