La poesía n’asturianu consigue ésitu de públicu n’Atenes
El poeta asturianu Inaciu Galán foi convidáu a esti eventu internacional na capital griega El Festival de Poesía del Mediterráneu foi tou un ésitu, enllenando la…
El poeta asturianu Inaciu Galán foi convidáu a esti eventu internacional na capital griega
El Festival de Poesía del Mediterráneu foi tou un ésitu, enllenando la terraza d’Institutu Cervantes d’Atenes, con más de cien persones que siguieron con interés la poesía nes distintes llingües d’España y en griegu, recibendo un llibru colos testos orixinales en cada llingua y la so traducción al griegu.
L’escritor Inaciu Galán aprovechó la so intervención en representanción de la lliteratura en llingua asturiana pa recordar la importancia de que l’idioma gane espacios de normalidá, como ocurrió nos últimos años nel ámbitu lliterariu. Celebró que, a partir del 2027, vaya llevantase’l vetu a los escritores n’asturianu y puedan ser premiaos como Premios Nacionales pola so obra.
En presencia de los embaxadores d’España y Perú en Grecia, ente otres autoridaes y personalidaes del mundu cultural helenu, l’escritor asturianu recordó la importancia de la lliteratura y n’especial de la poesía, lo mesmo que de la diversidá llingüística, pa construyir pontes ente cultures y territorios nun momentu internacional nel que l’amenaza de los intolerantes y los conflictos armaos ponen en peligru’l futuru de les nuestres sociedaes.
Xunto al autor asturianu Inaciu Galán, recitaron la poeta y novelista gallega Ledicia Costa, la escritora catalan Mireia Calafell y el poeta y críticu lliterariu andaluz Juan Carlos Abril, asina como los autores griegos Ifigenia Dumi, poeta y traductora de la obra al griegu, y Stamatis Polenakis, presentando l’actu la coordinadora del mesmu, Àngels Gregori.
La presencia de Inaciu Galán n’Atenes supón un finxu importante pal espardimientu y visibilización de la llingua asturiana nel esterior, integrándola en pie d’igualdá nun foru d’intercambiu con otres llingües y tradiciones lliteraries de la cuenca mediterránea. L’actu cunta col sofitu de la Embaxada d’España n’Atenes y l’Axencia Española de Cooperación Internacional pal Desenvolvimientu (AECID).
Como creador nel ámbitu poéticu, Inaciu Galán foi gallardonáu con reconocencies como’l Premiu «Fernán Coronas», Premiu de Poesía de Primavera de Piloña o’l Carmen Ruíz-Tilve Arias. Frutu d’esta trayectoria son los poemarios Tierra podre, Patria en pallabres en menores y Nes ruines de la nueche y les hores. Coles mesmes, combina la creación poética col so llabor como editor en Cuatro Gotes Ediciones y col trabayu de traducción lliteraria. La so propia obra llírica foi traducida al inglés, castellanu, aragonés, catalán, náhuatl o griegu, ente otres llingües. Al tiempu treslladó al asturianu testos d’autores internacionales dende idiomes como’l gallegu, castellán, catalán, portugués, francés o inglés. Esta faceta de diálogu poéticu y interllingüísticu motivó’l so proyectu na Residencia Lliteraria 1863, n’A Coruña, centráu na selección y traducción al asturianu d’una antoloxía de voces de la poesía gallega contemporanea.
Nel 2023 fundó la Residencia Lliteraria Xixón na so antigua vivienda, per onde pasaron más de 25 escritores de tol mundu, ente los que destaquen David Uclés o Marisa Martínez Pérsico.
