La Sociedá Popular La Regalina de Cadavéu ta acabante de convocar el XXXII Premiu de Poesía en llingua asturiana Fernán Coronas (Padre Galo) coles bases siguientes:
1. Podrán presentase todes les persones que nun ganaran el premiu n’ediciones anteriores, con un poemariu compuestu por poemes inéditos, orixinales, escritos en llingua asturiana (nun pueden ser tornes d’otres llingües) y con un mínimu de 275 versos.
2. La presentación pue facese pel corréu electrónicu, unviando enantes del día 31 de xunetu, los poemarios en formatu Word o PDF a splaregalina@gmail.com
Los trabayos dirán encabezaos per un títulu y firmaos namás con un seudónimu.
Nel corréu electrónicu axuntaráse un archivu aparte, que la organización (Sociedá Popular La Regalina) guradará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI y títulos presentaos al concursu.
3. Concederáse un únicu premiu de 900 euros, contemplándose al mesmu tiempu la so publicación.
4. La Sociedá Popular ya Cultural de La Regalina resérvase’l derechu de publicar el premiu ganador, pudiendo escuchar al autor enantes. Nel casu de que dalguien quiera espublizalu, tendrá de ser cola autorización de la promotora del premiu.
6. El Xuráu nun podrá declarar ermu el premiu y el so fallu nun se pue retrucar. Del resultáu daráse anuncia nun actu públicu en Cadavéu, el día 7 d’agostu, aniversariu del nacimientu del Padre Galo.
Dende Formientu animamos a la participación nesti concursu hestóricu que yá tien distinguío a delles voces renomaes de la poesía asturiana contemporánea. Ente los y les autores destacaes con esti gallardón, les diez últimes ganadores fueron Mercedes Ruisánchez (2025) por Camín de casa, María Esther García (2024) por Resclavu, Pablo X. Suárez (2023) por Entamos d’onomástica, Gonzalo Llamedo Pandiella (2022) por Los fíos de Bauman, Daniel García Granda (2021) por Rosada 3.0 (monólogu interior con alumnos al fondu), Laura Marcos (2019) por Ofrenda, Solinca Turbón (2018) por Reflexones d’un cuerpu opacu, Aida Escudero (2017) por Esi llugar qu’agora ye nuesu: poemariu neanderthal, ya Inaciu Galán (2016) por Nes ruines de la nueche y les hores. Tamién destaquen otres figures qu’algamaron esti reconocimientu previamente como Ánxel Álvarez Llano, Miguel Rodríguez Monteavaro, Taresa Lorenes, Berto García, Marisa López Diz, José Luis Rendueles, Miguel Rojo, Susana Sela, José Ángel Gayol o Carmen Guardado, ente munches otres d’igual importancia pa la poesía llariega contemporánea.
