L’Academia pon en marcha la campaña #UnMinutínpaLliteratura2020
L’Academia de la Llingua Asturiana asoleyó n’ochobre’l númberu 36 de la revista Lliteratura. Col envís de promocionar esti númberu, de 173 páxines, baxo la direición de…
L’Academia de la Llingua Asturiana asoleyó n’ochobre’l númberu 36 de la revista Lliteratura. Col envís de promocionar esti númberu, de 173 páxines, baxo la direición de la escritora y académica Marta Mori, y que poles circunstancies nun pue presentase n’actos presenciales, l’ALLA pon en marcha la campaña #UnMinutínpaLliteratura2020.
Como resultáu del trabayu nes aules o de les llectures doméstiques, propónse-y a la reciella escoyer y lleer un cachín (d’un minutu o menos) del númberu 36 de la revista Lliteratura. La idea ye que, al traviés de dalgún formatu audiovisual, les families y les comunidaes educatives compartan estes llectures en Twitter y/o Facebook (anque n’orixe vengan d’otres plataformes como Tiktok o Instagram).
El vienres pasáu, cola llectura de Marta Mori, directora de la revista, dióse’l barrenazu d’empiezu d’esta campaña. Tres d’ella, al llamáu de #UnMinutínpaLliteratura2020, espérense les llectures de tola xente menudo que s’avere a la revista, seyan alumnáu de llingua asturiana o llectores en xeneral. Esta acción quier da-y tol protagonismu a la xente n’edá d’escolarización obligatoria, pero tamién almite dalguna collaboración de persones adultes, profesoráu y escritores.
Otru de los primeros videos asoleyaos foi’l d’Enrique Carballeira, con una animación del so cuentu, presente na revista.
Más información sobre la revista: Los testos infantiles y xuveniles protagonicen el númberu 36 de la revista «Lliteratura»
