Etiqueta: Formientu 12

Los faros lloren mirando la mar
mientres foles ruempen ente roques,
les llágrimes piérdense pela arena
cuando soles escapen les hores.
Eternamente, príncipe d’espluma.

De les infinites pallabres que tallen sobre la nuesa lleenda,
apenes el mio nome ye verídicu;
pos tola decoración estética que visti la nuesa biografía,
ye solu eso: mera decoración.
Lo ciertu ye que, en malapenes cuatro llinies,
la nuesa vida podría ser resumida…
Y, asocediendo la hestoria nel Edén,
yo, la hipócrita d’Eva, reconozo que calezo
y duermo sobre Adán, pola prohibición
de la duce, viva y colorada fruta que desamarra
los mios más fondos mambises.

-Nun ye nada-
-Nenguna muyer tien dueñu-

Apaga la tele,
enciende’l to clítoris,
sal a la cai
a quemar contenedores;

llei un llibru,
constrúi alcordances,
pinta’l mundiu con formosos colores.

Sienti la música,
ruempi les colleres,
afalaga’l tiempu
saltando nos montes;

bailla un pogo
esnuda na cama
y conoz
lo que desconoces.

La paré, aindá recuerdo la so paré…
aquel aquelarre na tabierna
cola Muerte murnia y sobria
revolviendo’l so cacharru,
los Dioses presos en marcos negros
y la meyor banda sonora.

Gobernada pol home del sombreru,
foi estrella fugaz nel tiempu;
llugar de chulos, llugar de borrachos,
llugar de droga, llugar ñuestru.
Cuántu atapecer veríemos xuntos…

daqué pintor allegrando escaleres,
daqué poeta escribiendo cantares
y daqué picoleos h.aciendo redaes
h.odiéndonos la fiesta.

Pernomada anarquía canguesa,
capital y heroína del pueblu,
zona de cóctel un vienres nueche

y al otru sitiu pa conciertos.
Aquel llamáu llar del colocáu
foi la mio casa munchos momentos;
momentos vivíos colos mios collacios
y col Espumino quemando per dientru.

Voi entrar pela to puerta al gritu d’espartana,
col corazòn nuna mano y la llanza na otra…

(Aùh! Aùh! Aùh!)

va sonar Sultans of Swing en llugar “La cabalgata”.
Muñequina Tim Burton, princesa texedora;
mira’l to costáu qu’equí toi yo besando porcelana,
enredáu n’edra negra que provien d’una dama
espartana, qu’

(Aùh! Aùh! Aùh!)

alloria amodo col so moñu la mio almohada.
Qué quies h.acer Harley Quinn d’Esparta?
Escribir suaños, dibuxar mundios…
H.agámoslo

(Aùh! Aùh! Aùh!)

aullando a la lluna dende la cama.
I estic Boig per tu princesa d’Esparta…
fas que parli català en poemes asturians,
i sé que ho saps, Però m’agrada que on
poses els ulls

(Aùh! Aùh! Aùh)

Poses la bala (de labios).

Que guapura tien la mar d’Urriellu,
un bañu en Torimbia, l’alborecer nel Seya…
que guapura tien afondar pela Olla,
llorar en Tazones, l’atapecer de la Griega.

Que guapura tien el mantu del cielu,
les vistes de Pierzu, l’orbayu na tierra…
que guapura tien esti país silente
cola fuerza del vientu glayando na piedra.

Espeyismu n’África,
alfergues nes manes,
buelgues na sablera…
el corazón con mieu,
puntos suspensivos,
eso é lo que-y queda.

El tic-tac del cocodrilu
faise eternu;
el riu yá nun cuerre,
el vientu yá nun xuega…
dicíime por qué nun escapar
otra nueche a vela.

Güei la lluna ta enriba
y la estrella más brillosa
alluma’l mio camín…
de xuru, Nunca Xamás
nun va ser lo mesmo
pero quiero tar nel so xardín.

Dacuando él nun s’entera
(anque otres dase cuenta)
pero nun importa que tea ellí…
porque voi volver pel alborecer
pa cóseme, y pa que les faes
creyan en min.

Va cuántos años nun te siento
nin al otru llau del teléfonu.
Va cuantayá que me pruyen les ganes
de nun tener qu’escaecete
pa volver a imaxinate.
Pasen los años y ñúblase’l to recuerdu
efímeru…
d’aquellos díes soleyeros
d’aquellos fríos iviernos.
Munches veces véote nos suaños
y sin querelo piérdote de nuevo.
Llámote, siéntote…
recuérdote como enantes.
La to risa,
los tos llabios
la guapura del to cuerpu.
Y dóime cuenta de que yá nun queda más
que’l to recuerdu.
¿Qué foi d’aquellos inxenuos?
¿Qué foi d’esi tiempu de besos?
…
Dame pena nun saber
qué foi de too aquello.

L’orbayu pintaba’l rocíu nel mio pelo
y el soníu del silenciu glayaba naquel llugar.
Rises infinites blincando al rodiu
del inmensu mundu
que dexamos apartáu per un momentu.
Quixi convertime en gavilueta
y esnalar sele,
coles ales frayaes,
sin descansu,
col xiblíu del aire
qu’enguedeyaba l’arume la mar.
Lloñe, la sablera
acueye miraes perdíes
de pensamientos ensin vida
de fales solitaries.
Lloñe,
un horizonte perdíu
ya infinitu,
avérame a esos requexos
que naguo algamar algún día.

De ti quédenme los silencios
de los domingos amargos.
Quédenme les veces
enllenes de suaños por cumplir,
y les llárimes perdíes
na batalla por ganar.
De ti nun me queda más
qu’un murniu sentimientu
d’alcordances
tovía llenes de resentimientu.

De ti nun me queda más qu’esto.

Pero ye de lo nueso lo que queda
nesos díes d’andances
nos caminos de la xuventú;
de les promeses incumplíes
coles que xugamos como neños;
de los besos adormecíos
y tolo que sufrimos con ellos.

Nun queda más de ti,
nun queda más de mi,
nun queda más de la palabra nosotros.

Porque nosotros nunca fuimos nin tu nin yo,
nosotros enxamás fuimos los dos.

Pa mi yeres llibertá,
ciudá de mio.
Tardes de fumu y rises
al alcuentru de tiempos meyores.
La vida enllenábase de ti
naquellos abellugos pa lo nuevo,
pa los saberes desconocíos.

Nun había puntos de fuga
nel cuadru del nuesu mundiu.
Nun había mieu
nes nueses pallabres,
nos nuesos xuegos.

Namái priesa por vivir,
namái ganes d’afuxir.