Saltar al conteníu

Etiqueta: Cultura

Cultura llanza per primer vegada na llexislatura una convocatoria d’ayudes pa sofitar la creación lliteraria
La Conseyería de Cultura, Política Llingüística y Turismu llanzó la primer convocatoria d’ayudes pa sofitar la creación lliteraria d’autores asturianos que fai’l Gobiernu d’Asturies dende va más d’una década. La convocatoria, espublizada güei nel BOPA, establez dos llinies estremaes de financiamientu: la primera, pa profesionales autónomos que se dediquen al ámbitu cultural, y la segunda pa persones que’l so exerciciu llaboral nun tea venceyáu a la cultura.
La dotación de la convocatoria xube a 40.000 euros y el plazu de presentación de solicitúes ta abiertu dende mañana, 12 de xineru hasta’l próximu 3 de febreru
L’oxetivu ye sofitar la creación lliteraria d’obres orixinales ya inédites, col fin de sofitar la vocación artística de tolos ciudadanos y el desenvolvimientu plenu de les sos capacidaes. Les obres qu’alleguen van poder tar escrites en cualesquier de les llingües d’Asturies, n’asturianu o eonaviegu, y en castellán.
La llinia d’ayudes toma tolos xéneros creativos y establez los requisitos d’estensión pa les obres:
Narrativa (novela, novela curtia y llibru de relatos): un mínimu de 30.000 palabres.
Poesía: un mínimu de 500 versos.
Teatru: mínimu 20.000 palabres.
Cómic y novela gráfica: mínimu 40 páxines.
Ensayu, sobro una tema propia del campu de les humanidaes: mínimu 30.000 palabres.
Lliteratura xuvenil: mínimu de 20.000 palabres.
11/01/2023
Beatriz Quintana, Kai C. Torel y Pelayo Martínez, premiaos nel VII Entaína a escribir
La sétima edición del concursu de microrrellatos improvisaos «Entaína a escribir» celebróse’l miércoles cola participación d’once persones d’ente 14 y 35 años.
Esti concursu ye una iniciativa a comuña ente les direcciones xenerales de Política Llingüística y de Mocedá. L’actu celebróse na Sala Borrón d’Uviéu y cuntó cola presencia de los dos directores xenerales, Antón García y Marcos Torre.
La periodista y historiadora Arantxa Margolles actuó como presentadora y maestra de ceremonies. Nel actu, los participantes teníen qu’escribir un microrrellatu in situ a partir d’una frase escoyida al azar. Desque se conoció la frase, dábase-yos un plazu de 20 minutos pa rematar el testu.
El xuráu, formáu por Vítor Suárez (maestru y traductor), Miguel Sánchez Canella (traductor) y Laura Marcos (escritora), determinó que los testos más llograos fueron los presentaos por Beatriz Quintana, Kai C. Torel y Pelayo Martínez Olay, qu’algamaron el primer, segundu y tercer premiu, respectivamente. Estos premios consistíen nun llote de llibros y discos y la posibilidá de publicar el rellatu nun volume recopilatoriu. Amás, la ganadora va poder forma parte del xuráu del premiu Asturies Moza.
07/10/2022
Les XL Xornaes Internacionales d’Estudiu yá tienen abierta la inscripción
Les Xornaes Internacionales d’Estudiu de l’Academia de la Llingua Asturiana algamen les cuarenta ediciones esti mes de payares de 2022. La Facultá de Filosofía y Lletres de la Universidá d’Uviéu acueye tres xornaes d’actividaes académiques, ente los díes 8 y 10, con ponencies, comunicaciones y presentaciones que, en xunto, ufierten una güeyada amplia de l’asturianística que se fai dende fuera d’Asturies.
