«Shakespeare», de Xaime Martínez Menéndez

Embaxo d’esi mandil

lleves un paxarín vivu.

Tengo yo una escopetina,

déxame pega-y un tiru.

CANTAR POPULAR

Vendrá una vuelta más

el desagüe lentísimu del alba

y la tinta la nueche

dirá pa otros llugares muncho más

afayadizos pal conxuru de les sombres.

Entamará la discusión de siempre

sobre’l cantar caberu de los páxaros.

Saldrán con ruíu prietu ruiseñores,

tiniebles y calandres

volando de les nueses

boques como un glayíu interminable

y el Sol quedrá traenos, como a troles,

la muerte y la quietú.

Mas yo entós sacaré la mio pistola,

que llevo cientos d’años preparando,

y apuntaré a esi cuervu ruin y estrañu

y el sangre traerá un nuevu atapecer

y sobre’l cuerpo entá

caliente de la llei

mataremos dos páxaros d’un tiru.