«Sobrante d’un foriatu recortable» de Milio Ureta (Escena 12ª)
ESCENA DOCENA DE SOBRANTE D’UN FORIATU RECORTABLE Bienllegaos y bienllegaes a la entrega cabera d’esta collaboración braniega de Formientu Dixital con dramaturgu Milio Ureta y la editorial…
ESCENA DOCENA DE SOBRANTE D’UN FORIATU RECORTABLE
Bienllegaos y bienllegaes a la entrega cabera d’esta collaboración braniega de Formientu Dixital con dramaturgu Milio Ureta y la editorial Impronta.
La entrada de güei vien col tastu la despidida, yá que nesta ocasión especial ponemos el ramu a la collaboración cola escena númberu doce, seleccionada por Milio Ureta y que trai por títulu ‘ONDE LA MAR INDOLENTE’. Vais permitinos reproducir les pallabres del propiu autor, yá que naide podría desplicar con mayor aciertu la relevancia d’esti fragmentu dientro del conxuntu de la obra a la que pertenez. Esta escena «val por si sola lo que’l restu la obra. Escribíla va 24 años [que se diz pronto] nidiamente n’otru tiempu vivencial y n’otru ánimu Y xunto con LA FLORISTA, L’EXCRITOR y LOS ANALISTES ta n’orixe y razón de la obra teatral resultante. Esto yera un exerciciu de clas a los 31 años. Tolo que quixi cuntar dempués taba yá equí y equí se xustifica too. Too. Fasta’l puntu que, quiciabes, en sentíu puru, el restu les escenes foriates puean resultar inecesaries dafechu.»
Esperamos que vos preste, con esti testu despidimos un branu por entregues qu’esperamos pueda convertise nun vezu recurrente.
Saludu candial.
ONDE LA MAR INDOLENTE
Paséu marítimu del arenal barcelonín de Bogatell. Primerísima hora de la mañana. EL SENYOR ROLDÓS, con ropa deporte y unos playeros d’una color percantosa, avérase faciendo futin a la baranda onde UN FORIATU RECORTABLE lleva un ratu clisáu mirando’l Mediterráneu. N’aportando onde ta él, el paisanu de polo menos siete apellíos llocales [y guapamente yá na primer ochentena de vida] entama facer dellos exercicios de xinasia vieyo, como si fore un pocu un títere o un ninot o un autómata. Y executa tala serie, amás, al tiempu con un puntu cómicu, como una comedia d’aliendos y apnées. Dempués d’una pausa, tres d’un intre útil d’estudiu y oservación, el vieyu decídese p’arrancar a parlotiar.
EL SENYOR ROLDÓS
Usté nun ye d’equí.
Usté nun ye d’equí ¿Nun ye cierto?
Silenciu.
Usté ye forasteru.
¿Nun ye cierto?
Nun ye cierto qu’usté nun ye d’equí?
Silenciu.
Usté madruga muncho. Yo tamién madrugo. Muncho. Préstame enforma madrugar. Madrugo cada día. Madrugo y salgo a correr per esti paséu cada día. Correr per esti paséu ye perbono pa caltener el cuerpu en forma. Ye mui importante caltener el cuerpu en forma. Yo corro per esti paséu cada mañana. Yá-y lo dixi. Calzo estos playeros y corro paséu arriba paséu abaxo cada mañana.
¿Qué-y paecen estos playeros? Háilos que venderíen a una madre por tener unos playeros asina.
Usté non.
EL SENYOR ROLDÓS carraspea y aclaria la voz y el gargüelu de manera escandalosa pa continuar parlotiando.
Ta claro qu’Usté non.
Yo madrugo y percorro esti paséu ente diez y quince vueltes cada mañana. Too según el día. Según el día que tea yo. Ta claro.
Usté y yo tenemos suerte. Tenemos esta mar que mos regala un paséu au correr cada mañana. A venti quilómetros d’equí nes comarques d’interior Nun tienen una mar que-yos regale un paséu como ésti.
