Etiqueta: Formientu 12

Escueita Salamanca.
Sí, Salamanca, fálute a ti.
Güei yes probe, barroca
nun yes ná lu que fuesti.
¿Quies que narre cúmu t’abandonasti?

La hestoria foi asina
pur enforma qu’apealu forga
nós, la xente autóctona
dexámoste mui ciega,
agora nun pides nin una prórroga

vésete, tas morriendu
y nun quies ayuda, ansias finare.
Mueitos fíos marchandu,
y nun pou comprendere
se van ensin parare de llorare

¿y nun quies ofrece-yos
la oportunidá de llevantate?
Tos facelu queremos
déxanos ayudate,
¡Barroca dexa facete la fuerte!

Nun pou sere tierrina…
Ha tiempu la tua fala escaecisti,
agora castellana,
la nuesa arreconasti
nas sierras, llonxe, al marxe de ti.

Dempués la tua cultura,
el nuesu sangre, sí, el llionés
l’ulviasti cun ñatura
¿Qué va sere dempués?
¡Dilu! Aforra’l sufrimientu pues.

Barroca, faime casu,
Quieru nas cais tornare a escueitare
el tópicu formosu
que te quison otorgare
entós podréi dexate d’anhelare

Quod natura non dat,
Salmantica non praestat .

Nun t’amurnies por min
tate tranquilu nesi mundu,
nun t’amurnies por min
nun me vengas col to embruxu.

Nun t’esmolezas por min
amor quemáu cual dibuxu,
nun t’esmolezas por min
nun supimos plantar el frutu.

Nun t’amurnies por min
podré superar tol arguyu,
nun t’amurnies por min
nun quiero ocultame ente’l mofu.

Nun t’esmolezas por min
del pechu yá salió esi nuedu,
nun t’esmolezas por min
nun tuñemos más col muriu.

Nun t’amurnies por min
llevantéme sola del suelu,
nun t’amurnies por min
nun hai nel mio pechu más xelu.

Nun t’esmolezas por min
mio corazón vuelve solu a llatir,
nun t’esmolezas por min
y menos agora que vivo sin ti.

Nun t’amurnies por min
que dende va tiempu yo yá soi feliz,
nun t’amurnies por min
yá nun lloro llárimes de sal por ti.

Mírame; metá persona, metá poeta
Trovador alloquecíu de revolcón y bragueta
Bardu cantando los sos cancios
Y quebrantos a nobles señores y dulces dames
Llocu suañador de mirada perdida
Llistu, que tamién intelixente, compositor de romances y balaes
Home a la so pluma pegáu
Ñariz al cuellu arimada
Mazana podre del cestu d’Eva
Cuchiellu sangrientu nel llombu d’Isaz.

Nun quiero volver a mirar la lluna
Qu’ayeri tu y yo mirábemos a la par
Nun quiero volvela a admirar
Pa min ya nun alluga guapura dalguna

Nun quiero notar el to cuerpo contra’l míu
Cola lluna como calláu cómpliz
De felicidá nun nos queda un ápiz
Agora, baxo ella , y ensin ti muerro de fríu

Nun quiero vela nin a ella nin a ti
Nun quiero volver a admirate, lluna mía
Quiero escaecer lo qu’un día sentí

Güei quiero más estremate que deseyate
Nun quiero volvete a amar
Agora nun quiero más cosa qu’escaecete

El to recuerdu llévenlu les foles serenes
Xunto con el lleven les mio penes
Lleven aquellos güeyos azules
De bocaes d’amor lleven miles

Lleven los recuerdos de la mio serena
Lleven l’amor que’l mio corazón cangrena
Lleven la felicidá y l’amor
Dexen la tristura y el dolor

Agora atristáyame’l morrer de les foles
Pésame’l pasu de les hores
Y nel pechu siento’l llatíu
D’un amor ya dormíu

La métrica y les sos llendes… son como los númberos y el contornu
d’un marcu inesistente.
Dexa llibre.
La poesía constrúise dende’l sentir y el suañar,
y eso nin tien métrica, nin tien llendes.

Nun afayaréis nesti poemariu una métrica o rima
que siga les normes de la poesía rítmica de siempres.

Fadrá esparros y blagos que mos gabitarán n’achisbar
la gueta d’un suañu estrañu.

