Etiqueta: torna

  • Trabe presenta «Les dos Torres», la segunda parte de la triloxía de Tolkien

    Trabe presenta «Les dos Torres», la segunda parte de la triloxía de Tolkien

    Esti xueves, 1d’avientu, Trabe anicia’l mes cola presentación de Les dos torres, la segunda parte de la triloxía d’El señor de los aniellos de Tolkien que tornó al asturianu Nicolás Bardio. Nel actu, qu’entama na Llibrería Trabe (C/ Fernando Alonso 17, baxu dcha.) d’Uviéu a les 19:00 hores.

    L’editor Stanley Unwin pidió-y a Tolkien qu’escribiera una secuela pa El hobbit (1937) y eso afalólu a entamar la que diba ser la so obra más famosa, El Señor de los Aniellos, una novela de fantasía épica dividida en tres volúmenes (La Sociedá del Aniellu, Les dos torres y El regresu del rei), que foi publicada ente 1954 y 1955. Obra más importante de la lliteratura de fantasía, esta triloxía cuenta la historia de cómo los ferreros elfos forxaron los Aniellos del Poder y Sauron, el Señor de la Escuridá, l’Aniellu Únicu. Desque-y lu robaron andó tola Tierra Media a la busca d’él y nun foi a atopalu. Tiempu más tarde, y por casualidá, lléga-y a Bilbo Fardel, un hobbit del Condáu. A Sauron nun-y falta más qu’esi Aniellu pa ser a dominar la Tierra Media. En Les dos torres, segunda parte d’El señor de los Aniellos, la Sociedá formada por Frodo, Sam, Pippin, Merri, Reblagos, Gimli, Legolas, Boromir y el magu Gandalf, que tienen la misión de desapaecer l’aniellu na tierra de Mordor, desfáise y caún d’ellos va pel so camín. Mentanto, homes, elfos y nanos van preparándose pa entamar la batalla más grande nunca vista na Tierra Media contra’l señor del mal.

    J. R. R. Tolkien (Bloemfontein, Sudáfrica 1892-Dorset, Inglaterra 1973) foi narrador, poeta, llingüista y profesor universitariu británicu, conocíu sobre manera por ser a crear un mundu imaxinariu que se desenrolla nel continente de la Tierra Media y que va ampliando nes distintes obres que foi publicando a lo llargo la vida y de manera póstuma: El hobbit, El Señor de los Aniellos, El Silmarillion y Los fíos de Húrin.

    Nicolás Bardio (Uviéu, 1987) ye llicenciáu en Ciencies Polítiques pola Universidá Complutense de Madrid y máster n’Información y Comunicación especializáu en Periodismu pola Universidá Llibre de Bruseles. Traductor y narrador tien publicaes les noveles Sol reló (2008), novela negra qu’amesta la crítica social y política; Cuando ensamen les abeyes (2011); La colomina 36 (2020), ucronía d’espionaxe soviética cola que foi a ganar el Premiu Asturies Xoven de Narrativa 2019, que va yá pola 3.ª edición; y la novela de fantasía Del llau del nigromante (2020).

  • Trabe espubliza la torna al asturianu d’Anne de Someraos Verdes

    Trabe espubliza la torna al asturianu d’Anne de Someraos Verdes

    Ediciones Trabe espublizó nesti mes una torna nueva al asturianu, de la mano del escritor Xabiero Cayarga. Trátase de la obra Anne de Someraos verdes, qu’escribiera Lucy Maud Montgomery nel entamu del sieglu pasáu.

    Los hermanos Cuthbert, Marilla y Matthew, quieren adoptar un nenu güérfanu pa que los ayude na granxa Someraos Verdes. Por una retafila d’errores y casualidaes acaba llegándo-yos a casa una nena d’once años, Anne Shirley, llista como un esguil y revolvina, a la que nun-y presta nada nin el nome nin el pelo roxo que tien. Pa Marilla y Matthew va acabar siendo l’allegría de la vida y tamién pa más otra xente del pueblu marineru d’Avonlea, na Isla del Príncipe Eduardo, onde ta Someraos Verdes. Esta novela publicóse per primer vez nel 1908, tuvo delles secueles y foi llevada al cine y la televisión delles veces.