Silenciu.
Usté nun ye d’equí. ¿Nun ye cierto?
Vese en siguida qu’Usté nun ye d’equí.
EL SENYOR ROLDÓS tose otres dos veces nun mou ablucador.
Esta mar ye un regalu pal nuestru país. Yo báñome na mar cada mañana. Y cada mañana tomo tamién un bañu sol.
P’alluendi d’esti paséu hai una playa increyible increyible na que pue unu tumbase a tomar el sol con tola llibertá. Ye una d’eses sableres increyibles onde dexen qu’unu puea tomar el sol desnudu. ¿Qué opina usté d’eses playes onde dexen que la xente tome’l sol desnudo? Yo tomo’l sol asina Ensin nada de ropa nesa playa que-y digo. Hai quien cree qu’eses playes nes que sólo hai xente corita tomando’l sol Nun son más que niales de maraxes. Playes de maraxes. De maricones. Hai quien cree eso.
Yo tomo’l sol desnudu del too porque creo que’l sol ye una bendición pal cuerpu. Y aínda una bendición pa la cabeza. Y pa los güesos.
De nenu yo les piernes teníales torcíes dafechu. Curcies curcies como un paréntesis. Como los brazos d’unes alicates. Mio má diose cuenta mui pronto y fizo que me punxeren les pates tol día al sol. Tol día Toles mañanes y toles tardes. Y ehí taba yo tol día llantáu coles pates al sol. Y no que duró un branu punxéronseme dreches. Dreches y dures. Mire mire.
Pue tocales si quier.
Nel mio casu asocede amás que nun me gusten les marques que dexen los traxes de bañu en cuerpu coritu. Nun me gusta tener marques. Non.
Si yo agora baxare un pocu’l pantalón usté podría velo que yo nun tengo marques.
Si yo agora baxare’l pantalón usté podría velo.
Mire.
Baxa’l pantalón un pocu.
¿Decátase? Nun teo marca nenguna.
Nun ye bono tener marques. Davezu les marques dicen coses d’ún qu’unu preferiría nun cuntar. Polo demás ye qu’a min gústame tar morenu. Y tener una bona color. Usté nun tien bona color. La so color nun ye mui bona.
¿Nun ye cierto que la so color nun ye mui bona? Y sicasí anguaño ye perimportante tener una bona color. Una bona color ye síntoma de munches más coses bones.
Silenciu.
Na sablera que-y comento pue consiguise esa bona color de la que-y falo.
Tol mundiu creyerá que-y pasen a usté munches coses bones si consigue esa bona color que-y digo.
Y usté nun tendrá marques.
Silenciu.
A usté présta-y mirar pa la mar y non tar dándo-y a la parpapayuela cola xente que-y fala. A usté nun-y presta falar cola xente madrugador que pon los playeros y sal a correr. Cola xente qu’apara un minutu xunta usté y-y fala. Nun-y gusta eso.
Usté ye un foriatu. Ye evidente qu’usté ye un foriatu. Ye evidente pola forma en que usté mira la nuestra mar. Ye más qu’evidente.
La nuestra mar y usté nun s’entienden.
Silenciu llargu. EL SENYOR ROLDÓS mira dica’l fondu’l paséu pa onde s’alcuentra la sablera nudista.
Usté mira mui mal a la nuestra mar. Pero asina nun va consiguir nada. La nuestra ye una mar indolente. Una mar que nun fae discutiniu dalu Nin ye d’engarrase con nengún. Una mar que nun fae discutiniu dalu. Que nun fae discutiniu dalu Con nengún.
Usté importa-y un pitu a la nuestra mar. Y d’una mar asina usté nun va consiguir nada.
Nada.
Silenciu.
Dóblo-y la edá. Pero trátolu d’usté Porque ta usté Mui mayor.
Y porque ye De fuera.
Y porque Lu respeto.
Escuru.