¡Bisarma, esconsona! Espierta, esconsona. Llibera la
Fantasía
d’escribir
como te pete.

Retruca y siente. Entruga, ñega o asiente.

Pero dexa llibre.

Tanto falar de frayar cadenes… y estropiamos l’arte
poniendo-y marcos y rexes. Muries y verxes.

¡Bisarma, esconsona! Esconsona anguaño. Llibera la
Fantasía
d’escribir
como te pete.

Faigamos.

Xacíu, qué pallabra perguapa, xacíu. Y xeitu que vien a la fin a dicir lo mesmo; mesmamente eso: qué guapes son les pallabres. Una pallabra, esencia, si hai esencies, de la llingua. Y llingua, qué pallabra más ablucante cuando denoma un músculu que facilita la sonoridá la pallabra. La pallabra que se torna “visible”, móvil, pero tamién coles sos llendes… la pallabra. Como la pallabra qu’a vegaes, como too, imperfecha, nun aporta tresmitir lo que se talanta, lo que les semeyes del nuesu talantar arrepresenten.

La pallabra, intento de compartir lo más animal qu’esiste, lo más “enceso” qu’esiste, que ye eso, talantar.

Qué guapos son los sones qu’algamamos conxugando lletres; idegues d’un son sedríen, entós, les pallabres. La lletra, el son, la pallabra. La música que ye falar, como falar ye facer música. Llingües toes guapes, estrutures denomaes llóxiques, estrutures d’axeitar pallabres. Too ye andecha y sofitu nes pallabres, nes llingües… Pero qué mal les usamos.

Qué guapa ye la llingua, consensu de falar d’un pueblu. Murnia, sicasí, por ver cómo muerre la de nueso, viendo como muerre a la empar, el que la fala…

Xiblíos que xurden d’embaxo la tierra;
xiblíos amargoxos, buxos, con llerza;
xiblíos que cancien nos montes, na viesca;
xiblíos que remembren el son de la griesca.

Xiblíos empoxaos nel fondu la hestoria;
xiblíos asitiaos na murnia memoria;
xiblíos tapecíos pol escaezu l’angustia;
xiblíos que cancallen el xeitu la dubia.

Xiblantes xiblíos del vientu nordés;
ente peñes, cordales y orbayu cheiriento;
güel y esmolez la carne muerto;
de les mentes xiblantes que faen xorrecer.

Nun ye que tengas la meyor lluna, la meyor estrella, o’l meyor sol.
Que los tos montes y cordales seyan verdes.
Nun ye que seyas más guapa, más encesa, más gayaspera…
Simplemente yes tu.

Tu esbilles qué ponete, qué escuchar, qué facer, qué dicir,
qué glayar, en qué momentu;
tu espardes lo que nagües, lo que pruyes, polo que puxes.
Simplemente, cada tu yes tu.

Asina, si daquién te manda, t’unvia esllava, t’entafarra;
si daquién t’ordena, te diz y t’axeita,
ensin que tu, por ser tu, lo aceutes…
Entós, collacia, fuxi, cuerri, dixebra la caleya que te xunce.

Si españa… qu’españe.

Retáyente’l cuerpu:
Retáyente les oreyes, la llingua, les manes, los brazos, les piernes.
Faen posar los tos pulmones, tayen el pasu’l llíquidu pelos tos reñones.
Apaguen la to tiesta. Estrapayen el to cadarma, yá ermu.

Nun aliendes, magar que daquién lo fai.
Nun xintes, ca nun nagües por facelo.
Nun glayes… lo suficiente.
Nun talantes, yá nun sabes, nun sabemos qué ye talantar.

Retayen hasta les nales de los paxarinos que siempres canciaron sele;
nun tienen, nin enantes teníen, la posibilidá de facelo fuerte.
La brenga’l so són podría frayar la so xorra, y abrir la so mente.

Retayen el ruxir del mar escontra les muries del monte,
Retayen los praos y afuraquen la tierra como si fuere sable.
Nun dexen pasar la to vida peles tos manes.
Tas sola, nun hai xente asgaya que t’acompangue.

Ximelguen les agües polos barcos xigantes que suquen los tos mares,
esfocen, como gochos xabaces, les tos posibilidaes de xida,
siempres que nagües por avanzar, te frenen.

Necesites daquién que t’emburrie,
pero nun hai yá xente a embute… que t’acompangue.