Inaciu Galán lleva la poesía n’asturianu al XX Festival Luna de Locos en Colombia
L’autor asturianu participa nel reconocíu alcuentru de Pereira, consolidando la proyección ya internacionalización de la poesía escrita en llingua minorizada. Mientres la so estancia en Colombia, Galán va ufiertar…
L’autor asturianu participa nel reconocíu alcuentru de Pereira, consolidando la proyección ya internacionalización de la poesía escrita en llingua minorizada.
Mientres la so estancia en Colombia, Galán va ufiertar tamién una conferencia en llinia pa la Sociedá d’Hispanistes de Xeorxa sobre la diversidá llingüística n’España y l’asturianu.
L’escritor, periodista y promotor cultural asturianu Inaciu Galán representa estos díes a la lliteratura n’asturianu na XX edición del Festival Internacional de Poesía «Luna de Locos», certamen de referencia en Llatinoamérica que se celebra del 27 al 31 d’ochobre na ciudá colombiana de Pereira.
La participación de Galán en tierres americanes refuerza la difusión y el prestixu internacional de la creación lliteraria escrita n’asturianu, asitiando a les llingües minorizaes nel centru del alderique poéticu global. Anque l’autor asturianu cunta con un percorríu afitáu participando en numberosos eventos culturales ya institucionales fuera d’Asturies a lo llargo de los años, foi nesti últimu cursu cuando la so axenda internacional s’intensificó de forma mui notable. Muestra d’esti impulsu recién ye la so participación en destacaos alcuentros lliterarios y llectures poétiques en ciudaes como Barcelona, Atenes, delles llocalidaes de Méxicu y Colombia, ente otros escenarios.
Una axenda centrada na diversidá llingüística, el diálogu intercultural y les aules
Tres l’entamu de les xornaes el martes 27 d’ochobre, l’autor desarrollará a lo llargo del festival una intensa actividá que combina la reflexión teórica, el recital poéticu y la mediación pedagóxica en centros educativos llocales.
La programación escolar arrancará el miércoles 28 d’ochobre pela mañana na Institución Educativa Leningrado, onde Galán participará nuna xornada d’alcuentru con estudiantes xunto a autores como Karolina Urbano —quien imparte’l taller—, Luz Melia, Cristian Cárdenas ya Inma Luna. Nestos espacios, los mozos entrevistarán a los poetes, escucharán los sos testos y sumaránse a la celebración con muestres de cantares y bailles tradicionales.
Esa mesma tarde del miércoles, el Teatru Cámara de Comerciu de Pereira acoyerá unu de los actos principales del eventu: el conversatoriu y gala de poesía dedicáu a la “Diversidá Llingüística y llingües minorizaes na Poesía”. Nesti foru, Inaciu Galán encontará la realidá de la lliteratura n’asturianu nuna mesa redonda compartida con voces de gran proyección como’l costarricense Carlos Villalobos, la española Inma Luna y los autores colombianos Karolina Urbano, Luz Melia Alzate y Juan Manuel Rave.
El xueves 29 d’ochobre, l’actividá formativa va treslladase a la I.E. Bayron Gaviria, onde Inaciu Galán asumirá’l rol de tallerista xunto a la poeta colombiana Ana Miranda. Nesta sesión de trabayu ya intercambiu intervendrán tamién figures destacaes del panorama poéticu como Mary Grueso, Monthia Sancho (Costa Rica), Ketty Blanco y Jhonatan Arredondo.
Coincidiendo cola so estancia en Colombia, el vienres 30 d’ochobre a les 11:00 a.m. (hora colombiana / 18:00 h n’España), Galán va conectar de manera virtual con Europa del Este pa impartir la conferencia “Diversidá llingüística n’España: la llingua asturiana”. La intervención encuádrase nel II Cilu de Seminarios de Formación en Llinia entamáu pola Sociedá d’Hispanistes de Xeorxa (baxo’l lema “La llingua como ponte”), un foru internacional empobináu a hispanistes y profesores d’español de tol mundu.
La presencia del autor asturianu nel festival colombianu va rematar el sábadu 31 d’ochobre na Gran Gala de Clausura nel Teatru Cámara de Comerciu, compartiendo escenariu con una amplia nómina de creadores internacionales como Margarito Cuéllar, Beatriz Aragón, Verónica Aranda, Hugo Oquendo, David Mañero o Luis Jairo Henao, ente otros.
Apostar pol diálogu ente cultures
La inclusión de llingües minorizaes como l’asturianu en certámenes y seminarios académicos d’esta magnitú pon de relieve el valor de la diversidá llingüística como patrimoniu cultural vivu. A travies d’esti diálogu intercultural, la poesía y la lliteratura n’asturianu demuestren la so vixencia, calidá y capacidá pa tender pontes con llectores, académicos y creadores de tol mundu.