Patricia Suárez gana’l XXXII Premiu Fernán Coronas de poesía n’asturianu con «Xenero disputa»
Patricia Suárez gana’l XXXII Premiu Fernán Coronas de poesía n’asturianu con «Xenero disputa», escoyíu por unanimidá d’ente venti poemarios presentaos.
El xuráu del Premiu de poesía en llingua asturiana Fernán Coronas aconceyó na casa natal del poeta de Cadavéu esti vienres 7 d’agostu, coincidiendo colos 142 años de la fecha de nacencia del Padre Galo. D’ente los venti poemarios presentaos a concursu, una cifra record nel gallardón, escoyéronse cuatro finalistes y foi seleccionáu como ganador, por unanimidá, el poemariu «Xenero dispusta». Una vegada abiertes les pliques resultó ser de la poeta Patricia Suárez.
El xuráu destacó del llibru «el compromisu intelectual y éticu que se pon de manifestu nél y la so reflexón sobre’l cuerpu, la identidá y la llibertá, una temática poco frecuente na lliteratura asturiana». Nel acta fálase tamién de que ye una obra que destaca pal xuráu «pola so calidá llingüística y pola combinación que se rexistra nella d’emoción y pensamientu».
El xuráu tuvo conformáu nesta edición por Inaciu Galán como presidente, Marta Mori nes funciones de secretaria, y les escritores María Esther García López, Carmen Guardado, Susana Sela y Mercedes Ruisánchez, ganadora de la edición anterior.
L’autora ganadora
Patricia Suárez (Mieres, 1999) ye graduada en Llingua Española y les sos Lliteratures pola Universidá d’Uviéu, onde anguaño investiga la recepción del Quixote na novela española contemporanea de Fernando Aramburu.
Coordina’l proyectu de lliteratura asturiana Asturian Writers y la sección radiofónica La otra página, dedicada a la lliteratura escrita por muyeres, dientro del programa Noche tras Noche de RPA. Collabora, amás, como redactora y autora de reportaxes en Zenda.
Ye autora de Limerencia (2017), La flor cortada (2019), La genealogía de los espejos (2023), Telémaco en la garganta (2024), obra distinguida col XIII Concursu Lliterariu de la Universidá d’Uviéu, y Sorolla fue tu voz (2025).
Ente les sos reconocencies destaquen la beca «Asturies» de lliteratura de la Residencia 1863 d’A Coruña (2024) y el XXII Premiu Internacional de Rellatu Curtiu Eugenio Carbajal (2024).
La entrega del premiu va facese, como yá ye tradición, na celebración de la fiesta de La Regalina, l’últimu domingu d’agostu, qu’esti añu cai de día 30. El Premiu de poesía en llingua asturiana Fernán Coronas entámalu la Sociedá Popular y Cultural La Regalina de Cadavéu, col patrociniu de La Reserva de los Campos y el Conceyu de Valdés. El premiu ta dotáu con 900 euros y la espublización de la obra ganadora.
