«Sobrante d’un foriatu recortable» de Milio Ureta (Escena 6ª)

SESTA ESCENA DE SOBRANTE D’UN FORIATU RECORTABLE

Bienllegaos y bienllegaes a un episodiu nuevu d’esta collaboración col autor Milio Ureta, ganador del Premiu Pachín de Melás de testos teatrales por esta mesma obra que tan xenerosamente comparte al traviés de Formientu Dixital cola complicidá de la editorial Impronta. Nesta ocasión dexamos atrás dos escenes; una en casa del EXCRITOR y otra colos ANALISTES na marisquería na que trabaya el FORIATU. 

Volvemos entóncenes güei con ARXENTA, la moza que yá conocemos de cuando la difembaquia y la floristería y que, esta vez, esnortiada y a recaos pel Eixample barcelonín, cuéye-y al vuelu una llamada de teléfonu al so amigu.

Saludu.

DELLA MATERIA FECAL

Tamos nuna rampla principal del enanchamientu barcelonés. O directamente en Passeig de Gràcia. Ye media mañana y hai tráficu abondo, y xente ocupao con priesa que camina abaxo y enriba y nun apara por nada. ARXENTA, qu’anda acelerada a compres [o a dalguna xestión que nun-y apetez iguar], fae apartación pa un llau pa escolingar con menos dificultá’l teléfonu móvil que nun-y dexa de sonar. Nes ceres de la rampla, los cascoxos nes caxelles mariñanes del pavimentu diseñáu por Gaudí dibuxen de sópitu a los sos pies un océanu inmensu de cementu y de vórtices y estrelles. Xunta esta ARXENTA venusina, como ñacida dafechu na escuma mañanera del fumu y l’asfaltu, los coches na calzada pasen y pasen a too meter. O aparen, sin non, toos a una cuando-yos toca, en semáforu correspondiente.

ARXENTA

¿Sí? ¿¡Hola!? […] Esperá. Esperá ho Que xusto […] Toi… Que nun sé ónde toi. ¿D’ónde salís? Sí. Sí pueo. Pillástime en semáforu Pero yá. […] ¿Dende ónde llamás? Ah coima. Nun m’apaecía’l to númberu. Yá. Ai Yo toi pasiando per esti Eixample tan maraviosu de los mios amores Masque… Nortiando como lloca perdida que yá nun sé áu piso Nenu. Estos catalanes coles aveníes son la madre que los traxo. […] Plà Cerdà dixeren… Igual da lo que me proponga que Siempre siempre me pierdo nesti dameru’l diañu. ¡Que sí Que sí pueo! Dicíme. […] ¿¿Pero qué me tas cuntando?? […] […] (Baxando la voz) ¿¡Que-y caguesti na c…!? […] Cómo na casa. ¿¡¡Que-y caguesti en suelu la cocina!!? Esperá esperá… Espera Namás que siente un pocu pa nun cayer de culu…

ARXENTA sienta nun bancu, o una silla afayadiza d’una terraza tovía vacía de clientes.

Pero tu tas COMO UNA TEYA (rise). ¡¡Tu tas pa zarrar!! […] ¡Nonon! ¡Tu non! ¡LA QUE VOI DIME PELA PATA ABAXO SOI YO! ¿¿¿QUE-Y CAGUESTI EN SUELU… DE LA COCINA LA CASA??? (Escentella nuna risa que desdibuxa’l restu de la rampla). Ai Yo contigo desórinome Nenu. ¿Pero tu nun dicíes que volviéis tar bien? […] Home Si mos ponemos a muncho afinar Él yera una mamarracha. […] ¡Asina lu garre una conxuntivitis de camaleón Cola savia la planta! […] ¿¡Que tenés tu la planta!? Per… ¡Pero MONGOL! […] Val… Perdón Sí Que nun s’ha dicir mongol… ¡Pero esa planta ye feísima! ¡Que non Que ye horrenda! […] ¡¡Que salvesti a la asquerosa la planta!! (Rise). Ai Nenu Apará un pocu que vas faceme mexar y toi na cai… ¡AI! Diz que […] Y que-y entafarresti de mierda too ¿¿Cómo too?? […] ¡Los llibros Les notes… TOO! ¿¿Y el PC tamién?? ¡Ai Qué ascu Por dios!  […] Ah ¿SÓLO’l tecláu? […] ¡¡¡Home EL TECLÁU YE’L PC!!!

ARXENTA doblada de risa, y malpenes acierta a falar.

