Decisión hestórica: El PEN Asturianu aceptáu nel PEN Internacional

En Centru Pen Asturianu presentó la so candidatura nel reciente 92.º Congresu Anual de Pen Internacional, celebráu en llinia los pasaos 29 y 30 de setiembre baxo’l lema “Escritores en riesgu nel tiempu de la IA y el desorde mundial”.

Tres la votación, quedó formalmente almitíu como miembru de plenu drechu cola aprobación de los congresistes, integrándose d’esta manera nuna rede de cásique 150 centros qu’agrupa a escritores de más de 100 países y con más de 25.000 socios. Con esta incorporación rematen dos años de xestiones, contactos y trabayu de les persones fundadores d’esti Pen Asturianu.

Pela parte asturiana participaron nesti Congresu les escritores Berta Piñán, presidenta del Centru Pen Asturianu; Consuelo Vega, vicepresidenta; Esther Prieto, secretaria, y Henrique Facuriella, tesoreru. La presidenta Piñán, que defendió ente les delegaes y delegaos la candidatura asturiana, faló brevemente de la situación de la llingua asturiana y de la so lliteratura, ininterrumpida dende’l sieglu XVII y consolidada nos últimos cincuenta años, asina como de les dificultaes presentes y de los valores compartíos con Pen Internacional.

Pen Internacional fundóse en 1921 n’Inglaterra como Pen Club (acrónimu de Poetes, Ensayistes y Narradores) y anguaño acueye tamién a periodistes, editores, blogueros y persones relacionaes cola espresión creativa mediante la pallabra. Ye una asociación de calter mundial que persigue la collaboración ente autores, la llibertá d’espresión y concibe la creación como un bien común patrimoniu de la humanidá. Amás de les actividades lliteraries, realiza un intensísimu llabor en favor de los drechos llingüísticos, la non discriminación de les muyeres escritores y la defensa d’autores en riesgu o en prisión por motivos ideolóxicos y de llibre espresión.