    La escritora canadiense Lucy Maud Montgomery naz na isla del Príncipe Eduardo nel 1874 y muerre en Toronto nel 1942. Maestra de profesión, poeta y collaboradora nos periódicos Chronicle y Echo, dexó delles obres publicaes, pero ye Anne de Someraos Verdes (y les secueles qu’apaecen más tarde) la que-y dio sonadía. Amás d’escritora reconocida dende bien nueva, Lucy Maud Mongomery foi una muyer adelantada al so tiempu y una de les primeres en graduase na Universidá canadiense.

    Xabiero Cayarga (Cangues d’Onís, 1967) ye amás de poeta (El deliriu d’esclavu, 2000; Pequeña Europa, 2001; Les llingües de la Hidra, 2006; La ñeve del cuquiellu, 2011; Mazanes d’iviernu, 2022), narrador (Les gatileres del cielu, 1994; Güelgues sobre’l llagu, 1996; A flor de piel, 2000; Obra en ruina, 2007; El boleru de Xabel, 1994; Trastes de bufarda, 2005; El sol negru de Wewelsburg, 2011; El cuentu atrás –antoloxía–, 2017) y escritor de testos teatrales (Favila, el príncipe reina, 2004), autor de dalgunes de les meyores traducciones, tanto poétiques como narratives, que se tienen fecho al asturianu, dende l’inglés (Adiós, Columbus, de Philip Roth, 2001) y l’alemán (Dellos poemes, de Georg Trakl –2006– y Obra lírica. Selección, d’Hugo von Hofmannsthal –2010–).

  • Calume asoleya la torna de Kim, de Rudyard Kipling

    Calume asoleya la torna de Kim, de Rudyard Kipling

    La colección Calume, dientro d’Ediciones Trabe, ta acabante d’asoleyar el númberu nuevu cola obra Kim, de Rudyard Kipling. Trátase de la séptima torna de la colección, que nesti casu foi cargu d’Eloy Antuña Zamarro.

    Nestes páxines apaecen dos mundos distintos, dos mundos qu’esisten unu al llau del otru, ensin que nengún entienda al otru. Nun tien que caer embaxo que la novela reflexa la dominación del Imperiu, l’adoración pola India victoriana y que ye, ensin dulda nenguna, una gran contribución estética a lo que los historiadores denomen «invención de la tradición». Sía como quier, y masque l’arume contemporaneu de la novela pueda incomodavos, nun vos dexar llevar polos estereotipos, nun la calificar nin como propaganda nin como tratáu políticu, nun la rebaxar de manera simplaya. Y ello porque esta novela ye muncho más que la historia d’un güérfanu irlandés discípulu d’un lama y, al tiempu, axente de la intelixencia británica. Una obra con bayura de matices y con una complexidá bultable pa lo que fai al estilu prosísticu. Una obra onde manda la busca de la identidá mesmo que la llucha ente llealtaes, con personaxes camaleónicos y onde Kipling fai que, dacuando, too suene divertío. Kim ye una novela d’espionaxe y d’aventures, con intriga, imaxinación, observación y fascinación por caún de los detalles. Y paga la pena, poques gracies.

    Rudyard Kipling (Bombái, 1865-Londres, 1936) foi un escritor (narrador y poeta) y periodista consideráu «l’escritor del Imperiu» por mor del so apoyu y de la so identificación pa coles polítiques colonialistes britániques. Ente les sos obres destaquen títulos como El llibru de la xungla y Kim –entrambes les dos llectures de referencia pal movimientu scout–, L’home que pudo reinar y Capitanes intrépidos, toes cuatro obres traducíes a bien de llingües y que cuenten con adaptaciones diverses (cinematográfiques, televisives, teatrales y animaes). A lo llargo de la so vida refugó galardones honoríficos británicos, anque sí aceptó’l premiu Nobel nel 1907 y la medaya d’oru de la Royal Society of Literature nel 1926 que lu reconocíen como unu de los grandes escritores anglosaxones de tolos tiempos.

    Eloy Antuña Zamarro (Llangréu, 1967) ye llicenciáu en Filoloxía Inglesa y especialista universitariu en Filoloxía Asturiana pola Universidá d’Uviéu. Dende’l 2002 ye responsable del Serviciu de Normalización Llingüística del Conceyu de Llangréu. Ente les traducciones feches por él ha destacase la de la novela Arguyu y prexuiciu de Jane Austen (Universos, 2011).

