Iris Díaz Trancho: «Hai tiempu que nun me preocupa la producción o l’engorde del currículu lliterariu»

Iris Díaz Trancho [Xixón, 1981] estudió la diplomatura de Maxisteriu pola rama d’Educación Infantil, pa más tarde graduase nesta mesma especialidá. Asina mesmo ta posgraduada col títulu d’Esperta en Filoloxía Asturiana y ye Máster n’Intervención Socioeducativa; too ello pola Universidá d’Uviéu. Nel planu lliterariu, pal públicu infantil tien espublizaos los llibros: La caxa de cristal (ALLA, 2004. Premiu “Llectures pa rapazos”), La neña de les trences al revés (Trabe, 2009. Premiu FETEN a la meyor adaptación teatral), Mio ma, la pirata (Suburbia, 2010. Premiu de la Crítica d’Asturies) y Vivo nuna casa malva (Pintar-Pintar, 2011). No tocante a la lliteratura p’adultos, cunta colos llibros de rellatos Nome y Pincelaes (Trabe, 2014).

Nel añu 2025 algamó’l XXXI Premiu «Máximo Fuertes Acevedo» d’ensayu pola obra Al verde d’El Cierru.

La ronda de presentaciones de la obra yá ta en marcha y, pel momentu, les próximes cites son les siguientes:

• Vienres 11 de setiembre – 19:00 h n’Uviéu (Llibrería Matadero Uno)
• Martes 22 de setiembre – 18:00 h en Piedrasblancas (Biblioteca Pública)
• Miércoles 30 de setiembre – 19:00 h en Villaviciosa (Atenéu Obreru, dientro del circuitu Autores nel Camín d’Asturies Cultura en Rede).
• Sábadu 17 d’ochobre – 12:00 h en Xixón (Xardín Botánicu, con visita guiada, dientro del circuitu Autores nel Camín d’Asturies Cultura en Rede)
• Miércoles 18 de payares 19:00 h en Mieres del Camín (Casa la CulturaTeodoro Cuesta, dientro del circuitu Autores nel Camín d’Asturies Cultura en Rede)

Entrevistamos a Iris Díaz Trancho al rodiu de la publicación del ensayu Al verde d’El Cierru, editáu por Cuatro Gotes Ediciones.

ENTRUGA- Al verde d’El Cierru ye una obra a mediu camín ente lo ensayístico a lo poético. ¿Podríes afondar en cómo garra’l testu esta forma, si se dio d’un mou natural o ye productu d’una decisión consciente a la de plantegar la obra?

REMPUESTA- Dacuando hai cierta mitificación colos procesos creativos. Nel mio casu vienen siempre de resultes d’un puntu de partida inspirador, sí, pero fundamentalmente d’una sistematización y trabayu sobre esti a partir d’una estructura meditada.

El primer testu qu’escribí, que puedo confesar que fue’l de febreru, tuvo la estructura que yo quixi que tuviere, que me salió de manera ñatural que tuviere. Pero a partir d’ehí fui dándo-y forma y retocando esa estructura (prosa poética – ensayu – prosa poética), incluidu esi primer testu, nes posteriores revisiones.

E- Tamos énte una obra que se constrúi sobre la estructura cíclica de la naturaleza, atendiendo a les especies botániques de la finca familiar. D’otra banda, como mayestra tas suxeta al calendariu escolar, tamién cíclicu. ¿Cómo se rellacionen estes dos estructures temporales ente sigo y col to procesu como escritora?

R- Interesábame la idea de poner en rellación un testu lliterariu colos calendarios clásicos, esos que munches veces dexaben conseyos acerca de cómo curiar la finca, qué plantar cada mes o en qué estación pañar la fruta pa facer dulce. Pa la ellaboración d’estos calendarios yeren fundamentales dos elementos: la observación (siempre consciente) y el conocimientu. Dalgo d’eso quixi facer yo.

E- Llevabes más d’una década ensin publicar, unos años que coincidieron con cambios personales y llaborales. ¿Cómo tas viviendo esta vuelta a la creación lliteraria?

R- Más qu’una vuelta a la creación lliteraria vívolo como la vuelta a la escritura de “Al verde d’El Cierru”. Yera eso esactamente lo que necesitaba escribir y lo que quería compartir nesi momentu vital. Nun se si va significar l’entamu d’otros proyectos o simplemente voi quedar ehí. Hai tiempu que nun me preocupa la producción o l’engorde del currículu lliterariu.

Paezme muncho más interesante’l procesu y esti fue llargu y mui entregáu. Fuimos curiando dende la primer escoyeta del corpus teóricu hasta la ellaboración de la portada. Fueron dos años de detalles.

E- Arriendes de la complexidá de conciliar el progresu profesional colos proyectos familiares y personales, ¿podríes contanos qué papel xuega la maternidá nesta obra a nivel temáticu?

R- Esta obra ye posible gracies al descansu na crianza que me supón la separación. Ye, si queremos, una circunstancia triste, porque esa renuncia de la muyer, y de la muyer que trabaya (qu’afortunadamente nesti momentu nun ye un escenariu xeneral) nun tendría que dase d’una manera tan evidente.

