«Sobrante d’un foriatu recortable» de Milio Ureta (Escena 8ª)

OCTAVA ESCENA DE SOBRANTE D’UN FORIATU RECORTABLE

Bienllegaos y bienllegaes a la penúltima entrega d’esta collaboración cola editorial Impronta y l’autor Milio Ureta.

Güei ufrimos una de les escenes que, según el propiu autor, ye «Un testu difícil d’articular [na vida y no dramático] que xustifica más que nengún otru na obra, la temporalidá y historicidá implícita en títulu orixinal d’esti premiu Pachín [de Melás]». Volvemos a saltar dos escenes pa metenos dafechu coles esmoliciones de MARISELA, un personaxe complexu y poliédricu «con un mecigayu identitariu, revesosu y pernidiu al mesmu tiempu, que ta [sobre too] yá CANSA. Esmolecida. Galdida. Derrengada. Y que sabe más d’identidaes que tolos indepes xuntos y tolos españolistes xuntos y tolos fachas d’un y otru llau.»

Esperamos qu’esfrutéis d’esta escena qu’ufrimos güei y convidámosvos a andar sollertes pa la entrega cabera d’esta collaboración, que podréis ver a metá d’esti mes de setiembre. Mentanto, dexámosvos con MARISELA, cola so incorrección irreductible, a ver qué vos paez.

Saludu.

IDENTIDAES ASESINES Y NON TANTO

Antru del Raval barcelonés, quiciabes na cai Robadors na Bata de Boatiné, quiciabes na discoteca Metro, llendando col Eixample. Altes hores de la madrugada. Equí, como en too, ye sabío que la realidá va siempre enantes de la llei y que la llei allega siempre tres del suxetu… Falten años pa la normalización de los conceptos de la heteronormatividá, de los homes y muyeres CIS, del xéneru fluyío y del non binarismu. Falten años pa la firida etenra del atentáu yihadista de Les Rambles. Falten años pa la sutura, n’otres firíes tamién etenres, de la Llei Trans. Y pa los feminismos a la contra y a favor de la Q del movimientu queer. Esta nueche MARISELA y UN FORIATU RECORTABLE beben xunta una barra menor nun llocal cuasi vacíu, y falen y filosofen mui pasada la nueche. Ella muévese amodo [pausada y grave y elegante] en cada frase que diz, y en cada pensamientu; en cada atalantar. Ye llúcida y afectada. Él, por embargu, paez tar más adormiláu que despiertu.

MARISELA

Val Nun ye’l nome que pon el mio DNI Pero ye’l mio nome. O qué. Tamién el mio DNI pon que ñací nun pueblín en Bierzu y a min nun me sal del ratu haber ñacío ellí. Digo yo. Asina de fácil. Asina. D’aende qu’invente que ñací en Marsella. Je suis née à Marseille Si tu préfères… D’aende qu’invente que mios padres yeren artesanos del cueru Que facíen sandalies Corexes Bolsos Monederos. Y que cuando yo tenía nueve años vinimos pa equí. Pa Barcelona. Y yo tan contenta quedo asina Cola mio vida nueva. ¿Visti?Les lleis polo xeneral van per detrás de la vida Amor. Y asina va’l mio documentu d’identidá Mui per detrás de la mio vida. Ye que l’asuntu de la identidá yelo too y a la vez nun ye nada. La vida ye una inacabable performance. La identidá ye performativa Per això. Tu dirás ¿Qué coh.ona me ta cuntando esta Lloca’l Rinconín? (Rise pa sigo). Pues eso Que yes lo que faes cada día. Nin más nin menos. Si yes un paisanu casáu cola to muyer y dempués de trenta años xuntos Que ye too una aburrición… Hum Un mal día date por cutia-y la badana a ella… Yá nun yes el maríu d’esa muyer. Yes un maltratador. Asina ye y asina val pa con too. Si mates Yes un asesín. Si robes Yes un lladrón. Si vas de putes Yes un puteru. Y si faes mariconaes Yes un maricón Como’l restu. Y lo que nun fagas Pues nun lo yes. Puntu.

MARISELA bebe un tragu llargu.

Puah. Qué ascu de RedBull. Esto ye un ricinu de güela con toles lletres… Pero ye que Si non tengo de me poner de farla y paso. Paso paso paso. Que ye mui caro. Y nin perres nin ánima teo yo yá que lo aguante. Ai qu’equí nun se pue fumar. ¿Vienes a lo escuro a echar un pitu? ¿O tampoco fumes?

MARISELA cai na cuenta qu’UN FORIATU RECORTABLE mira pa un grupín de xente que va mui pasao. Fala entós nun tonu confidente.

