Llutu nes lletres asturianes pola muerte d’Helena Trexu Fombella
La ceremonia de despidida y homenaxe va tener llugar güei domingu nel Tanatoriu Noega de Xixón, a les 18 hores. La escritora Helena Trexu Fombella morrió…
La ceremonia de despidida y homenaxe va tener llugar güei domingu nel Tanatoriu Noega de Xixón, a les 18 hores.
La escritora Helena Trexu Fombella morrió esti vienres a les 84 años dexando atrás una llarga carrera de compromisu cola cultura y col asturianu. Entidaes como Iniciativa pol Asturianu, el PEN Asturianu o l’Academia de la Llingua Asturiana amosaron el so pesar pola perda de l’autora.
La ceremonia de despidida y homenaxe va tener llugar esti domingu nel Tanatoriu Noega de Xixón, a les 18 hores, cola participación d’escritores y otres creadores venceyaes a l’autora, ente los que van tar Inaciu Galán, Sofía Castañón o Vanessa Gutiérrez.
Nacida en Sama (Llangréu) en 1944, Helena Trexu desarrolló una importante trayectoria lliteraria venceyada a la creación n’asturianu. La so obra forma parte de la hestoria recien de la lliteratura na nuesa llingua y llegó especialmente a les nueves xeneraciones al traviés de títulos como Olaya n’África, premiada pola Academia de la Llingua Asturiana en 2008 y espublizada dientro de la colección Escolín.
Helena Trexu volvió a Asturies nos años ochenta tres una estancia en Cataluña. Dende la so torna a Asturies implícase dafechu nel movimientu asturianista dende l’ámbitu políticu y cultural.
N’Asturies centró’l so llabor na defensa del asturianu y na creación lliteraria nesta llingua, formándose en cursos d’asturianu. En 1999 fundó l’Asociación Cultural Grupu Epona, entidá centrada na realización de cuentacuentos y talleres infantiles impartíos n’asturianu y na edición de llibros.
La so trayectoria nel ámbitu lliterariu inclúi una amplia producción de poesía, narrativa p’adultos y lliteratura infantil y xuvenil, avalada por múltiples gallardones. Tres entamar na edición col poemariu Camientos, coses, curuxes (1989), en 1991 llogró el Premiu de Poesía de L’Entregu y en 1995 foi reconocida col Premiu de Traducción de l’Academia de la Llingua Asturiana pola adaptación de la obra de Salvador Espriu El caminate y la muria.
Darréu recibió’l Premiu de Poesía Vital Aza en 2001 por Abril y compartió’l Premiu ex aequo del II Concursu de Rellatos de Muyeres del Conceyu de Llaviana por Onde’l ríu besa la mar, títulos dambos espublizaos pola Editorial Grupu Epona esi mesmu añu. En 2002 llogró’l Premiu de Poesía Elvira Castañón pol poemariu Ringleres de carbón y salitre, editáu por VTP en 2003, sellu que tamién llanzó la so novela xuvenil Camín davezu (2005).
A lo llargo de los años siguientes amplió’l so catálogu con obres infantiles y d’investigación como Dos histories d’animales (Madú, 2006), A la gueta setes na seronda (Asturtoons, 2006), Valores en clave femenino (Grupu Epona, 2006) y Mitoloxía asturiana pa rapacinos y rapacines (Grupu Epona, 2007), asina como otres ediciones en llibros colectivos.
Nel ámbitu xuvenil, llogró’l Premiu Asturnet en 2007 por Llara quier ser astrónoma (espublizáu en 2011 por Grupu Epona) y el Premiu del Certamen Llectures pa rapazos de l’Academia de la Llingua Asturiana en 2008 por Olaya n’África, editáu darréu en 2009. Les sos espublizaciones más recién conxunten Poética de Muyeres 2014 (Ediciones Epona, 2014), Piedra gris con rellumos doraos (Ediciones Epona, 2022) y la novela Víes (Ediciones Trabe, 2023). La editorial La Semeya tien a piques de salir la que va ser la so segunda novela, yá póstuma, Ente muyeres.
Dende Iniciativa pol Asturianu destacaron «el valor de la so contribución a la normalización social y lliteraria del asturianu, entendiendo la creación lliteraria como una ferramienta fundamental pa garantizar que la llingua tea presente en tolos ámbitos de la vida y que les nueves xeneraciones puedan lleer, deprender y esfrurar de la lliteratura nel so propiu idioma y siempres con valores como’l feminismu y l’ecoloxismu presentes».
L’Academia de la Llingua Asturiana faló de Trexu como «una persona que llevaba la dignificación y la recuperación de la llingua asturiana por bandera y que siempres tuvo claro’l papel de les muyeres y la lliteratura nesa xera».
El PEN Asturianu, del que formaba parte, unvió un comunicáu nel que describíen a Trexu como «una de les voces que más trabayaron nes últimes décades pa la dignificación de la lliteratura asturiana, con una obra considerable, sobre manera en poesía, la traducción y la lliteratura infantil y xuvenil».
