Xaime Martínez gana’l concursu de rellatos curtios ‘Xosé Caveda y Nava’
L’escritor Xaime Martínez ye’l ganador de la décima edición del concursu de rellatos curtios ‘Xosé Caveda y Nava’ que convoca’l conceyu de Villaviciosa, con una dotación…

L’escritor Xaime Martínez ye’l ganador de la décima edición del concursu de rellatos curtios ‘Xosé Caveda y Nava’ que convoca’l conceyu de Villaviciosa, con una dotación económica de 1000 euros y Mazana de Plata conmemorativa como premiu.
El xuráu, qu’aconceyó’l martes 17 de payares nel Atenéu Obreru de Villaviciosa y tuvo nesta ocasión formáu polos escritores Marta Mori, Xavi Cayao y Gonzalo G. Barreñada, ganador de la edición anterior, actuando como secretariu del mesmu Pablo Suárez, del Serviciu de Normalización Llingüística de la Comarca de la Sidra, escoyó ente toles obres presentaes la titulada “Cantar los perros”, rellatu del que se destacó la combinación d’escenes cotidianes retrataes de manera fiel con elementos fantásticos, la estructura cuidada y el bon usu llingüísticu, que tres l’apertura de la plica resultó ser obra d’esti autor natural d’Uviéu.
⠀
⠀
Xaime Martínez Menéndez (Uviéu, Asturies, 1993) ye escritor, filólogu y músicu pop. Tien espublizaos llibros de poesía en castellán y asturianu, como 𝘍𝘶𝘦𝘨𝘰 𝘤𝘳𝘶𝘻𝘢𝘥𝘰 (2014, premiu Antonio Carvajal de Poesía Joven), 𝘏𝘪𝘣𝘦𝘳𝘯𝘪𝘢 (2017, Premiu de la Crítica d’Asturies), o 𝘊𝘶𝘦𝘳𝘱𝘰𝘴 𝘱𝘦𝘳𝘥𝘪𝘥𝘰𝘴 𝘦𝘯 𝘭𝘢𝘴 𝘮𝘰𝘳𝘨𝘶𝘦s (2018, Premio Nacional de Poesía Joven Miguel Hernández en 2019).
Espublizó tamién dos álbumes col grupu La Bande, amás de 𝘖́𝘴𝘤𝘶𝘭𝘰𝘴 𝘥’𝘢𝘨𝘶𝘢 𝘯𝘦𝘭 𝘐𝘮𝘱𝘦𝘳𝘪𝘶 𝘈𝘴𝘵𝘶𝘳𝘪𝘢𝘯𝘶 (2018), un llibru-discu individual. Foi cofundador de la revista de lliteratura moza Oculta Lit y dedícase a la investigación sobre la lliteratura del sieglu XVIII na Universidá d’Uviéu y a la enseñanza. 𝘓𝘢 𝘧𝘶𝘦𝘳𝘤𝘪𝘢 𝘰 𝘭𝘦𝘴 4 𝘦𝘱𝘪𝘧𝘢𝘯𝘪́𝘦𝘴 𝘥𝘦 𝘔𝘢𝘳𝘵𝘪́𝘯 𝘍𝘦𝘪𝘵𝘰. Una novela de vaqueiros (2021), la so primer novela, foi recientemente publicada n’español col títulu 𝘓𝘢 𝘧𝘶𝘦𝘳𝘻𝘢 𝘰 𝘭𝘢𝘴 4 𝘦𝘱𝘪𝘧𝘢𝘯𝘪́𝘢𝘴 𝘥𝘦 𝘔𝘢𝘳𝘵𝘪́𝘯 𝘍𝘦𝘪𝘵𝘰. 𝘜𝘯𝘢 𝘯𝘰𝘷𝘦𝘭𝘢 𝘥𝘦 𝘷𝘢𝘲𝘶𝘦𝘪𝘳𝘰𝘴 (2023). La so última publicación ye’l poemariu billingüe 𝘗𝘢́𝘣𝘪𝘭𝘶𝘮, na editorial catalana Ultramarinos.
