Patricia Martínez Cueto gana la cuarta edición del Premiu Pachín de Melás de testos teatrales n’asturianu
La Conseyería de Cultura, Política Llingüística y Deporte concedió a Patricia Martínez Cueto la cuarta edición del Premiu Pachín de Melás de testos teatrales n’asturianu por…
La Conseyería de Cultura, Política Llingüística y Deporte concedió a Patricia Martínez Cueto la cuarta edición del Premiu Pachín de Melás de testos teatrales n’asturianu por Llugares comunes. Drama rural femenín en trés actos. El xuráu, presidíu pol director xeneral d’Acción Cultural y Normalización Llingüística, Antón García, destacó la so capacidá pa combinar tradición y modernidá a partir de «un ritmu perfluyíu» y de «un usu del asturianu pernatural, pertradicional».
El gallardón forma parte de les iniciatives del Gobiernu del Principáu pa sofitar la creación lliteraria n’asturianu y favorecer que les obres escrites nesta llingua atopen tamién el so espaciu enriba los escenarios. Con esti premiu, la Conseyería reconoz el talentu de quien escriben teatru n’asturianu y facilita que los sos testos puedan llegar al públicu cola so publicación y representación.
La obra esplora, amás, les posibilidaes escéniques del testu más allá de la palabra. El fallu sorraya «el dominiu plenu de la espresión corporal y de la musicalidá» y valora’l xuegu colos elementos audiovisuales pa marcar el pasu ente actos y escenes, xunto a la escoyeta de los axetivos que los introducen.
El xuráu tuvo integráu por Begoña Martínez Cezón, Eloy Antuña Zamarro, José Antonio García Fernández y Tamara Collar Rodríguez, con M.ª Dolores Rodríguez Vázquez, responsable de promoción del asturianu de la Dirección Xeneral d’Acción Cultural y Normalización Llingüística, como secretaria.
El Premiu Pachín de Melás ta dotáu con 6.000 euros y busca que les obres reconocíes lleguen tamién a los escenarios. Por eso, amás de la coedición del testu ganador, contempla la so coproducción con una compañía profesional y la so incorporación a les actividaes culturales promovíes pol Principáu.
Con esti gallardón, el Gobiernu d’Asturies favorez la creación teatral n’asturianu y la so puesta n’escena, dando percorríu a los testos acullá del propiu premiu. El certame recuerda col so nome al dramaturgu Emilio Robles Muñiz (Xixón, 1877-1937), conocíu como “Pachín de Melás” y fundador de la corriente costumista.
Patricia Martínez Cueto
Patricia Martínez Cueto ye llicenciada en Periodismu y desenvolvió parte de la so trayectoria profesional en dellos medios de comunicación. Dende’l 2018 exerce como profesora de Llingua Castellana y Lliteratura nel Institutu de L’Infiestu, onde caltién tamién una rellación estrecha col teatru al traviés de los grupos y representaciones que coordina nel centru.