  • Trabe espubliza la segunda parte d’El señor de los aniellos

    Trabe espubliza la segunda parte d’El señor de los aniellos

    Ediciones Trabe ta acabante d’espublizar lo que ye la segunda parte de la triloxía famosa d’El Señor de los Aniellos. Trátase de Les dos torres, obra de J. R. R. Tolkien y con torna al asturianu fecha por Nicolás Bardio.

    L’editor Stanley Unwin pidió-y a Tolkien qu’escribiera una secuela pa El hobbit (1937) y eso afalólu a entamar la que diba ser la so obra más famosa, El Señor de los Aniellos, una novela de fantasía épica dividida en tres volúmenes (La Sociedá del Aniellu, Les dos torres y El regresu del rei), que foi publicada ente 1954 y 1955. Obra más importante de la lliteratura de fantasía, esta triloxía cuenta la historia de cómo los ferreros elfos forxaron los Aniellos del Poder y Sauron, el Señor de la Escuridá, l’Aniellu Únicu. Desque-y lu robaron andó tola Tierra Media a la busca d’él y nun foi a atopalu. Tiempu más tarde, y por casualidá, lléga-y a Bilbo Fardel, un hobbit del Condáu. A Sauron nun-y falta más qu’esi Aniellu pa ser a dominar la Tierra Media.

    En Les dos torres, segunda parte d’El señor de los Aniellos, la Sociedá formada por Frodo, Sam, Pippin, Merri, Reblagos, Gimli, Legolas, Boromir y el magu Gandalf, que tienen la misión de desapaecer l’aniellu na tierra de Mordor, desfáise y caún d’ellos va pel so camín. Mentanto, homes, elfos y nanos van preparándose pa entamar la batalla más grande nunca vista na Tierra Media contra’l señor del mal.

  • La traducción de «La palabra final. Diariu d’un suicidiu», de Roberta Tatafiore, gana’l Premiu Florina Alías

    La traducción de «La palabra final. Diariu d’un suicidiu», de Roberta Tatafiore, gana’l Premiu Florina Alías

    La traducción al asturianu de La palabra final. Diariu d’un suicidiu, de l’autora italiana Roberta Tatafiore, publicada por Ediciones Trabe y traducida por María Antonia Pedregal, foi la obra ganadora del segundu premiu Florina Alías a la meyor traducción al asturianu. Esti reconocimientu ta impulsáu pola Conseyería de Cultura, Política Llingüística y Turismu, al traviés de la Dirección Xeneral de Política Llingüística, y ta dotáu con 6.000 euros.

    Los integrantes del xuráu resaltaron «l’interés del testu orixinal, qu’aborda con naturalidá temes tabú y propón asuntos fundamentales pa la sociedá d’anguaño dende un puntu de vista sociolóxicu y filosóficu, como son el feminismu, el derechu a decidir sobre la propia vida, el papel del estáu na esfera de lo individual o la confrontación cola tradición relixosa».

    Tocante al testu asturianu, destácase «la facilidá de llectura, el trabayu de documentación pa tratar los temes científicos presentes na obra y la capacidá pa reflexar los matices del testu de Tatafiore, que van de la narración autobiográfica más personal a la reflexón intelectual», amás de la calidá de la edición. Esta obra, traducida dende l’orixinal italianu, recueye les vivencies reales y pensamientos de los últimos díes de l’autora, que decidió pone-y fin a la so vida nel añu 2009. Amás, trátase d’una obra non traducida al castellanu.

    El xuráu, presidíu pol director xeneral de Política Llingüística, Antón García, reunióse na Casina de la Traducción en Cadavéu y tuvo integráu polos profesores de Filoloxía Xuan Carlos Busto, Raquel Suárez, Cristina Valdés y Taresa F. Lorences, asina como’l traductor Miguel Sánchez Canella. Laura Marcos, filóloga de la dirección xeneral, actuó como secretaria.

    Los principales aspectos que valoró’l xuráu tienen que ver cola calidá de la traducción, el valor cultural y social de la obra orixinal y l’aportación que realiza la obra traducida al patrimoniu cultural d’Asturies.