Ye polo tanto’l distanciamientu de la maternidá y l’alcuentru cola individualidá y por embargu, el capítulu más sentíu, más fondu, ye’l que-y dedico a la mio fía. El mes d’ochobre, mes de pañar la mazana nes finques que tenemos pumarada.

E- El llibru constrúise sobre’l caminar de la finca familiar (El Cierru), pagando atención a los ciclos estacionales de les especies vexetales qu’ellí s’alcuentren. Esta conocencia qu’amueses nun ye puramente botánica, sinón qu’afilvánesla con referencies a la to propia biografía y a hestories familiares. ¿Cómo llegues a construyir un ensayu tan personal? ¿Da vértigu poner tanto d’una mesma?

R- Como comentaba a lo primero, la estructura del llibru ye de dolce capítulos, y caún d’ellos abre y zarra con un breve testu de prosa poética. Nesos testos hai efectivamente muncha carga personal, y ye dalgo nuevo pa mi, porque siempre me xeneró munchu respetu la poesía y los y les buenes poetes. Tenemos polo tanto veinticuatro tentatives de poema que marquen la llinia temática de los capítulos (la muerte, el pasu’l tiempu, el deséu, la identidá, la espera…) y falen d’un añu na vida d’una persona. Na mio vida.

E- Siendo una obra con una carga poética fuerte, una llectura atenta dexa ver a les clares que tamos énte un testu con munchu trabayu d’investigación detrás, mesmo bibliográfica que de trabayu de campu. ¿Qué aspectos d’esti procesu d’investigación destacaríes como fonte d’arriquecimientu personal?

R- Hai un procesu previu a la escritura y son los cinco años que llevaba faciéndome cargu, con mayor o menor aciertu, de la finca familiar. Nesi tiempu tuvi qu’intercalar les llectures que falaben de la poda de frutales coles que describíen la ñaturaleza y el xardín como un espaciu de calma abonáu pa lo lliterario. Fueron meses de llectura voraz de llibros sobre ñaturaleza, especialmente (y non pretendidamente) escritos por muyeres, que me llevaron al convencimientu de que yo tamién quería escribir dalgo nesa llinia qu’a lo menos pudiere acercase un poco a elles dende la mio tierra humilde y na mio llingua pequeña.

E- El llibru inclúi cianotipies artesanales de distintes especies vexetales d’El Cierru, asociaes a esi almanaque qu’organiza la obra. ¿D’ónde sal la idea y por qué escoyisti esta técnica?

R- Esta escritura, yá lo dixi, fue un procesu sistemáticu. Y dientro d’esi procesu sistemáticu taba’l ritu de xubir a la finca, sacar una semeya de lo nuevo (les nueves flores en prau, les nueves frutes, la fueya nuevo) y dibuxar dalguna d’eses semeyes.

La rutina de dibuxu fue mui interesante pa mí, porque pienso que xeneraba un nivel de percepción, de sensibilidá pa cola especie, que facilitaba enormemente la descripción lliteraria posterior.

Dicho esto, caún tien de ser consciente de les sos llimitaciones, y los mios dibuxos taben mui bien pa la reflexón íntima, pero nun taben al nivel que merez una publicación en papel. Por embargu, y teniendo en cuenta que’l testu diba empobináu a tolos públicos, non solo a los especialistes en botánica, paecíame que sí yera necesario acompañar la llectura con una guía visual de la planta de la que tábemos falando.

A partir d’ehí Ruma Barbero, persona fundamental nel procesu posterior d’edición, suxerme la técnica fotográfica de la cianotipia. Y esti procesu encaxa perfectamente porque obliga a iniciar un segundu añu d’observación de la finca, col recolectáu (nel mes correspondiente) de los exemplares y el cianotipiáu de los mesmos.

E- Escoyisti dolce especies de plantes pa configurar los capítulos pero seguro que teníes en mente munches más variedaes de plantes que meses del añu. ¿Hai dalguna especie concreta que quedare fuera y quieras reivindicar equí?

R- Hai munches que quedaron pel camín y que menciono de pasada. Tán les camelies, de les que tenemos dos especies n’El Cierru, y que son un clásicu nos xardinos europeos. Tamién los agapantos, que comparten espaciu nel xardín colos acantos (de los que sí falo) y que nun falten en cásique nengún xardín asturianu. Yera guapo tamién falar de la espinera, un árbol autóctonu que da nome a bien de pueblos n’Asturies y tien de too: fueya preciosa, porte, flor pa polinizadores y frutu que ye alimentu. Tamién de les violetes, los ablanos… hai muncho que vindicar.

E- ¿Dalgún proyectu nuevu a la vista?

R- Non. Como comentaba más alantre esti llibru dexóme desfondada y la idea d’esti añu ye volver a centrame na escritura académica y aparcar durante un tiempu lo lliterario.

Iris Díaz Trancho recomienda… (Ensin esplicaciones)

Llibru: Seda, d’Alessandro Baricco.

Película: Hoy empieza todo, de Bertrand Tavernier.

Discu: Forever Changes, de los Love.

Comida: Pulpu con patatinesal estilu de Les Mariñes.

Llugar nel mundu: D’esti llau del mundu El Cierru y del otru, Valparaíso.