Pelayo Martínez Olay gana’l Premiu ‘Enriqueta González Rubín’ de narrativa moza n’asturianu con ‘Pallabres d’anguaño’

Pelayo Martínez Olay ganó la sesta edición del Premiu Enriqueta González Rubín de narrativa moza n’asturianu con Pallabres d’anguaño, un conxuntu de 19 rellatos curtios colos que l’autor s’avera a distintes realidaes de la sociedá dende una escritura que’l xuráu define como madura, orixinal y “formalmente impecable”.

Les histories traten asuntos mui presentes na actualidá, dende l’alzheimer, l’abusu sexual o’l suicidiu a l’adolescencia, la vieyera, el trabayu y les relaciones sociales, temes complexes que conviven nun llibru que, según el fallu, resulta “orixinal y sorprendente, coles mesmes que realista y mui natural” y consigue construyir una semeya del presente.

El director xeneral d’Acción Cultural y Normalización Llingüística, Antón García, presidió’l xuráu, del que tamién formaron parte Claudia Gutiérrez Lueje, escritora y ganadora de la edición del 2025; Blanca Fernández Quintana, escritora, y Llucía Menéndez Suárez, docente. María José Ramos Viesca, xefa de la Sección de Normalización Llingüística, actuó como secretaria.

El Premiu Enriqueta González Rubín de narrativa moza n’asturianu, dotáu con 3.000 euros, foi creáu pol Principáu nel 2021 pa reconocer el talentu de les nueves voces de la lliteratura n’asturianu y abrir espaciu a autores nuevos y a nueves histories.

Pelayo Martínez Olay (Llangréu, 1997) ye profesor de Llingua Asturiana y Lliteratura n’Educación Secundaria y graduáu en Llingües Modernes y les sos Lliteratures pola Universidá d’Uviéu. Recibió distintes reconocencies en certames lliterarios y nel 2024 publicó cola editorial CuatroGotes Fuxir, el so primer llibru de rellatos.