    María Antonia Pedregal Montes (Uviéu, 1966) ye llicenciada n’Historia y Xeografía pola Universidá d’Uviéu y profesora d’Educación Secundaria. Publicó artículos en revistes académiques como Lletres Asturianes, Cultures, Asturiensia Medievalia, Studia Historica o Territorio, Sociedad y Poder y fexo estudios sobre la toponimia de delles parroquies d’Asturies. Como traductora, encargóse de la versión asturiana del Llibru de les maravíes del mundu, de Marco Polo (1996). Ye directora del Muséu Arqueolóxicu d’Asturies.

    El premiu Florina Alías a la mejor traducción al asturianu rinde homenaxe a la muyer que da nome al gallardón: Florina Alías (Colloto/Cualloto,1921 – Gijón/Xixón,1999), ganadora de la primer Xusta Poética de Traducción convocada en 1975. Foi una poeta y narradora que publicó los llibros Señaldaes del Sueve (1980) y Xente de casa (1974), ente otros. Amás, Alías ye toa una referencia de la lliteratura escrita n’asturianu de la postguerra. La primer edición d’esti premiu correspondió a la obra La Biblia en Llingua Asturiana, traducción interconfesional promovida pola Sociedá Bíblica.

  • Preséntase la torna al asturianu d’El cementeriu marín de Paul Valéry

    Preséntase la torna al asturianu d’El cementeriu marín de Paul Valéry

    El miércoles 12 d’avientu, a les 20 hores, na Llibrería La Buena Letra de Xixón, asitiada na cai Casimiro Velasco númberu 12, Ediciones Saltadera presenta la traducción al asturianu d’El cementeriu marín de Paul Valéry. Con prólogu y versión de Marta Mori, la presentación va facela l’escritor Juan Carlos Gea.

    Frutu d’un llargu periodu d’introspección y de madura reflexón, poques obres llíriques algamaron la repercusión ya influencia que llogró El cementeriu marín (1920) na lliteratura del sieglu xx. En palabres de la traductora al asturianu, Marta Mori, «la mestura de música y imaxe que pon los cimientos al poema acueye un monólogu onde’l poeta, partiendo de la contemplación de la mar, espresa les sos meditaciones sobre la esistencia humana. El fluxu del pensamientu, magar la so apariencia cambiante o movediza, ta, sin embargu, sometío a les llendes d’una composición metódicamente estudiada, atenta a los contrastes y les correspondencies ente los estaos de conciencia». El cementeriu marín consideróse mientres años como la obra más alta d’esa escuela o manera poética que se conoció (sobremanera en Francia y España) como poesía pura.

     

    L’AUTOR

    Poeta, ensayista y filósofu francés, Paul Valéry nació en Séte en 1871. Interesáu nel movimientu simbolista, foi miembru regular de les tertulies de Stéphane Mallarmé, alternando la so vocación poética con un trabayu como redactor nel Ministeriu de Guerra. Publicó en 1917 el so primer llibru de poemes, La xoven parca, siguíu d’El cementeriu marín en 1920 y Álbum de versos antiguos en 1921. Morrió en París en 1945.

    LA TRADUCTORA

    La traductora, Marta Mori, ye profesora, Doctora en Filoloxía Hispánica, miembru de l’Academia de la Llingua Asturiana y una de les más destacaes poetes de la lliteratura asturiana actual. Ganó en dos ocasiones el premiu Teodoro Cuesta de poesía (Pórticu, 2002 y El tiempu de la espera, 2004) y en 2010 el Xuan María Acebal tamién de poesía (La mio voz).

    AMUESA DEL LLIBRU

    EL CEMENTERIU MARÍN

    I

    Esti teyáu tranquilu, u abeyen les palombes,
    Ente pinos palpita, ente les tumbes;
    El sol del meudía enciende fueos nél.
    ¡La mar, la mar, siempre renovada…!
    ¡Qué recompensa, darréu d’un pensamientu,
    Posar la mirada na calma de los dioses!

    II

    ¡Qué trabayu puru de rellampios finos
    Consume los diamantes d’espluma invisible
    Y qué paz nello paez concebise!
    Cuando sobre l’abismu un sol reposa,
    Les obres pures d’una causa eterna,
    ​El Tiempu relluz y el Suañu ye saber.