L’autor Diego Solís, escritor de poesía, docente y codirector de Formientu, presenta güei na Llibrería Cervantes d’Uviéu el so poemariu nuevu «Volvemos en 6 minutos», un proyectu que va más p’allá del clásicu poemariu y que salió p’alantre gracies a un crowdfunding.
L’actu, nel que l’autor va tar acompañáu d’Inaciu Galán, entama güei 2 d’avientu na Llibrería Cervantes d’Uviéu a les 19 hores.
Volvemos en 6 minutos ye un llibru n’asturianu innovador dafechu: colos anuncios que nos arrodien fai una obra poética qu’axunta tradición, cultura pop y una visión singular de la realidá dende un zapping televisivu. L’autor diz crear esti llibru y esti proyectu enantes y demientres el confinamientu provocáu pol andanciu de la COVID-19. «Pensando que neses redes sociales, neses series o neses películes y na publicidá que nos bombardia hai un llinguaxe poéticu que podemos faer de nueso y desautomatizar».
El llibru, amás de tar entamáu d’esa manera conceptual, va poder lleese o escuchase, en cuantes que los poemes van dir en cada páxina con un códigu QR onde podrá sentise al autor recitar les composiciones. Amás, sofítase tol proyectu nes ilustraciones de la diseñadora gráfica Inés H., inspiraes nos poemes del autor. Poesía que se llee y siente, qu’entretién y emociona, que forma parte de la lliteratura, pero tamién del mundu qu’habitamos: poesía total. Preténdese, con ello, asoleyar una campaña publicitaria (qu’amás ye parte del propiu proyectu artísticu) ensin precedentes na lliteratura asturiana onde se faigan, colos poemes y ilustraciones, camisetes, llámines, totebags, marcapáxines y artículos de promoción variaos, amás de vídeos promocionales orixinales con tales composiciones.
Al traviés de tola obra alcontrámonos con una llectura fácil y que viaxa ente la televisión y lo dixital. Como nun podía ser d’otra manera, Volvemos en 6 minutos anicia’l so camín dende la Televisión del Principáu d’Asturies y con daqué tan clásico de la cadena como una película de vaqueros que viaxa hasta Les Vegues y el so famosu cartelu, anque nesti casu fálase de Corvera, non de Nueva York.
TCM, Netflix, HBO… toa una montonera de plataformes y canales coles qu’esfrutar o rabiar tienen sitiu nesti proyectu a mou de crítica social con películes y series, como La Naranxa Mecánica, Black Mirror (o espeyu negru) o La Llamada, ente otres. Pero non solo eso. Nun mundu dixital onde la televisión va perdiendo fuercia, les aplicaciones del móvil garren tamién un papel bien importante na composición de Volvemos en 6 minutos, criticando la cuasi dependencia y la necesidá del so usu per parte de la sociedá en xeneral. Too ello pa rematar… como cuasi siempres rematen les canales de televisión: con una pausa publicitaria de contino que va de 6 minutos en 6 minutos, anque nesti casu la intención seya volver hasta lo eterno, daqué que cuasi se pue facer colos códigos QR qu’escuende cada poema del escritor xixonés.
De toles maneres, esti proyectu, como diximos, nun ye namás qu’un llibru y nun ye namás un trabayu del escritor Diego Solís. Detrás de tola xera gráfica ya ilustraciones alcuéntrase Ines H., diseñadora gráfica, y DJ. El Joker, Whitney Houston o Billy Elliot son dalgunos de los personaxes a los que la diseñadora se refier como complementu a dellos poemes, formando un conxuntu d’arte lliterariu y visual ensin precedentes na lliteratura asturiana y que tien el so formatu fuera del llibru con camisetes, taces, coxinos, marcapáxines o imanes, amás d’un llargu etcétera de productos.
