El XVIII Premiu Alfonso Iglesias de Cómic n’asturianu yá tien ganadora, siendo’l primeru de los convocaos pola Conseyería n’emitir un fallu. L’autora xixonesa Arantza Margolles Beran (1982) fíxose col premiu pol so cómic Slečno. La obra inspírase nel diariu de viaxe d’una muyer asturiana con raíces en Moravia que se tresllada a Olomouc p’aprender checu y asina averase al pasáu de la so familia. El gallardón, convocáu pola Conseyería de Cultura, Política Llingüística y Deporte y dotáu con 6.000 euros, inclúi la publicación de la obra premiada, de la que’l xuráu valoró “la orixinalidá y coherencia de la propuesta gráfica” y la so capacidá pa entetexer memoria personal,familiar y social.
El xuráu d’esta edición tuvo compuestu pol filólogu Marcos Martínez, la ilustradora Mónica García y l’escritor Agustín Cernuda del Río, ganador de la última convocatoria. Les integrantes del xuráu destacaron “la orixinalidá y la coherencia de la propuesta gráfica, asina como la espresividá cola que se constrúi una historia personal que s’entetexe cola memoria histórica familiar y social”. Margolles articula un rellatu con carga emocional nuna reflexón sobre la identidá y la memoria.
El Premiu Alfonso Iglesias, promovíu pola Conseyería de Cultura, Política Llingüística y Deporte, ta dotáu con 6.000 euros y inclúi la publicación de la obra ganadora. A la convocatoria podíen presentase trabayos inéditos, non premiaos n’otros certames, de temática y estilu llibres, mesmo en forma d’hestoria única que baxo’l formatu d’un conxuntu de relatos, con una estensión mínima de cincuenta páxines.
Arantza Margolles Beran ye llicenciada n’Historia pola Universidá d’Uviéu y cunta con estudios de posgráu pola Universidá Autónoma de Madrid. Collaboró en dellos medios de comunicación asturianos y ye responsable de la sección d’efemérides del diariu El Comercio. Coles mesmes, presentó’l programa Historias y Misterios na RTPA y ye codirectora del periódicu A quemarropa, vinculáu a la Selmana Negra de Xixón. N’asturianu, ye autora de Fuimos granos d’arena. La solidaridá n’Asturies énte’l desastre d’Annual (2004) y de la novela histórica Santu Amaro, obra cola que llogró’l Premiu Muyer d’Ediciones Trabe nel 2025.