Apará Apará por favor (rise). Nenu Apará (rise) ¡¡¡Que me mexo encima!!! […] ¡Pero… tas comounaputateya! […] ¡¡Van partite la cara!! ¿¿Lo sabés non?? […] Pero ¿Cómo foi? […] ¿Diote un apretón? Que tabes allá recoyendo Y […] ¿Cómo que teníes la llave?[…] Ah Pa sacalo too Entiendo. Y el dios de la narrativa aguiyadora nun taba. Taba nel Olimpu. […]Y la llave dexésti-yla allá.Ahá. […] Espetada na caca. Porque primero tu sentesti en metá la cocina pa facer caca. Llóxico Sí. Too mui normal. (Muerta risa) ¿Y mexéstite tou penriba? (Rise). Home. Babayín Nun te lo dio pa pensar en quitar los pantalones. […]Si llega a entrar… Ai Si entra nesi momentu […]¿Sabés qué te digo? Que ficisti MUI BIEN. Una mierda asina Llama a la mierda siempre. Taba pidiéndolo a puros glayíos. A gritu peláu. […] Glayaba por hosties cada vez qu’abría boca L’escritorucu Cari. […] Yá.

¿Cómo que te sentís un emigrante? ¿Pero me lo dicís o me lo cuntás? […] Sí Claro. ¿Y tu nun lo sabíes? ¿Que Barcelona a los efectos ye Estocolmo!?[…] Ai Nenu Apará un pocu Poné la oreya y atendéme bien. Los maricones somos SIEMPRE emigrantes. Si nun emigrás Tas fadíu. Emigrás de too. De to ma De to pá. De los tos güelos De tos hermanos. De tola to familia. Del campín en que xuguesti de nenu Del patiu la escuela De too. De too. Emigrás de ti mesmu. De lo que siempre pensabes De lo que suañabes De lo que queríes De lo que proyectabes. Emigrás y acabóse. Y Darréu entamás de cero. Ensin identidá vieya Ensin nada. Nun ties nada cuando emigrás. Neto qu’un africanu en patera. […] Oki Con papeles y ensin tanta fame… Pero Esi yes Tas tu y ta l’agua inmenso. Y yá. Y gracies. Nun ties nada. Y entóncenes tócate facete una identidá. Asina ye. […] Emigrás d’aquél que fuisti pa la to xente Dica’l que vas ser agora. Esi ye’l viaxe…

Silenciu.

¡¡Quéxate tu Fíu de puta!! ¿Qué pensás que yo ñací en cubil que vivo? ¿Qué cuidás que cuando yo colé de mio casa yera la puta chiflada que soi agora? ¡Tenía de TOO allá! ¿¡Oyisti!? ¡DE TOO! Mio pá adorábame. Sólo que tuvi a nada A un pelu de perdeme nun detallucu. La mio dignidá. Ésa perdíala si quedaba con elli. Por eso garré un avión y canté’l ‘No llorés por mí Argentina’. Y adiós mui bones. […]Nononón. Perdoná tu un maticín Ho. Yeres un EMIgrante cuando colesti… Agora yes un putu INmigrante. ¿Quedóte claro? Porque hai una diferencia escomanada ente lo uno y lo otro… […] Obvio. […] Obvio. […] Val. Val Sí Yo tamién teo de dexate.

Hospá Nin DEXÁTE DE TANTO CARGAR DATOS Y GARRÁ ÚN DE CONTRATU Castrón. Oki. […] ¿Cómo en ZARA? ¿Agora vas trabayar en ZARA? Mirá que yes maraxudu Eh… ¿Primero actor y agora dependiente de ZARA? Home Nin […] Escuchá Namái te falta la guía turística y ties la tríada marica. […]Sisí. Al tiempu. […] ¿Cómo alarmes…? ¿¡Instales alarmes agora!? […] Tu güei me matás.[…] Aaaaaah. ¡Les alarmines de la ropa! Por un momentu teníesme fascinada (rise). ¿Pero esi trabayu esiste? Asegúrote… Non. Asegúrote que naide nun ye a albidralo. […] Homeee A ver si me consigues un foulard o dalgo ¿Non? […] Dalgo pequeñuco que nun se note. Claro claro. […]¿Y la marisquería Entós? Home yera un sitiu mui del ‘fascio’. […] Cierto. […] Cierto. […] Eso pásavos por nun comer concha (rise). Ye broma.

Ai Sí Que me fae ilu. Si l’Amancito Ortega ye’l más ricu España Nun creo qu’un foulard menos-y esgoncie’l negociu. […] Venga Un besu. Cuidáte tu. Y si t’agobiás Pasá a veme. […] Equí tou dios ye inmigrante. A lo menos n’apartamentu Y amás tenemos de too. […] Bon día Guapu. Y polo que más quieras Olvidá a esi mierdán. […] Eso. (Ríe)

Mierdán doble Agora. Un besu.                                                 

Escuru.