La sociedá llangreana abre les puertes al públicu nun actu lliterariu y musical
El sábado 25 de xunetu de 2026, la centenaria Sociedad Recreativa y Cultural La Montera de Sama (Llangréu) convida a tola sociedá del valle del Nalón y Asturies al actu de puertes abiertes onde se van entregar los premios correspondientes a la IV Edición del so Certame Internacional de Cuentos Curtios “Mánfer de la Llera”. Esti actu de celebración de la lliteratura y recuerdu del poeta de Les Cuestes (Ciañu) va tener llugar a les 13:00 hores nel salón central de la sede de La Montera nel númberu 29 de la cai Leopoldo Fernández Nespral. Amás d’entregase los premios, La Montera va presentar el llibru de los trés primeros años del certame con tolos cuentos ganadores y va intervenir la banda Gaiteros del Carbón.
Los cuentos ganadores d’esti añu fueron Sobre la busca de la perfección llingüística como trestornu de fala, del músicu y escritor Xaime Fernández, na categoría d’adultos n’asturianu, y Manolín el cabreru, de Samuel Tolosa Niembro, na de menores n’asturianu. La participación abondosa y imaxinativa de neños de terceru de primaria llevó al xuráu a proponer un accésit al cuentu Xuanín númberu unu y los arbeyos máxicos de Martín Pérez Guinea.
Na categoría d’adultos en castellán premióse’l cuentu Carolina somos todos del autor d’Alcalá d’Henares Juan Carlos Muñoz. Por segundu añu consecutivu, el premiu al meyor cuentu pa menores en castellán viaxó al otru llau del Atlánticu, concediéndose al autor limeñu Bruce Brad Oskar Silva Conchucos pol cuentu Todo lo que dejamos encendido.
L’actu va zarrase cola interpretación del himnu d’Asturies siguíu d’un pinchéu al que tán convidaos autores y les sos families, xuraos y miembros del comité de llectura previo, la familia de Mánfer de la Llera y autoridaes asistentes.