Éstes van de post-porno y son lo peor eh. Unes asurdes toes… ¿El post-porno? Si te cuento lo que-yos teo yo visto metese por ún y otru [y otru] furacu’l cuerpu a toes estes Agomíteste enteru. Y consumiéndolo too, eh. Eso sí. Cristal Speed MDMA. Farla Keta María. Costu. ¿Poppers? Home. Manín. Poppers almuércenlo como l’Actimel A diario N’esconsonando (rise de la so gracia). En fin Que nun me paecen mui del to rollu. Nin pa ti… ¿Asina que yes alarmador? Nun sabía nin qu’eso esistiere. Nin que lo ficiere naide. Orixinal yelo.  ¿Y a qué hora te toca entrar Nenu? Podíes venir a mio casa y descansar un peazu. (Otra vez confidente) Oi Que si nun ta de Dios tocase nun mos tocamos eh. Ensin problema. Y yá dempués alarmes. Por mui tresgresora que me veas Soi una clásica y una romántica. Y tu yes un bizcochín. Nun hai más que vete. Pero Claro Vante los paisanos. Como a min. Qué penuca.

Silenciu.

¡Hola! ¿Tas ehí? O duermes. Mira Taba alcordándome… Hai un llibru fantásticu que lleí va poco qu’a lo meyor a ti que tas estudiando interesaríate. Y qu’a min paezme que pa ser bien Hebía ser obligatorio lleelu na Secundaria [o en Bachilleratu a lo menos] pa tola mocedá. Llámase… Eeeh… Pera que m’alcuerdo… Sí Identidaes Asesines. Identidaes Asesines… ¿Suénate? Suena a terroristísimu Pero en principiu namái tenta d’esclariar tol fenómenu del odiu en mundiu. Ye d’un autor llibanés Y ye brutal brutal. Y bono Esi señor diz [nun m’alcuerdo agora del nome] Diz [y yo sé que ye cierto porque yo vívolo cada nueche] que la identidá de caún de nós ye namás un constructu[palabru palabru] O seya una creación de caúna de nós… (Cuesta-y un pocu esplicalo y ralentiza’l discursu pa nun equivocase) Fecha a partir daquello d’una mesma que… Identificándote… Ta [De tolo que tu yes] más en peligru y más amenazao pola sociedá na que vives. Más amenazao que nenguna otra cosa [De tolo que tu yes].

Por exemplu Col casu los maricones o les bolleres. O les travestis. O les trans. Llégate un facha como foi mio padre y dizte que nun entiende por qué hai que tolerar el pasucais del Arguyu O que nun entiende por qué mos pasamos la vida enarguyecíos de ser maraxes y transilvanes Y blablablablá… Y que tolo nuestro había quedar amatagao too ente cuatro paredes y dar gracies. Hum. Pues eso Dende’l momentu xustu qu’eso tas sintiéndolo la primer vez na to casa Dende que te cuenten per primera vegada que ye una puta vergoña ser asina… Eso Xenera Una defensa íntima de la to identidá que Va facer D’ello A partir d’esi momentu D’esa condición sexual atacada de to… [Y ¡cuidáu! D’esa condición homoafectiva] La To Primer Bandera Identitaria… ¿Pescáncieslo? (Vien-y el Red Bull a la boca) Ai. Hospa Perdón… Que me vieno’l Red Bull… (Busca cola mirada al CAMARERU que nun ta).Esti mazcayu nunca ta… (Y alienda profundo. Y sigue cola rocada).

Otru exemplu. Col asuntu catalán [Y equí yo allúgome fuera pero entiéndolos de sobres]. Tou esti Rrrrollu del independentismu i los països catalans… ¿Por qué? ¿Por qué ye A ver? Porque dende que-yos valtaron l’estatutu autonomía siéntense toos cero españoles Y la so identidá atacada ye milenta por cien la de ser Primero de too Catalanes. Porque ye [precisamente] la catalanidá que mamaron lo que más-yos critiquen dende Madrid los peperismos más radicales. Perdona Vaya brasa te toi dando.

Silenciu.

Nun sé. Yo ye que dempués de lleer esi llibru Yá la mio identidá marica pasé a entendela d’una manera nueva dafechu. Como si fore namás un quesín nuna caxa quesinos en porciones. O seya como que Tu tas fechu de munches identidades que te componen Pero yes sobre too aquella de la to caxa de quesinos que la sociedá quiera arrampuñate O comete. O seya Qu’al final Tu vas ser [sobre too] aquel quesín que más amenazáu tea pola sociedá. Y Sisí. D’ehí p’alantre de cara a la galería tu vas ser más que nengún otru esi quesucu númberu doce [bono nun sé si son diez o doce los quesinos que vienen por caxa]. Pero Llueu [pa ti Na to casa] Cuando tas col camisetu vieyu de dormir y tol espelurcie Tu yes amás del quesu amenazáu tolos otros quesinos. ¿Nun ta inxenioso?

Silenciu.

