La Residencia Lliteraria Xixón recibe a la escritora catalana Montse L. Tolosana
L’autora va participar en delles actividaes dientro del festival de llingües y cultures Festillingües, n’Avilés XIXÓN 28/09/2026 | La Residencia Lliteraria Xixón recibe ente los meses…
L’autora va participar en delles actividaes dientro del festival de llingües y cultures Festillingües, n’Avilés
XIXÓN 28/09/2026 | La Residencia Lliteraria Xixón recibe ente los meses de setiembre y ochobre a la escritora catalana Montse L. Tolosana, que trabayar en narrativa de ficción mientres la so estancia. La so presencia va tener tamién delles actividaes dientro del Festillingües, festival de diversidá llingüística que celebra la segunda edición n’Avilés, nel edificiu de l’Antigua Pescadería de la villa.
El vienres a les 19 hores va participar nel recital lliterariu y musical interllingüísticu con acompañamientu musical de Carla Miranda y autores como Esther Prieto o Diego Solís. El sábadu a les 17 hores va participar, nel so perfil como bibliotecaria, nun diálogu a dos cola bibliotecaria asturiana Esther Martínez. El sábadu tará na mesa central del Foru de les Llingües y les Cultures con Arantxa Margolles (Iniciativa pol Asturianu) y María del Carmen Méndez Santos, profesora de la Universidade de Vigo. Yá’l domingu va dase llectura dramatizada a un testu de l’autora, a les 12:30 hores.
L’autora
Montserrat López Tolosana nació en Lleida en 1967 y robla como Montse L. Tolosana. Escribe tanto ficción como non ficción; nesti últimu casu, trátase sobre manera de llibros de cocina. Foi collaboradora d’El Periódico ente 2005 y 2009 y siguió espublizando artículos de forma esporádica en delles revistes y nel Bibarnabloc.
Les sos obres de non ficción espublizaes son, per orde d’apaición: Viatge nutritiu, un llibru escritu en collaboración con Isabel Celma, (les sos primer y segunda ediciones corrieron al cargu de Montflorit y la tercer y cuarta al cargu d’Editorial Icària); y Cuina antiinflamatòria. Receptes per al dia a dia, con dos ediciones que fueron espublizaes por Neret Edicions. Na actualidá, xunto cola ilustradora Maria del Mar Riera, trabaya nun llibru de cuentos y recetes saludables pa neños, que Neret espublizará n’abril de 2027, si too va según lo previsto.
Les sos obres de ficción gallardonaes son la novela Som aquí, ganadora del Premiu de Narrativa de la Ribera d’Ebre 2025, y la obra de teatru Laura, ganadora del Premiu Jaume Vidal i Alcover nel marcu de los Premios Ciutat de Manacor 2026. La primer obra recueye fragmentos de vida de cuatro xeneraciones d’una familia; la segunda ye tamién un drama rural centráu en tres hermanes. Dambes obres comparten una perspectiva feminista y tán escrites nuna variedá dialectal propia de les Terres de l’Ebre, anque les dos tienen versión en catalán estándar. N’ochobre de 2027 vien trabayar en dellos de los sos proyectos na Residencia Lliteraria Xixón.
Residencia Lliteraria Xixón
L’escritor y xestor cultural Inaciu Galán vivió nesti espaciu a lo llargo de cuasi una década y en 2023 punxo a disposición l’apartamentu pa la creación lliteraria dende Xixón, buscando tender pontes con otres lliteratures, otres llingües, otres cultures…
La Residencia Lliteraria Xixón abrió les sos puertes a finales de 2023 y dende entós vien recibiendo a escritores y traductores con proyectos de creación, ente los que destaquen David Uclés, Marisa Martínez Pérsico o Ramón Caride.