De les ocho ponencies programaes, siete son obra de profesores n’universidaes norteamericanes y una vien dende una universidá británica: Sonia Barnes (Marquette University), María Turrero y Andie Faber (Drew University), Miriam Villazón (University of California), Eduardo García (University of Massachusetts Amherst), Julio Villa (University of
Manchester), Francisco Fernández Rubiera (University of Central California), Covadonga Lamar (University of California) y Paquita Suárez Coalla (City University of New York). Los temes, de la lliteratura a la sociollingüística y de la pragmática a la emigración asturiana, abarquen un panorama bayurosu en perspeutives d’investigación.
La mesma variedá temática carauteriza a les nueve comunicaciones que tamién van presentase nes XL Xornaes Internacionales d’Estudiu y que completen un programa onde va haber espaciu pa tres presentaciones: la de los númberos más nuevos de dos de les revistes de l’Academia (Ciencies: Cartafueyos de Ciencia y Teunoloxía 12 y Lletres Asturianes 127) y del volume coleutivu Sound, Syntax and Contact in the Languages of Asturias, que dirixó y va presentar Guillermo Lorenzo, profesor de la Universidá d’Uviéu.
A lo llargo d’estes trés xornaes d’estudiu va afondase na lliteratura poética de Fernán Coronas, l’entornu causal n’asturianu, La propuesta d’una «Academia Asturiana» de Laverde Ruiz en 1878 o la situación del asturianu, ente otros temes interesantes.
Les persones matriculaes y qu’asistan a les Xornaes van recibir un certificáu acreitativu. Puedes inscribite calcando nesti enllaz: https://cutt.ly/IV3UESo
03/10/2022
Pablo X. Suárez llogra la Beca Asturies de Lliteratura Asturiana en Residencia pa estimular la creación lliteraria
El proyectu Retrablu rural, una mirada realista a l’aldea contemporánea de Pablo X. Suárez va ser beneficiariu de la Beca Asturies que sofita una residencia de creación lliteraria n’A Coruña para un escritor en llingua asturiana o eonaviegu ente’l 1 y el 31 de payares del 2022. La Conseyería de Cultura, Política Llingüística y Turismu impulsa la iniciativa en collaboración cola Residencia Lliteraria 1863.
El xuráu, que formaben los escritores Francisco Álvarez, Esther Prieto y Miguel R. Monteavaro, ganador de la beca na convocatoria anterior, destacó la propuesta narrativa mui bien estructurada y con una mirada novedosa sobre’l mundu rural asturianu. El xuráu destaca la calidá de tolos proyectos presentaos.
Pioneru y animador de les nueves tendencies de poesía oral n’Asturies cola creación de les Timbes Poétikes nel añu 2009 y la organización del festival Sacavera Sound, Pablo X. Suárez (Siero, 1981) ye, amás d’escritor, llicenciáu en filoloxía hispánica pela universidá d’Uviéu (2004), especialista en llingua asturiana (2006) y técnicu en normalización llingüística na Mancomunidá Comarca de la Sidra dende l’añu 2009.
Hasta la fecha tien publicaos los poemarios Pop Retórika (Glayíu, 2009) y Cómo evitar el apocalipsis (La novia de nadie,2016) en castellán; y Asturiana Beat (Trabe, 2005), El sistema débeme una chocolatina (Suburbia, 2011) y Little Babilonia (Saltadera, 2018), premiu Xuan María Acebal 2017, n’asturianu.
La so obra narrativa ta recoyida nel volume de relatos Yoni y yo (Suburbia,2010), Premiu de la Crítica d’Asturies en 2010, amás d’en revistes como Lliteratura, Campo de los Patos o Formientu. Con ella foi premiáu en varios concursus de cuentos.
Apaez en diverses obres colectives y antoloxíes. Como articulista, tien collaborao en medios como’l selmanariu Les Noticies, Diagonal, Nortes o El Salto diario. Na so faceta de poeta escénicu, mantién el proyectu El Velcro xunto col productor de música electrónica Dudu García, y tien pasao per varios festivales internacionales
30/09/2022