Pues yo tengo amigues que s’empeñen en ser tol día namái’l quesín doce Y yo dígo-yos que yo non Que yo toi refalfiada [toi Refastiada] del putu quesu amenazáu. Fartuca yá d’abanderar Cada día En cuanto abro’l güeyu La causa arcuiris. Ta’l ratu de la bandera colorinos Yá. Yo cansé. Cansé. Cansé yá Fíu. ¿Cómo ye Ho? Por tener puesto pechu Va Catorce Quince años ¿Toi obligada agora a tar na llínia fueu tola vida?  Punxi pechu Pal home y pol home que quería naquel momentu. Púnxilu pa saca-y Perres cuando nun les tuvi Y tamién Pa salvame la vida Básicamente Sí. ¿Y agora teo de seguir dando batalla tol día? ¿Que si soi Muyer? A ti qué coh.ona más te da. Yo soi una Señora. Y non Nun soi un poema Yo. Yo soi Poesía. Poesía. Con pé alta. Un versu y otru versu y otru versu soi. Yo soi dalgo que nun tien tovía palabres coles que dicise. Yo tresciendo la lliteralidá de la gramática y la de les palabres vuestres. Y la de la mesma Bioloxía. Un Oxímoron Soi Yo.

La pena ye qu’occidente nun ta preparáu pa min.

Nun ta preparáu pa Nós.

…

¿¡MUYER!? Que me dexéis. Que toi farta. Muyer que lo seyan la Santa Juana y la Bibiana Fernanda Y la novia canaria de Nina la Zerola. ¡MUYER! ¿Tu sabes lo que cuesta una operación d’eses d’equí embaxo? Yo yá lo digo Muyer La que tenga Perres Y tiempu Y esperances. Y GANES Cuidáu. Yo soi Una Señora. A min que me dexen tranquila. Tran Qui La. Si pue ser. (Bebe)

Si pue. Ser.

MARISELA bebe un tragu llargu y queda en silenciu, de pies xunta UN FORIATU RECORTABLE, apoyada na barra.

¡AMIN MAALOUF!Alcordéme agora colo de la identidá. Ési yera. Ési yera’l llibanés qu’escribió too eso. Bonísimu. Lo de los quesos ye mío Per això. (Al camareru qu’apaez un segundu) ¡Ai Guapu! ¿Pónesme dos piedres de xelu Por favor? (A UN FORIATU RECORTABLE, en voz baxa y a propósitu’l camareru, nun mou conclusivu) Esti maizu con pates nun pue ser más sosu.

Fasta que nun vuelve’l camareru, MARISELA queda clisada col brazu’l vasu espurríu, mirando pa un puntu perdíu delantre d’ella, y col rucurrucu del quesín doce na tiesta. Ta asina fasta que-y ponen el xelu en vasu y vuelve activase.

Gracies. (A UN FORIATU RECORTABLE) Lo que te dicía. Tol día maricón ye cansadísimo. ¿Nun ye cansadísimo? Mira tu. Pues tu sedrás de pueblu y sedrás maraxa. Pero tamién sedrás Alarmador de ZARA. O sedrás de la xeneración de los setenta. O de los que vieren el Mundial col Naranjito. O yo qué sé. Lo que seyas tu. Vaya. O yo sedré transexual O non si nun me tarazo’l cuerpu y lu dexo enteru vivir. Val. Acéptolo. Pero que soi más coses Ho. Soi llionesa. Soi culé [por Stoichkov]. Budista perdida. Soi fan de Bambino Que nun lu hebo igual. Y sedré munches más coses a la qu’escarbe un pocu ¿Pero a la fin qué bandera allevanto? La transiberiana. ¿Que me toca’l ratu? Sí Tócamelu muncho porque soi tamién tolo otro. ¿Y entós que por qué allevanto ésta? Pues pola pinflada d’hosties que mos dieren en Born va dos años a la salida un bar. A min y a una amiga Por pidi-yos fueu a unos mozos de poco más de venti. Atiendi Qu’aquelles hosties hasta en carné nun foron nin por budista nin por berciana nin por marsellesa. Nin por culé.  (Lléva-y la mano a la so cara) Toca équí. ¿Nóteslo? Bono Nótolo yo. Aquelles hosties y esta cara rota pa siempre pa siempre Cayéronme enriba por Travela Vargas. Sí. Cayéronme enriba Por transeunta Por transistoraY por transalpina. Paez que me cueste dicilo. Pero entiéndeseme [creo].

Silenciu.

Y que yo nun necesito eh Cambiar el nome al carné. Y que val si nun me dicen Señora. Que non. Que me da igual. Yo con que nun m’ahostien Firmo.

Silenciu llargu.

¿Y en qué ZARA tas tu?

…

¿Quiés otra?

Tu nun tas p’alarmar nada Mio fiyu. Van echate del trabayu…

Bono Rei. Creo que meyor dexate solu Que bastante ties con tenete en pie como p’aguantame la brasa a min. Encantada Nenu.

Si almites un conseyu d’amiga: canea pa casa. Y allóñate del grupín col que tabes enantes. Son lo peor.

(Gárra-y la cara, confidente) Sé lo que falo.

MARISELA pósa-y amable los deos nos llabios, garra la copa y marcha.

¡Guapu!

Escuru.