«París, ho (là, là!)», d’Andrés Astur Treceño García

Yá que nunca nun tuvimos
Louvre cola Mona Lisa
arrodiada de turistes xaponeses
y la so vida col flax
encesu,
yá que nunca cenamos en Maxim’s
escargots de los
que mio güelu llamaba cascoxos,
yá que nunca pudimos almirar
la inmensidá de les cases que formen
un llagu blancu alredor
de la Tour Eiffel
nin siquiera pudimos celebrar
nengún trunfu baxo nengún arcu;
yá que tan poques coses,
amor,
pueo facer yo pa que vuelvas rir
como enantes,
voi llevate a la rive gauche del Seya,
onde quiciabes
tu y yo seyamos los de siempres.